ޗާންދަނީ މަގުގައި ހުންނަ ރެޑްބީ ފިހާރަ ކައިރީ ހުރި ގެއެއްގައި ރޯވެ އަލިފާނުގެ ހާދިސާއެއް ހިނގައިފި އެވެ.
މިކަމާ ގުޅިގެން އެމްއެންޑީއެފުން ބުނީ، މއ. އާހިޔާގުލްޝަން އަލިފާނުގެ ހާދިސާއެއް ހިނގައިގެން އެމްއެންޑީއެފް ފަޔާ އެންޑް ރެސްކިއު ސާވިސްއިން ހަރަކާތްތެރިވަމުންދާ ކަމަށާއި އެ ހާދިސާގެ ރިޕޯޓް ލިބިފައި ވަނީ މިއަދު ހެނދުނު 09:30 ހާއިރު ކަމަށެވެ.
އާހިޔާގުލްޝަން ގްރައުންޑް ފުލޯގެ ޑީ ބޯޑްގައި ރޯވެ ހިނގި ހާދިސާ އަށް އެމްއެންޑީއެފުން އެޓެންޑުވި އިރު ވަނީ ނިއްވާލާފަ އެވެ. ނަމަވެސް ފުދޭވަރަކަށް ދުން ފެތުރިފައިވާތީ މުޅި ބިލްޑިން އެވަކުއޭޓް ކޮށްފައިވާ ކަމަށް އެމްއެންޑިއެފުން ބުނެ އެވެ.
އާހިޔާގުލްޝަން ގޭގެ މަތީ ފަންގިފިލައެއްގައި ދިރިއުޅޭ މީހަކު 'އަދަދު'އަށް މައުލޫމާތު ދިން ގޮތުގައި އަލިފާން ރޯވީ އެގޭގެ ސިޑި ދަށުގައި ހުރި ކަރަންޓު ބޯޑުން ސޯޓެއް ވެގެންނެވެ. އަދި ވަރަށް ބޮޑަށް އަލިފާން ރޯވި ކަމަށާއި، އެ ގޭގެ ތިން ވަނަ ފަންގިފިލާގައި ހުރެފައި ދޮރު ހުޅުވިއިރު ދުންގަނޑު ބޯކަމުން އެއްވެސް އެއްޗެއް ނުފެންނަ ކަމަށް ބުނެފައި ވެއެވެ.
ގެއިން ނުކުމެވުނު ގޮތް ކިޔައިދެމުން އެ އަންހެން މީހާ ބުނީ، ދުންބޯކަމުން ނުފޭބި ގޭގައި ހުއްޓާ މީހަކު ގެޔަށް އެރުމުން އޭނައާއެކު ތިރިއަށް ފޭބީ ކަމަށެވެ.
އާލިޔާގުލްޝަން ގޭގައި ރޯވި އަލިފާންގަނޑު ނިއްވާލަން އެ ސަރަހައްދުގައި ހަރަކާތްތެރިވި އާންމު މީހަކު 'އަދަދު'އަށް ބުނީ، އޭނާއަށް އެތަނަށް ދެވުނީ ހަޅޭއްލަވާ އަޑަށް ކަމަށާއި، އޭރު ކުނިތަކެއްގައި ރޯވެ އަލިފާންގަނޑު ފެތުރެން ފަށާފައިވާ ކަމަށެވެ. އެހެންކަމުން އެ ސަރަހައްދުގައި ތިބި އެއްބަޔަކު އަލިފާން ކޮންޓްރޯލް ކުރެވޭތޯ މަސައްކަތް ކުރި އިރު، އަނެއް ބަޔަކު އުޅުނީ މީހުން ސަލާމަތް ކުރުމަށް ކަމަށެވެ.
"ދެން ބޯޑަކަށް ނެތް [ފެން] ޖެހޭކަށް. އެއީ ފޯމު ކަހަލަ އެއްޗެއް ދެއްތޯ ކަރަންޓަށް ބޭނުން ކުރެވޭނީ. އަޅުގަނޑު ބެލީ މި ފިހާރައަކަށް ވަދެ ވެސް، ސޭފްޓީއަށް ހުންނާނެ ނޫންތޯ ބަހައްޓާފައި. އެހެން ފޯމު ބޯޑެއް ލިބޭތޯ އަޅުގަނޑު ބެލީ" އެ ސަރަހައްދުގައި ހުރި ފިހާރަތަކުން ފޯމު ހޯދަން މަސައްކަތް ކުރި ގޮތް ކިޔައިދެމުން އޭނާ ބުންޏެވެ.
އޭނާ ބުނީ އެ ސަރަހައްދުގައި އަލިފާން ރޯވުމުން ސަރަހައްދުގައި ދިރިއުޅޭ އެންމެން އެކުގައި އެކަމަށް އެޓެންޑުވި ކަމަށެވެ. ސަބަބަކީ އެއީ ވަރަށް ކައިރި ކައިރީގައި މީހުން ދިރިއުޅޭ ސަރަހައްދަކަށް ވެފައި، އަލިފާންގަނޑު ފެތުރިއްޖެ ނަމަ ބޮޑެތޮ ގެއްލުންތަކެއް ލިބިދާނެތީ ކަމަށް އޭނާ ބުންޏެވެ.
