ވީނުވީ ނޭނގި ގެއްލެމުން އަންނަ މީހުން އިތުރުވާތީ، އެ މީހުން ހޯދުމަށް އަޅާފައިވާ ފިޔަވަޅުތައް ހަރުދަނާ ކުރުމަށް ގޮވާލާ ރައްޔިތުންގެ މަޖިލީހަށް މިއަދު ހުށަހެޅި ކުއްލި މައްސަލަ ބޭރުކޮށްލައިފި އެވެ.
މި ކުއްލި މައްސަލަ ހުށަހެޅުއްވީ ޕީއެންސީގެ ޕީޖީ ލީޑަރު، މަޑުއްވަރީ ދާއިރާގެ މެންބަރު އާދަމް ޝަރީފް އުމަރެވެ.
އެ މައްސަލައިގައި ބުނެފައިވާ ގޮތުގައި ގެއްލޭ މީހުންގެ އަދަދު އިތުރުވެ، އެކަމުގެ ސަބަބުން މުޖުތަމައުގައި ބިރުވެރިކަމާއި ކަންބޮޑުވުމާއި ހިތްދަތިކަން އިތުރުވެފައިވާ ކަމަށެވެ.
"ގެއްލިފައިވާ މީހުން ހޯދުމުގައި ސަރުކާރުން އެންމެ އެދެވޭ ގޮތުގައި މަސައްކަތް ކުރަމުން ނުދާ ކަަމަށާއި މީހުން ހޯދުމުގައި ސަރުކާރުން ފަރުވާ ކުޑަ ކުރާ ކަމުގެ ޝަކުވާ އިތުރުވަމުން [ދާތީ]" އެ މައްސަލައިގައި ބުނެފައިވެ އެވެ.
އާދަމް ޝަރީފްގެ މައްސަލައިގައި ވަނީ މިދިޔަ މަހުގެ 31 ވަނަ ދުވަހުގެ ރޭގެ ފަހުން ވީނުވީ އެއް ނޭނގި ގެއްލިފައިވާ އއ. މަތިވެރި، ހަސަން އަލީ (ހަސަންފުޅު) އާއި މި މަހުގެ ހަތަރު ވަނަ ދުވަހުން ފެށިގެން ހަބަރެއް ވެފައިނުވާ ސ. މަރަދޫފޭދޫ، ގަސްކަރަ، މުހައްމަދު އާސިރު އިސްމާއީލްގެ ވާހަކަ ފާހަގަކޮށްފަ އެވެ.
މި ދެ މީހުން ހޯދުމަށް ވެސް ސަރުކާރުން އެދެވޭ މަސައްކަތްތަކެއް ކޮށްފައިނުވާ ކަމަށް ގަބޫލުކުރާ ކަމަށް ވެެސް ބުނެފައިވެ އެވެ.
މި މައްސަލަ މަޖިލީހަށް ބަލައިގަތުމާ މެދު ނެގި ވޯޓުގައި ފެންނަ ކަމަށް ވޯޓު ދެއްވީ 18 މެންބަރުންނެވެ. ނުފެންނަ ކަމަށް 29 މެންބަރުން ވޯޓު ދެއްވެވި އެވެ.
ފުލުހުން ހާމަކޮށްފައިވާ ގޮތުގައި އާސިރު އެންމެ ފަހުން ފެނިފައި ވަނީ ގެއްލުނު ރޭގެ 19:20 ކަންހާއިރު ހުޅުމާލެ ފެރީ ޓާމިނަލް ކައިރިން ހުދުކުލައިގެ ޓެކްސީއަކަށް އަރާ މަންްޒަރު ކަމަށެވެ. އަދި, ޓެކްސީ ގޮސް މަޑުކުރުމުން އެއާޕޯޓަށް ފައިބާ މަންޒަރު ސީސީޓީވީ ފުޓޭޖްތަކުން ފެންނަ ކަމަށް ފުލުހުން ވަނީ ބުނެފަ އެވެ.
ފުލުހުން ބުނީ އާސިރު އެއާޕޯޓަށް ދިޔަ ނަމަވެސް އެއްވެސްް ތަނަކަށް ފުރައިގެން ގޮސްފައިވާކަން އަދި އެނގިފައި ނުވާ ކަމަށެވެ. މީގެ އިތުރަށް، ފުލުހުން އެ މައްސަލާގައި އެއްވެސް އިތުރު މައުލޫމާތެއް ހާމަކޮށްފައި ނުވެ އެވެ.
މަތިވެރިން ގެއްލުނު ހަސަންފުޅުގެ ހަބަރެއް އަދިވެސް ވެފައި ނުވާއިރު އޭނާ ހޯދުމަށް ބޮޑު ސަރަހައްދެއް ބަލާފައިވެ އެވެ.
