ކޮވިޑް-19 އިން ރައްކާތެރިވުމަށް އުމުރުން ފަސް އަހަރާއި 11 އަހަރާ ދެމެދުގެ ކުދިންނަށް ވެކްސިން ދޭން އިއްޔެ ހުޅުވައިލި އެވެ.

މި އުމުރުފުރައިގެ ކުދިންނަށް ވެކްސިން ދޭން ހުޅުވާލީ، މޯލްޑިވްސް ޓެކްނިކަލް އެޑްވައިޒަރީ ގްރޫޕް އޮން އިމުނައިޒޭޝަނުން އެކަމަށް ލަފާ ދިނުމުންނެވެ. ކޮވިޑުން ރައްކާތެރިވުމަށް ކުދިންނަށް ދޭ ފައިޒާ ވެކްސިން މިހާރު ވަނީ ރާއްޖެ ގެނެސް ވެކްސިން ސެންޓަރުތަކަށް ގެންގޮސްފަ އެވެ.

މިހާރު އެ ވެކްސިން މާލޭގެ ސެންޓަރުތަކުގެ އިތުރުން، އަތޮޅުތެރޭގެ ހޮސްޕިޓަލް އަދި ހެލްތު ސެންޓަރުތަކުން ވެސް ލިބެން ހުންނާނެ ކަމަށް އެޗްޕީއޭއިން ބުނެ އެވެ.

މާލެ ސަރަހައްދުގައި ފައިޒާ ވެކްސިން ދޭނީ ތިން ސެންޓަރަކުންނެވެ. އެއީ އައިޖީއެމްއެޗާއި، ހުޅުމާލެ ހޮސްޕިޓަލުގެ އިތުރުން ދަމަނަވެށިންނެވެ.

titledesc

އުމުރުން 12 އަހަރުން މަތީގެ ކުދިންނަށް ވެސް ފައިޒާ ވެކްސިން ލިބޭނެ އިންތިޒާމު ހަމަޖައްސާފައިވާ ކަމަށް ވެސް އެޗްޕީއޭއިން ވަނީ ބުނެފަ އެވެ. އެ އެޖެންސީން ވަނީ ފައިޒާ ވެކްސިންގެ ޑޯޒްތަކައި ބޫސްޓާ ޑޯޒް ފުރިހަމަ ނުކުރާ މީހުން ވެކްސިން ޖެހުމަށް އެދިފަ އެވެ.

މުހިންމު ބައެއް ހަބަރު

• މިދިޔަ މަހު އެކަނިވެސް ޑެންގޫ ހުމުގެ 195 ކޭސް ރާއްޖެއިން ފެނިފައިވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިންް ބުނެފި އެވެ.

• އަމީނީ މަގު ތަރައްގީ ކުރުމަށް ޕްލޭނިން މިނިސްޓްރީން އާރުޑީސީއާ ހަވާލު ކޮށްގެން ކުރިއަށް ގެންދާ މަޝްރޫއުގެ ދަށުން އެ މަގުގެ ފުރަތަމަ ތިން ސެގްމެންޓުގައި (ސްޓެލްކޯއާ ހަމައަށް) އެމްޓީސީސީން ތާރު އަޅައި ނިންމައިފި އެވެ.

• ބްރިޖުގެ މަސައްކަތް ނޫސްވެރިންނަށް އިއްޔެ ދައްކައިލި އެވެ. ގިނަ މަސައްކަތްތަކެއް ކުރެވެމުންދާއިރު، މި އަހަރުގެ ނިޔަލަށް މާލެއިން ފެށިގެ ގުޅިފަޅާ ހަމައަށް ބުރިޖް ގުޅާލާނެ ކަމަށް ޕްލޭނިން މިނިސްޓްރީން ބުނެ އެވެ.

• މިދިޔަ މަހުގެ ދެވަނަ ދުވަހު ވ. އަތޮޅު ވެމްޕަރު ފަޅުތެރެއިން ފެނުނު އިންސާނެއްގެ ހަށިގަނޑަކީ އޭގެ ހަތަރު ދުވަސް ކުރިން ގެއްލުނު މުހައްމަދު ލިޓަންގެ ހަށިގަނޑުކަން ކަށަވަރު ނުވި ނަމަވެސް، އޭނާ މަރާލާފައިވާ ކަމަށް ތުހުމަތުކުރާ މުހައްމަދު ނިޒާމުގެ މައްޗަށް ދައުލަތުން ދައުވާ ކުރަން ނިންމިކަން އިއްޔެ ރިޕޯޓުކުރި އެވެ.

• ރައްޔިތުންގެ މަޖިލީހުގެ އިއްޔެގެ ޖަލްސާގައި ބަހުސް ކުރާނެ މެންބަރަކު ނެތިގެން ޖަލްސާ ކުރުކޮށްލި އެވެ.

• ރައީސް އޮފީހުގެ ކޮމިއުނިކޭޝަންސް ސެކްރެޓަރީގެ މަގާމަށް، ކުރިން އަންޑަ ސެކްރެޓަރީގެ މަގާމުގައި ހުންނެވި މުހައްމަދު ހިސާން އަލީ ފަހްމީ (ހިސްކޮ) އިއްޔެ އައްޔަން ކުރެއްވި އެވެ.

ދުވަހުގެ ކޯޓޭޝަން

ޝަރުއީ ނިޒާމުގައި ހުރި ގޮންޖެހުންތަކާއި އެ ދާއިރާ ރަނގަޅު ކުރުމަށް ކުރެވެމުންދާ މަސައްކަތްތަކާއި ޕްލޭންތަކާ ގުޅޭ ގޮތުން ޗީފް ޖުޑީޝަލް އެޑްމިނިސްޓްރޭޓާގެ މަގާމާ އައިޝަތު ރިޒުނާ އަދަދު ނޫހަށް ދެއްވި އިންޓަވިއުގައި ވިދާޅުވީ؛

އެއް ކްލަސްޓާއެއްގެ ތެރޭގައި ހުރި ހުރިހާ މުވައްޒަފުންނާއި މެޖިސްޓްރޭޓުން އެއް ޓީމެއްގެ ގޮތުގައި މަސައްކަތް ކުރަން ފެށުމުން، މި ހުރިހާ ރަށަކަށް ހުށަހެޅޭ މައްސަލަތައް ބެލުން ވަރަށް ހަލުވި ވެގެން ދާނެ، ޝަރުއީ ނިޒާމުގެ ސްޕީޑް ވެސް ވަރަށް ރަނގަޅު ވާނެ،"

ދުވަހުގެ ފޮޓޯ

އަމީނީ މަގުގައި ރޭ ދަންވަރު ތާރުޅެމުމުގެ މަސައްކަތް އެމްޓީސީސީގެ ސްޓާފުން ކުރަމުން ދަނީ. އެ މަގުގެ ފުރަތަމަ ތިން ސެގްމެންޓުގައި 2511 އަކަ މީޓަރުގެ ތާރު އަޅައި ވަނީ ނިންމާފައި. -- ފޮޓޯ: މުހައްމަދު ޝާބިން/ އަދަދު