ރައްޔިތުންގެ މަޖިލީހުގެ އިދާރާގައި މިއަދު ޖިމެއް ހުޅުވައިފި އެވެ.
ޕާކިސްތާނު ސަރުކާރުގެ ހިލޭ އެހީގައި، އެންމެ ފަހުގެ ސާމާނާއެކު ހެދި ޖިމް ހުޅުވައި ދެއްވީ ރައްޔިތުންގެ މަޖިލީހުގެ ރައީސް މުހައްމަދު ނަޝީދެވެ.
މަޖިލިސް އިދާރާގެ 12 ވަނަ ފަންގިފިލާގައި ހުންނަ މި ޖިމް ހާއްސަކޮށްފައިވަނީ މަޖިލީހުގެ މެންބަރުންނާއި، މުވައްޒަފުންނަށެވެ.
ރައްޔިތުންގެ މަޖިލީހުގެ މީޑިއާ އެންޑް ކޮމިއުނިކޭޝަން ޑައިރެކްޓަ ހަސަން ޒިޔާއު ވިދާޅުވީ ޖިމް ބޭނުން ކުރަން މަޖިލީހުގެ މެމްބަރުން އަދި މުވައްޒަފުން ފީއެއް ދައްކަން ނުޖެހޭނެ ކަމަށެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަޖިލީހުގެ ޖިމް ހުޅުވައި ދެއްވަނީ. -- ފޮޓޯ: މަޖިލީހުގެ އިދާރާ
ޖިމް ހުޅުވިފައި ހުންނަ ގަޑިތައް
- ފަތިހު 5:30 އިން ހެނދުނު 7:15 އަށް
- މެންދުރު ފަހު 3:00 އިން ރޭގަނޑު 10:30 އަށް
ޒިޔާއު ވިދާޅުވީ ޖިމް ބެލެހެއްޓުމަށް ހަވާލުކޮށްފައިވަނީ މަޖިލީހުގެ ރެކްރިއޭޝަން ކްލަބާ ކަމަށެވެ.
މަޖިލީހުގެ އިދާރާ ވެސް ބިނާކޮށްފައި ވަނީ ޕާކިސްތާނުގެ އެހީގަ އެވެ. ނަމަވެސް މަޖިލީހުގެ ގޯތިތެރޭގައި ބިނާކޮށްފައި ހުރި 13 ބުރީގެ އިމާރާތް ހެދީ ދިވެހި ސަރުކާރުގެ ބަޖެޓުންނެވެ.
