ތާރު އަޅައިގެން އަމީނީ މަގު ހެދުމުގެ މަސައްކަތް ތާވަލު ކުރި ދުވަހަށް ނުނިމޭނެ ކަމަށާއި ނިމޭނެ ކަމަށް މިހާރު ލަފާ ކުރެވެނީ ސެޕްޓެމްބަރުގެ ނިޔަލަށް ކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.
އަމީނީ މަގު ތަރައްގީ ކުރުމުގެ މަސައްކަތް އާރުޑީސީއާ ހަވާލުކޮށްފައިވަނީ 210 ދުވަހުގެ ތެރޭގައި ނިންމާ ގޮތަށެވެ. އެއީ 84 މިލިއަން ރުފިޔާއަށެވެ. އެގްރީމެންޓުގައި ނިމޭނެ ކަމަށް އޮތް ތާރީހަކީ މިހިނގާ ފެބްރުއަރީ މަހުގެ ނިޔަލަށެވެ.
އެހެންނަމަވެސް ރައްޔިތުންގެ މަޖިލީހުގެ މިިއަދުގެ ޖަލްސާގައި ހެންވެއިރު ހުޅަނގު ދާއިރާގެ މެންބަރު ހަސަން ލަތީފް އެ މަޝްރޫއު ނިމޭނެ ތާރީހަކާ ގުޅޭ ގޮތުން ސުވާލު ކުރުމުން އަސްލަމް ވިދާޅުވީ އެ ތާރީހަށް ނުނިމޭނެ ކަމަށެވެ.
"ދަތިތަކަށް ކޮންސިޑާކޮށްފައި އަޅުގަނޑުމެން މިހާރު ވާނެ ރިވައިޒްޑް ކޮމްޕްލީޝަން ޑޭޓެއް ކަނޑައަޅާފައި، އެއީ 27 ސެޕްޓެމްބަރު، އެހެންވީމާ އަމީނީ މަގު ނިމިގެން ދާނެ ސެޕްޓެމްބަރު މަހާ ހަމައަށް،" އަސްލަމް ވިދާޅުވި އެވެ.
އަސްލަމް ވިދާޅުވީ މަގު ހެދުމުގައި އާރްޑީސީއަށް ކުރިމަތިވި އެންމެ ބޮޑު ގޮންޖެހުމަކީ އެމްޑަބްލިޔުއެސްސީއަށް ބޭނުންވާ ހޮޅިތައް ސަޕްލައި ނުކުރެވުން ކަމަށެވެ.
އަމީނީ މަގުގެ މަސައްކަތް ކުރަމުން އަންނަނީ ރޭވިފައިވާ ގޮތަށް ކަމަށާއި އާރްޑީސީން އޮތީ 24 ގަޑިއިރު މަސައްކަތް ކޮށްގެން މަގު ނިންމަން ނަމަވެސް އެކަމުގައި ބައެއް ދަތިތައް ހުރިކަމަށް މީގެ ކުރިން އެ ކުންފުނިން ވެސް ބުނެފައިވެ އެވެ.
ހޮޅި ލިބުމުގައި ހުރި ދަތިކަމުގެ ސަބަބުން މަގު ހެދުމުގެ މަސައްކަތް ދުވަސްކޮޅަކަށް މެދުކަނޑާލަންވެސް ޖެހުނެވެ.
