ރައީސް އިބްރާހިމް މުހައްމަދު ސޯލިހު މި ދައުރުގެ އެންމެ ފަހުން ރިޔާސީ ބަޔާން އިއްވަވަން މަޖިލީހަށް ވަޑައިގެންނެވުމާއެކު، އިދިކޮޅު މެންބަރުން ވަނީ އެމަނިކުފާނާ ދެކޮޅަށް އިހުތިޖާޖު ކުރައްވާފަ އެވެ. މަޖިލިސް އިދާރާގެ ގޭޓާ ހަމައިން ފެށި އިހުތިޖާޖު ރިޔާސަތު ކުރިމައްޗާ ހަމައަށް ގެންގޮސް ރިޔާސީ ބަޔާން އިއްވުމަށް އިދިކޮޅު ހުރަސް އެޅި އެވެ.
ނައިފަރު ދާއިރާގެ މެންބަރު އަހުމަދު ޝިޔާމްގެ އިސްވެ ހުންނަވައި ފެށި ހަރަކާތުގައި މާވަށު ދާއިރާގެ މެންބަރު މުހައްމަދު ސައީދާއި މަހިބަދޫ ދާއިރާގެ މެންބަރު ތޯރިގް އިބްރާހިމް ފެލިދޫ ދާއިރާގެ މެންބަރު ފަޒުލް ރަޝީދުގެ އިތުރުން ފަރެސްމާތޮޑާ ދާއިރާގެ މެންބަރު ހުސައިން ލަތީފް ވަނީ ބައިވެރިވެފަ އެވެ.
ރައީސް ރިޔާސީ ބަޔާން އިއްވަވާފައިވަނީ މި ހުރިހާ މެންބަރުންގެ ނަން އިއްވައި މަޖިލިސް ތަޅުމުން ބޭރުކުރުމަށް ފަހުގަ އެވެ.
ރިޔާސީ ބަޔާން އިއްވުމަށް ހުރަސް އެޅުމުގެ ފަހަތުގައި އިދިކޮޅުގެ އެތައް ތުހުމަތަކާއި ޝަކުވާއެއް ވެސް އެބައޮތެވެ.
"ފުރަތަމަ ކަމަކަށް ރައީސް ސޯލިހަށް މި މަޖިލީހުގައި ތަގްރީރު ކުރެއްވޭނެ ކަމަކަށް އަޅުގަނޑުމެން ގަބޫލެއް ނުކުރަން، އެއީ ސުޕްރީމް ކޯޓުން ނިންމަން ޖެހިފައި އޮތް މައްސަލައެއް، [ނައިބު ރައީސް] ފައިސަލް ނަސީމަށް ހުވާ ލައިދީފައި އޮތީ ރައީސް ކަމަށް،" ނަން އިއްވައި މަޖިލީހުން ބޭރު ކުރުމުން, ޝިޔާމް "އަދަދު" އަށް ވިދާޅުވި އެވެ.
އިހުތިޖާޖު ކުރަން ޖެހުނު އަނެއް ސަބަބެއްގެ ގޮތުގައި ޝިޔާމް ފާހަގަކުރެއްވާ އަނެއް ސަބަބަކީ އިދިކޮޅު ލީޑަރު ރައީސް ޔާމީން އަބްދުލްގައްޔޫމް ޖަލަށް ލުމުގައި ސަރުކާރުގެ އަތް ވާ ކަމަށް އިދިކޮޅުން ކުރާ ތުހުމަތެވެ.
"ދިވެހިރާއްޖޭގައި ކޮރަޕްޝަން އިންތިހާއަށް އޮތް އިރު އަދި ވަކިން ހާއްސަކޮށް ރައީސުލްޖުމްހޫރިއްޔާއަށް ވެސް އެމްއެމްޕީއާރްސީގެ ކޮރަޕްޝަންގެ ތުހުމަތުގެ އިނގިލި އެބަ ދިއް ކުރެވޭ، އެކަމަކު ރައީސް ޔާމީން އެކަނި ޖަލަށް ލައިގެން މި މީހުންނަށް އުޅޭ އުޅުން [ބަލައި ނުގަނެވޭ]،" ޝިޔާމް ތުހުމަތު ކުރެއްވި އެވެ.
ޔާމީނަށް އިއްވާފައިވާ ޖަލުގެ ހުކުމަކީ ސިޔާސީ ގޮތުން ކޮށްފައިވާ ކަމަށް އިދިކޮޅުން ބުނަމުން އަންނަ ވާހަކަ ޝިޔާމް ވެސް ވަނީ ތަކުރާރު ކުރައްވައިފަ އެވެ.
ރިޔާސީ ބަޔާނާ ދިމާކޮށް އިދިކޮޅު ސަޕޯޓަރުން ވެސް ވަނީ މަޖިލިސް ސަރަހައްދުގައި އިހުތިޖާޖުކޮށްފަ އެވެ.
މިއަދު އިދިކޮޅުން މުޒާހަރާ ފެށީ، މަޖީދިއްޖާ ސްކޫލު ކައިރިންނެވެ. ނަމަވެސް ފުލުހުން ވަނީ މުޒާހަރާގެ ބައިވެރިން ސޯސަން މަގަށް ފަހަތަށް ޖައްސާފަ އެވެ. އިހުތިޖާޖުގެ ތެރެއިން، މިހާތަނަށް އަށް މީހުން ހައްޔަރު ކޮށްފައިވާ ކަމަށް ޕީޕީއެމުން ބުނެ އެވެ.
