ސްޓެލްކޯ އާއި، ސިޓީ ކައުންސިލުގެ މައްސަލަ ހައްލު ކުރުމަށް ލޯކަލް ގަވަމަންޓް އޮތޯރިޓީ (އެލްޖީއޭ)ގެ އެހީއަށް އެދިއްޖެ އެވެ.
ސިޓީ ކައުންސިލާއި ސްޓެލްކޯއާ ޖެހިފައިވާ މައްސަލައަކީ މަގުކޮނުމާއި، މަގުކޮނެގެން ހިދުމަތް ދިނުމުގައި އަމަލުކުރާނެ ގޮތާ މެދު ސިޓީ ކައުންސިލުން އެކުލަވާލި އުސޫލުގެ މައްސަލަ އެވެ. ސްޓެލްކޯއިން ބުނާ ގޮތުގައި އެ އުސޫލުގެ ސަބަބުން ރައްޔިތުންނަށް ދޭ ހިދުމަތުގެ އަގު ބޮޑުވެގެންދާ ކަމަށާއި، ނަމަވެސް ސިޓީ ކައުންސިލުން ގޮތް ދޫކުރަން ބޭނުން ނުވާ ކަމަށެވެ.
މި މައްސަލައާ ގުޅިގެން މިއަދު އެލްޖީއޭއާ އެކު ބޭއްވި ބައްދަލުވުމުގައި އޮތޯރިޓީގެ ސީއީއޯ އަފްޝަން ލަތީފް ވިދާޅުވީ، ސްޓެލްކޯއިން ހިއްސާކުރި ކަންބޮޑުވުންތަކާ އެކު، ސިޓީ ކައުންސިލާ މަޝްވަރާ ކުރާނެ ކަމަށާއި، ހައްލު ހޯދުމަށް ސްޓެލްކޯއާ އެކު އެއް މޭޒަކަށް އަރާނެ ކަމަށެވެ. އަދި ސްޓެލްކޯއިން ވަނީ ސިޓީ ކައުންސިލާ އެކު މަޝްވަރާކުރަން ތައްޔާރުކަން ހާމަކޮށްފަ އެވެ.
އަފްޝަން ވިދާޅުވީ ރައްޔިތުންނަށް އެކި ހިދުމަތްތައް ފޯރުކޮށްދޭ ކުންފުނިތަކަށް ދިމާވާ ކޮންމެ ދައްޗަކާ އެކު އޭގެ އަސަރު ރައްޔިތުންނަށް ކުރާނެކަން އެނގިވަޑައިގަންނަވާ ކަމަށެވެ. އަދި އެހެން ނުވާނެހެން މަސައްކަތް ކުރުމަކީ ވެސް އެލްޖީއޭގެ ވަރަށް ބޮޑު މަސްއޫލިއްޔަތެއް ކަމަށް ވެސް އޭނާ ވިދާޅުވި އެވެ.
"މިކަމުގައި ހިމެނޭ ޓެކްނިކަލްޓީސްއަކީ އަޅުގަނޑުމެންގެ މެންޑޭޓުގައި އޮތް ކަމެއް ނޫން ކަމުގައި ނަމަވެސް، އަޅުގަނޑުމެން އެންމެން ވެސް މި މަސައްކަތް ކުރަނީ ރައްޔިތުންނަށް ހިދުމަތްތަކެއް ފޯރުކުރަން," އަފްޝަން ވިދާޅުވި އެވެ.
އަފްޝަން ވިދާޅުވީ، ސަރުކާރުގެ އެކި ވުޒާރާތަކާއި، އެކި އިދާރަތަކާއި، ސަރުކާރު ހިއްސާވާ ކުންފުނިތަކާއި އަދި މަދަނީ ޖަމްއިއްޔާތަކާ ކައުންސިލުތަކާ ދެމެދު ޖެހޭ މައްސަލަތަކުގެ ތެރެއަށް އެލްޖީއޭއިން ވަދެ، ހައްލު ހޯދަން މަޝްވަރާ ކުރާނެ ކަމަށެވެ. އަދި ސިޓީ ކައުންސިލާ އެކު ވެސް މިފަދަ މަޝްވަރާ ބައްދަލުވުންތަކެއް ބާއްވާފައިވާނެ ކަމަށް އޭނާ ވިދާޅުވި އެވެ. އޭނާ ވިދާޅުވީ މިފަދައިން މަޝްވަރާ ކުރުމުން ގިނަ ކަންތައްތަކުގައި އެދެވޭ ހައްލު ހޯދިފައިވާ ކަމަށެވެ.
އަފްޝަން އިތުރަށް ވިދާޅުވި ގޮތުގައި އެލްޖީއޭއިން ކުރާ އެންމެ މުހިންމު އެއް މަސައްކަތަކީ ކައުންސިލުތަކުން ކުރަން ޖެހޭ މަސައްކަތްތައް ކުރަނީ ގާނޫނާ ގަވައިދާ އެއްގޮތަށްތޯ އަދި އޮންނަ އުސޫލާ އެއްގޮތަށްތޯ މޮނިޓާ ކުރުމެވެ.
އޭނާ ވިދާޅުވީ އުސޫލުތައް އެކުލަވާލާއިރު، ކައުންސިލުތަކުން ކޮންސަލްޓޭޓިވް ޕްރޮސެސްއެއް ކުރިއަށް ގެންދަން ޖެހޭ ކަމަށާއި، އެއީ އެލްޖީއޭއިން އެންމެ ބޮޑަށް ބާރުއަޅާ އެއް ކަންތައް ކަމަށެވެ.
"މީގެ ކުރިން ވެސް، ހަމައެކަނި މާލެ ސިޓީ ކައުންސިލަކުން ނޫން. އެހެން ކައުންސިލްތަކުން ވެސް އުސޫލު ހައްދަވަފައި އެލްޖީއޭއަށް ފޮނުވީމައި، އަޅުގަނޑުމެން އެބަ ހޯދަން، އެކަމާ ގުޅޭ އެކި ބޭފުޅުންގެ ލަފައާއި އިންޕުޓް." އެ ޕްރޮސެސް ފޮލޯ ކުރުމުގެ މުހިންމުކަން ތަކުރާރުކޮށް ފާހަގަކުރައްވާ އަފްޝަން ވިދާޅުވި އެވެ.
ކުންފުނިތަކާއި ސިޓީ ކައުންސިލާ ދެމެދު އޮތް މައްސަލަ ހައްލުކުރަން ޓައިމްލައިނެއް އެކުލަވާލާ، މައްސަލަ ހައްލުވަންދެން މަޝްވަރާ ކުރަމުންގެންދަވާނެ ކަމަށް އަފްޝަން ވިދާޅުވި އެވެ.
