ރައީސް އިބްރާހީމް މުހައްމަދު ސޯލިހާ ދެކޮޅަށް ލޭއޮހުރުވުމަށް ދިއުމަށް ގޮވާލައި މާލެ ސިޓީ ކައުންސިލްގެ ތަރުޖަމާނު މަރިޔަމް ޝިއުނާ ޓްވީޓް ކުރެއްވި މައްސަލަ ފުލުހުން ބަލަން ފަށައިފި އެވެ.
ޝިއުނާ ކުރެއްވި ޓްވީޓްގައި ލިޔުއްވާފައިވަނީ "ރައީސް ސޯލިހު ހަމަ ބިމަ ތިރިކުރަން ވެއްޖެ، ޓްވީޓް ކުރަން ތިބިގެން ވާކަށް ނެތް، ލޭއޮހުރުވުމަކުން ވެސް ބަދަލު ކުރަން ވެއްޖެ" ކަމަށެވެ.
މިކަމާ ގުޅިގެން ފުލުހުން ބުނީ "ނަންނަޒީވް" ގެ ނަމުގައިވާ ޓްވިޓާ އެކައުންޓުން ކޮށްފައިވާ އެ ޓްވީޓްގެ މައްސަލަ ފުލުހުންގެ ސަމާލުކަމަށް އައިސްފައިވާ ކަމަށެވެ.
"މި ޓްވީޓާ ގުޅޭ ގޮތުން ބަލަން ޖެހޭ ކަންކަން ފުލުހުން ދަނީ ބަލަމުން،" މީޑިއާތަކަށް ފުލުހުން ހިއްސާކުރި މެސެޖްގައިވެ އެވެ.
އެ ޓްވީޓް މިހާރު ވަނީ ޑިލީޓްކޮށްފަ އެވެ.
ޓެރަރިޒަމަށް ހިތްވަރު ދިނުމަކީ ޓެރަރިޒަމް މަނާކުރުމުގެ ގާނޫނުގެ ދަށުން ޖިނާއީ ކުށެކެވެ. މީގެ ކުރިން ވެސް ސޯޝަލް މީޑިއާގައި އެފަދަ ކަންކަމަށް ގޮވާލުމުން މައްސަލަ ތަހުގީގުކޮށް ދައުވާ ވެސް އުފުލާފައިވެ އެވެ.
