ވޭތުވެދިޔަ ހަތަރު އަހަރުގެ ތެރޭގައި ރާއްޖެއަށް ކުރިމަތިވި ގޮންޖެހުމާއި އުނދަގޫ ހާލަތްތަކުގައި އިންޑިއާވެފައި ވަނީ އެންމެ ގާތް އަދި އެންމެ އިތުބާރު ކުރެވޭ އެއް ރަހުމަތްތެރިޔާގެ ގޮތުގައި ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އިންޑިއާގެ 74 ވަނަ ޖުމްހޫރީ ދުވަސް ރާއްޖޭގައި ފާހަގަކުރުމަށް އިންޑިއާ ހައި ކޮމިޝަނުން ދަރުބާރުގޭގައި ރޭ ބޭއްވި ޖަލްސާގައި ރައީސް ސޯލިހު ވިދާޅުވީ އިންޑިއާގެ ޖުމްހޫރީ ހަޔާތުން މި ފެށުނު އާ އަހަރުގައި، ދެ ގައުމުގެ ގުޅުން އިތުރަށް ބަދަހިވެގެންދާނެކަން ޔަގީން ކުރައްވާ ކަމަށެވެ.
އެ މަނިކުފާނުގެ ވާހަކަފުޅުގައި ރާއްޖޭގެ ތަރައްގީއަށް އިންޑިއާއިން ފޯރުކޮށް ދެމުންގެންދާ އެހީތަކަށާއި، ކޯވިޑް-19އާ ދެކޮޅަށް ރާއްޖެއިން ކުރި މައްސައްކަތްތަކުގައި ފޯރުކޮށްދިން އެހީތައް ފާހަގަ ކުރެއްވެވި އެވެ.
މި ސަރުކާރުން ހިންގާ ތަރައްގީގެ ބިޔަ މަޝްރޫއުތަކަށާއި އެހެނިހެން ގިނަ މަޝްރޫއުތަކަށް ވެސް ލޯނާއި ހިލޭ އެހީ ހަމަޖައްސައި ދީފައިވަނީ އިންޑިއާއިންނެވެ.
އިންޑިއާގެ ޖުމްހޫރީ ދުވަސް ފާހަގަކުރަން ދަރުބާރުގޭގައި ބޭއްވި ޖަލްސާގައި ރައީސް ސޯލިހާއި ފޮރިން މިނިސްޓަރު އަބްދުﷲ ޝާހިދު އަދި ރާއްޖޭގައި ހުންނަވާ އިންޑިއާގެ ސަފީރު. -- ފޮޓޯ: ރައީސް އޮފީސް
ވޭތުވެދިޔަ އަހަރުތަކުގައި އިންޑިއާގެ ކުރިއެރުމަށާއި ތަރައްގީއަށް އަދި ހަމަޖެހުމަށް އެ ގައުމުން ކަޑައްތުކުރި ދަތުރު ސާބިތުކަމާއި ވިލުންވެރިކަމާއެކު ދައްކުވައިދީފައިކަމުގައި ވިދާޅުވެ އެކަމަށް ރައީސް ސޯލިހު ތައުރީފު ކުރެއްވެވި އެވެ.
އެ މަނިކުފާނު ވިދާޅުވީ ބިޔަ އިންޑިޔާގެ ކަންކޮޅުތަގައި އަދުލުވެރި އަދި ޝާމިލު ތަރައްގީ ފެތުރުމުގެ ބާރު ލިބިދެނީ ވެސް އެ ގައުމުގެ ގާނޫނުއަސާސީންނާއި، އިންޑިއާގެ ވެރިންގެ ހަރުދަނާ ސިޔާސަތުތަކުގެ ސަބަބުން ކަމަށެވެ. ގައުމުގެ ތަރައްގީއަށް ބުރުލެއް ނާރުވައި، ތަފާތު މުޖުތަމައުތައް އެއްބައިކޮށް، މުޖުތަމައުގައި ނަމޫނާ ހަމަކަމެއް ގާއިމުކުރުމަށް މަސައްކަތްކުރެވިދާނެކަން އިންޑިއާއިން މިހާރުވެސް ދުނިޔެއަށް ދައްކަމުން އަންނަ ކަމަށް ރައީސް ސޯލިހު ވިދާޅުވި އެވެ.
