އިދިކޮޅު ޕީޕީއެމް ޕީއެންސީ ކޯލިޝަންގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީންގެ މައްޗަށް ކްރިމިނަލް ކޯޓުން އިއްވާފައިވާ ޖަލު ހުކުމް އިސްތިއުނާފް ކުރުމަށް ގާނޫނުގައި ދީފައި އޮންނަ މުއްދަތުގައި އިސްތިއުނާފް ކުރެވޭނެ ކަމުގެ ޔަގީންކަން އެބަ އޮތް ކަމަށް އެމަނިކުފާނުގެ ވަކީލުން ވިދާޅުވެއްޖެ އެވެ.
އެމްއެމްޕީއާރުސީގެ ބޮޑު ހިޔާނާތުގެ ތެރެއިން، ވ. އާރަށް ކުއްޔަށް ދިނުމުގެ މުއާމަލާތުގައި ޔާމީން ރިޝްވަތުގެ ގޮތުގައި 1.1 މިލިއަން ޑޮލަރު ނަންގަވައި އެ ފައިސާ ލޯންޑަ ކުރެއްވި ކަމަށް ސާބިތުވާ ކަމަށް ކަނޑައެޅުމަށް ފަހު، 11 އަހަރަށް ޖަލަށް ލުމަށް ހުކުމް ކުރީ މިދިޔަ ޑިސެމްބަރު މަހުގެ 25 ވަނަ ދުވަހުގަ އެވެ.
އިސްތިއުނާފް ކުރުމަށް 60 ދުވަހުގެ މުއްދަތެއް ލިބޭއިރު، ޖަލު ހުކުމް ދެމިއޮތްހާ ހިނދަކު ރިޔާސީ އިންތިހާބުގައި ވާދަކުރުމުގެ ފުރުސަތު ޔާމީނަށް ގެއްލެ އެވެ. އެހެންވެ ޔާމީން ވީހާވެސް އަވަހަށް މިނިވަންވުމަށް އެމަނިކުފާނުގެ ސަޕޯޓަރުން ވެސް އެދެ އެވެ.
ޔާމީންގެ ވަކީލުން މިއަދު ބޭއްވި ނޫސްވެރިންގެ ބައްދަލުވުމުގައި، އިސްތިއުނާފްކުރެވޭނެ މުއްދަތަކާ ގުޅޭ ގޮތުން ނޫސްވެރިން ސުވާލުކުރުމުން އެމަނިކުފާނުގެ އިސް ވަކީލު އަދި ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވީ ވަކީލުން މަަސައްކަތް ކުރައްވަނީ އަމާޒެއް އޮވެގެން ކަމަށެވެ.
"އާންމު ގޮތެއްގައި އިސްތިއުނާފްގެ ޝަރީއަތް މާ ދިގުލައިގެނެއް ނުދޭ، ދަށު ކޯޓު މަރުހަލާގައި ދެމިގެންދާ ވަރަށް، ގާނޫނުގައި އޮތް މުއްދަތުގައި އިސްތިއުނާފްކޮށް، އަޅުގަނޑުމެންގެ ވަކީލުންގެ އުންމީދަކީ، ހައި ކޯޓުން މައްސަލަ ކާމިޔާބުކޮށް، މި މާޗު މަހު ރައީސް ޔާމީން މިިނިވަން ވެގެން ދިޔުން،" ޖަމީލު ވިދާޅުވި އެވެ.
ޔާމީންގެ ވަކީލުންގެ ޓީމުގައި ހިމެނޭ، ވަކީލު އާދަމް ޝަމީމް ވެސް ވިދާޅުވީ އިސްތިއުނާފަށް މައްސަލަ ހުށަހެޅުން ލަސްވާތީ ޔާމީން އެއްވެސް ވަރަކަށް ޝަކުވާ ނުކުރައްވާ ކަމަށެވެ. ޔާމީން ބޭނުންފުޅުވަނީ، ވީހާވެސް ފުރިހަމަކޮށް ހައި ކޯޓުގައި އިސްތިއުނާފްކުރާ މައްސަލަ ހުށަހެޅުން ކަމަށް އޭނާ ވިދާޅުވި އެވެ.
ރައީސުލްޖުމްހޫރިއްޔާގެ ޝަރުތުތަކުގެ ގޮތުގައި ގާނޫނީ އަސާސީގައި ބަޔާންކޮށްފައި އޮންނަ އެއް ޝަރުތަކީ، ޖިނާއީ ކުށެއްކުރި ކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފު ކުރެވުނުތާ ތިން އަހަރު ވެފައިވާ މީހަކަށް ވާން ޖެހެ އެވެ.
އެއާއެކު، ޔާމީނަށް ރިޔާސީ އިންތިހާބުގައި ވާދަކުރުމުގެ ފުރުސަތު މި ވަގުތަށް ވަނީ ބަންދުވެފަ އެވެ. ޔާމީން މިނިވަންކުރުމަށް ގޮވާލައި، ޕީޕީއެމް/ޕީއެންސީގެ ސަޕޯޓަރުން ގެންދަނީ ސިލްސިލާކޮށް ކޮންމެ ރެއަކު ވެސް މާލޭގެ މަގުތައް މަތީގައި މުޒާހަރާ ކުރަމުންނެވެ.
އަދި، ކްރިމިނަލް ކޯޓުގައި އެމަނިކުފާނުގެ މައްޗަށް އުފުލާފައިވާ ރިޝްވަތާއި މަނީ ލޯންޑަކުރުމުގެ ދައުވާގެ އިތުރު މައްސަލައެއް ވެސް އެބަ އޮތެވެ. ރ. ފުއްގިރި ކުއްޔަށް ދޫކުރުމުގައި ހިޔާނާތް ހިންގި ކަމަށް ބުނާ މައްސަލަ ކްރިމިނަލް ކޯޓުގައި އަދި އޮތީ ޝަރީއަތުގެ ވަރަށް ކުރީކޮޅުގެ މަރުހަލާއެއްގަ އެވެ.
