އިދިކޮޅު ޕީޕީއެމް/ޕީއެންސީ ކޯލިޝަނުން "ބުންވަރު" ނަމުގައި ހިނގާލުމެއް ބާއްވަން ތައްޔާރުވެއްޖެ އެވެ.
ޕީޕީއެމުން ބުނީ މި ހިނގާލުން ފަށާނީ އަންނަ ހުކުރު ދުވަހުގެ ހަވީރު ޕީޕީއެމް އޮފީސް ކުރިމަތިން ކަމަށެވެ.
ހޯޕް ކޮންފަރެންސްގެ ތެރެއިން ބާއްވާ ދެ ހަރަކާތަކާއި ގުޅިގެން އިއްޔެ ޕްރޮގްރެސިވް ކޮންގްރެސް ކޯލިޝަން އިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޕީއެންސީގެ ނައިބް ރައީސް ޝުޖާއު ވިދާޅުވީ، ހޯޕް ކޮންފަރެންސް ފެށުމަށް ހަމަޖެހިފައިވަނީ އަންނަ މަހުގެ ދެވަނަ ދުވަހު ކަމަށެވެ.
އެއަށްފަހު "ބުންވަރު" ހިނގާލުން ޖެހިގެން އަންނަ ދުވަހުގެ ހަވީރު 3:30 ގައި ޕީޕީއެމް އޮފީސް ދޮރުމަތިން ފަށާނެ ކަމަށް ޝުޖާއު ވިދާޅުވި އެވެ.
ޝުޖާއު ވިދާޅުވީ، އެއީ ސުލްހަވެރި ހިނގާލުމެއް ކަމަށާއި އެ ހިނގާލުމުގައި ވީހާވެސް ގިނަ ރައްޔިތުން ބައިވެރިވުމަށް އެދޭ ކަމަށެވެ.
ހަމައެއާއެކު ކޮންފަރެންސް ނިންމުމުގެ ޖަލްސާ އަންނަ އާދީއްތަ ދުވަހު އާޓިފިޝަލް ބީޗުގައި އޮންނާނެ ކަމަށާއި، މި ޖަލްސާއަށް ވެސް ޕީޕީއެމަށް އަދި ރައީސް ޔާމީނަށް ސަޕޯޓުކުރައްވާ ހުރިހާ ފަރާތްތަކުން ބައިވެރިވުމަށް އިދިކޮޅުން ވަނީ އެދިފަ އެވެ.
އިދިކޮޅުން ބާއްވާ މި ކޮންފަރެންސްގައި އެޕާޓީގެ ކެމްޕޭން ކުރިއަށްދާނެ ގޮތާއި ރައީސް ޔާމީން ޖަލުން މިނިވަން ކުރަން ކުރެވެން ހުރި ކަންކަމާއި ގުޅޭގޮތުން މަޝްވަރާކުރާނެ ކަމަށް އެޕާޓީން ވިދާޅުވެ އެވެ.
