ހޮނިހިރު ދުވަހު ބޭއްވި އެމްޑީޕީގެ ރިޔާސީ ޕްރައިމަރީގައި އެ ޕާޓީގެ ރައީސް މުހައްމަދު ނަޝީދަށް ލިބިވަޑައިގެންނެވީ ބޮޑު ނާކާމިޔާބީއެކެވެ. ނަޝީދުއާ ވާދަކުރައްވާ ރައީސް އިބްރާހިމް މުހައްމަދު ސޯލިހު ޕްރައިމަރީ ކާމިޔާބުކުރެއްވީ 61 އިންސައްތަ ވޯޓު ހޯއްދަވައިގެންނެވެ.

އެމްޑީޕީގެ ތެރޭގައި ދެ ރައީސުންގެ ފެކްޝަން އުފެދި ބަހުގެ ހަމަލާތައް ބަދަލުކުރެވޭތާ އެތައް ދުވަހެއް ވެފައިވާއިރު ދެ ފެކްޝަންގެ މެދުގައި ވާދަވެރި ދެ އިންތިހާބެއް މިހާރު ވަނީ ނިމިގެން ގޮސްފަ އެވެ. އެގޮތުން، މިދިޔަ އަހަރު ބޭއްވި އެ ޕާޓީގެ ޗެއާޕާސަން އިންތިހާބުގައި ނަޝީދުގެ ފަޅިން ވާދަކުރެއްވީ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ އެވެ. ރައީސް ސޯލިހުގެ ފަޅިން ވާދަކުރެއްވީ އެ އިންތިހާބު ކާމިޔާބުކުރެއްވި އިކޮނޮމިކް މިނިސްޓަރު ފައްޔާޒު އިސްމާއިލް އެވެ.

އެ އިންތިހާބު ނަޝީދަށް ނާކާމިޔާބުވި ނަމަވެސް ނަޝީދާއެކު، މެޖޯރިޓީ ވޯޓު ދީގެން ދެ އަތޮޅަކާއި ދެ ސިޓީގެ އެމްޑީޕީ މެންބަރުން ތިއްބެވެ. ނަމަވެސް، އަހަރެއް ފަހުން މަންޒަރު ވަނީ މުޅީން ބަދަލުވެފަ އެވެ. އެ ހުރިހާ ސަރަހައްދެއްވެސް ހޮނިހިރު ދުވަހު ކާމިޔާބުކުރެއްވީ ރައީސް ސޯލިހެވެ.

އަހަރެއްގެ ތެރޭގައި ނަޝީދަށް ގެއްލުނު ސަރަހައްދުތައް:

މާލެ ސިޓީ

ވޭތުވެދިޔަ އަހަރުގެ ޗެއާޕާސަން އިންތިހާބުގައި މާލެ ސިޓީއިން ފައްޔާޒަށް ލިބިލެއްވީ 48 އިންސައްތައިގެ ވޯޓެވެ. އިމްތިޔާޒު އެ އިންތިހާބުގައި މާލޭގެ މެޖޯރިޓީ ނެގީ 52 އިންސައްތަ ވޯޓާއެކު އެވެ.

ނަމަވެސް، ހޮނިހިރު ދުވަހުގެ އިންތިހާބުގައި އެ މެޖޯރިޓީ ގެއްލި ނަޝީދަށް މާލެއިން ލިބުނީ 49 އިންސައްތަ ވޯޓެވެ. ކެމްޕޭން ތެރޭގައި ނަޝީދާއެކު ގަދަކޮށް އޮތް ސިޓީ ކަމަށް ވިދާޅުވި މާލެ ސިޓީ ރައީސް ސޯލިހު ކާމިޔާބު ކުރެއްވީ 51 އިންސައްތަ ވޯޓާއެކު އެވެ.

ފުވައްމުލަކު ސިޓީ

ނަޝީދަށް ދެން ރާއްޖޭގައި އެންމެ ތާއީދު ބޮޑު އެއް ސިޓީގެ ގޮތުގައި އަބަދުވެސް ފެނުނު ފުވައްމުލަކުން ވެސް މިފަހަރު އެމަނިކުފާނަށް ކާމިޔާބީއެއް ލިބިވަޑައިގެންފައި ނުވެ އެވެ. އެގޮތުންނ ހޮނިހިރު ދުވަހުގެ ވޯޓުގައި ރައީސް ސޯލިހަށް 51 އިންސައްތަ ލިބިވަޑައިގެންނެވިއިރު ނަޝީދަށް ލިބިވަޑައިގަތީ 49 އިންސައްތަ އެވެ. މާލެއިން ލިބުނު ތާއީދާ އެއްވަރަށް ފުވައްމުލަކުން ވެސް މިފަހަރު ރައީސް ސޯލިހަށް ތާއީދު ލިބިވަޑައިގަތެވެ.

ނަމަވެސް ޗެއާޕާސަން އިންތިހާބުގައި ނަޝީދުގެ ފެކްޝަނުން ފުވައްމުލަށް ކާމިޔާބުކުރީ މިފަހަރު ރައީސް ސޯލިހަށް ލިބިވަޑައިގެން އިންސައްތައިންނެވެ.

ދ. އަތޮޅު

ޗެއާޕާސަން އިންތިހާބުގައި ނަޝީދުގެ ފެކްޝަނުން ކާމިޔާބުކުރެއްވީ ވަރަަށް ކުޑަ ފަރަގަކުންނެވެ. 51 އިންސައްތައިން އެ އިންތިހާބު ކާމިޔާބު ކުރިނަމަވެސް ނަޝީދު ވަނީ މި ފަހަރުގެ ކެމްޕޭނުގައި ވެސް އެ އަތޮޅަށް ވަޑައިގެން ކެމްޕޭނު ކުރައްވާފަ އެވެ. ތާއީދު އިތުރުކުރައްވަން ގިނަ މަސައްކަތްތަކެއް ކުރެއްވި އެވެ.

ނަމަވެސް ނަޝީދަށް ހޮނިހިރު ދުވަހު ދ. އަތޮޅުން ލިބުނީ ވަރަށްވެސް ބޮޑު ނާކާމިޔާބީއެކެވެ، އެގޮތުން އަހަރެއް ކުރިން 51 އިންސައްތައިގައި އޮތް ތާއީދު ބަދަލުކުރައްވާ ރައީސް ސޯލިހު އެ އަތޮޅު ކާމިޔާބު ކުރެއްވީ 60 އިންސައްތަ އިންނެވެ.

ވ. އަތޮޅު

ޗެއާޕާސަން އިންތިހާބުގައި ނަޝީދުގެ ފެކްޝަނަށް އެންމެ ބޮޑުު ކާމިޔާބީއެއް ލިބުނީ ވ. އަތޮޅުންނެވެ. އެގޮތުން އެ އިންތިހާބުގައި އިމްތިޔާޒަށް ލިބިލެއްވީ 57 އިންސައްތަ އެވެ.

ނަޝީދަށް ވާވުގައި އޮތް ބޮޑު ތާއީދުގެ ފަހަތުގައި ހުންނެވީ އެ އަތޮޅު ކައުންސިލްގެ ރައީސް ޝުޖާއު އަލީ އެވެ.

ނަމަވެސް، ހޮނިހިރު ދުވަހުގެ ނަތީޖާއިން އަނެއްކާވެސް ފެނިގެންދިޔައީ އަހަރެއްގެ ތެރޭގައި އެ އަތޮޅުގެ ތާއީދުވެސް ނަޝީދަށް ގެއްލުނު ތަނެވެ.

ޕްރައިމަރީގައި ރައީސް ސޯލިހު ވ. އަތޮޅު ކާމިޔާބު ކުރެއްވީ 59 އިންސައްތަ ކާމިޔާބުކުރައްވައިގެންނެވެ.

އއ. އަތޮޅު

އއ. އަތޮޅަކީވެސް ނަޝީދަށް ތާއީދު ބޮޑުކަމަށް ފާހަގަކުރެވުނު އަތޮޅެކެވެ. އެގޮތުން ޗެއާޕާސަން އިންތިހާބުގައި ނަޝީދުގެ ފެކްޝަނުން އއ. އަތޮޅު ކާމިޔާބުކުރީ 52 އިންސައްތަ ވޯޓުންނެވެ.

ނަމަވެސް، އެ އަތޮޅުވެސް މުޅީން ބަދަލުކުރައްވާ ރައީސް ސޯލިހު ހޮނިހިރު ދުވަހުގެ އިންތިހާބު ކާމިޔާބުކުރެއްވީ 58 އިންސައްތައިންނެވެ.