އިދިކޮޅު ޕީޕީއެމް/ޕީއެންސީގެ ސަޕޯޓަރުން ރޭ މާލޭގައި މުޒާހަރާކުރަމުން ދަނިކޮށް، ބަޔަކު ގޮސް އެ މީހުނާ ދިމާއަށް ކަޅުތެޔޮ ޖަަހައިފި އެވެ.
ޕީޕީއެމްގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީން ޖަލަށްލީ ފަހުން، އެމަނިކުފާނާއި ޕީޕީއެމްގެ ސަޕޯޓަރުން ގެންދަނީ އެމަނިކުފާނު މިނިވަންކުރުމަށް ގޮވާލައި މާލޭގައި ސިލްސިލާކޮށް ކޮންމެ ރެއަކު ވެސް މުޒާހަރާ ކުރަމުންނެވެ.
ރޭ ވެސް އިދިކޮޅު ސަޕޯޓަރުން މާލޭގެ މަގުތަކުގައި ހިނގުމަށް ފަހު، މުޒާހަރާ ނިންމާލީ ބޮޑުތަކުރުފާނު މަގުގެ ހެންވޭރު ކޮޅުގައި ހުންނަ އެ ޕާޓީގެ އޮފީސް ކައިރިންނެވެ. ޕީޕީއެމް އޮފީސް ކައިރީ ސަޕޯޓަަރުން ތިއްބައި ބަޔަކު ގޮސް ސަޕޯޓަރުންނާ ދިމާއަށް ކަޅުތެޔޮ ޖަހާފައިވެ އެވެ.
"މިއަދުގެ ވަގުތެއްގައި އެ މައްސަލަ ފުލުހަށް ހުށަހަޅާނަން،" ޕީޕީއެމް/ޕީއެންސީގެ ތަރުޖަމާނު ހީނާ ވަލީދު "އަދަދު" ނޫހަށް ވިދާޅުވި އެވެ.
ރައީސް ޔާމީން 11 އަހަރުގެ މުއްދަތަކަށް ޖަލަށް ލުމަށް ކްރިމިނަލް ކޯޓުން ހުކުމް ކުރީ މިދިޔަ އަހަރުގެ ޑިސެމްބަރު މަހުގެ 25 ވަނަ ދުވަހުގަ އެވެ. އެއީ އެމަނިކުފާނުގެ ވެރިކަމުގައި ހިނގި އެމްއެމްޕީއާރުސީގެ ބޮޑު ހިޔާނާތުގެ ތެރެއިން، ވ. އާރަށް ކުއްޔަށް ދޫކުރުމުގައި 1.1 މިލިއަން ޑޮލަރުގެ ރިޝްވަތު ނަންގަވައި އެ ފައިސާ ލޯންޑަ ކުރެއްވި ކަން ސާބިތުވާ ކަމަށް އެ ކޯޓުން ކަނޑައެޅުމަށް ފަހުގަ އެވެ.
އެ ހުކުމް ހައި ކޯޓުގައި އިސްތިއުނާފް ކުރުމަށް ޔާމީންގެ ވަކީލުން މަސައްކަތް ކުރައްވަމުން ގެންދަވާއިރު، ރ. ފުއްގިރި ކުއްޔަށް ދޫކުރުމުގައި ހިނގި ކަމަށް ބުނާ ހިޔާނާތުގެ މައްސަލާގައި ވެސް އެމަނިކުފާނުގެ މައްޗަށް ދައުވާކޮށް އެ ޝަރީއަތް ކްރިމިނަލް ކޯޓުގައި ހިނގަމުން އެބަދެ އެވެ. ޔާމީންގެ މައްޗަށް އިއްވާފައިވާ ޖަލު ހުކުމް ދެމިއޮތްހާ ހިނދަކު އެމަނިކުފާނަށް ރިޔާސީ އިންތިހާބުގައި ވާދައެއް ނުކުރެވޭނެ އެވެ.
