ނިމިދިޔަ 2022 ވަނަ އަހަރުގެ ފަހު ހަ މަސް ދުވަހު ކުޑަކުދިންނާ ގުޅުން ހުރި 900 އަށްވުރެ ގިނަ މައްސަލަތައް ހުށަހަޅާފައިވާ ކަމަށް ތަފާސްހިސާބުތަކުން ދައްކައިފި އެވެ.
ޗައިލްޑް އެންޑް ފެމިލީ ޕްރޮޓެކްޝަން ސާވިސްއިން އާންމު ކުރި ތަފާސްހިސާބުތަކުން ދައްކާ ގޮތުން މިދިޔަ އަހަރުގެ ފަހު ހަ މަސް ދުވަހު މުޅި ރާއްޖެއިން ހުށަހަޅާފައި ވަނީ ކުޑަކުދިންނާ ގުޅުންހުރި ޖުމްލަ 933 މައްސަލަ އެވެ.
ރިޕޯޓުކުރި މައްސަލަތަކުގެ ތެރެއިިން 429 މައްސަލައަކީ މާލެ ސަރަހައްދުން ހުށަހަޅާފައިވާ މައްސަލަތަކަށް ވާއިރު، މާލޭގެ އިތުރުން އެންމެ ގިނަ މައްސަލަ ހުށަހެޅީ އައްޑުއިންނެވެ. އައްޑޫ ސިޓީން ހުށަހެޅީ 101 މައްސަލަ އެވެ. އަދި ހދ. އަތޮޅުން 54 މައްސަލަ ރިޕޯޓުކުރިއިރު، ކ. އަތޮޅުން 38 މައްސަލަ ރިޕޯޓުކޮށްފައި ވެއެވެ.
މި ހަ މަސް ތެރޭގައި އެންމެ މަދުން މައްސަލަ ރިޕޯޓުކުރީ ވ. އަތޮޅާއި މ. އަތޮޅުގެ އިތުރުން ދ. އަތޮޅުންނެވެ. އެގޮތުން ވ. އަތޮޅުން އެއް މައްސަލަ، މ. އަތޮޅާއި ދ. އަތޮޅުން ތިން މައްސަލަ ރިޕޯޓުކޮށްފައި ވެއެވެ. މި ތިން އަތޮޅަކީ 2022 ވަނަ އަހަރުގެ ފުރަތަމަ ހަ މަހު ވެސް އެންމެ މަދުން މައްސަލަތައް ރިިޕޯޓުކުރި ތިން އަތޮޅެވެ.
ރާއްޖޭގައި އެންމެ ގިނައިން ރިޕޯޓުކުރާ ކުޑަކުދިންނާ ގުޅޭ މައްސަލަތަކުގެ ތެރޭގައި ހިމެނެނީ ޖިންސީ ގޯނާގެ މައްސަލަތަކާއި، ޖިސްމާނީ އަދި ނަފްސާނީ އަނިޔާ އަދި ގެވެށި އަނިޔާ ކުރުމުގެ މައްސަލަތަކުގެ އިތުރުން އިހުމާލުވުމުގެ މައްސަލަތަކެވެ.
2022 ވަނަ އަހަރުގެ ފަހު ހަ މަހު ވެސް އެންމެ ގިނައިން ހުށަހެޅީ ކުޑަކުދިންނަށް އަނިޔާ ކުރުމުގެ މައްސަލަތަކެވެ. އެ ބާވަތުގެ ޖުމްލަ 579 މައްސަލަ ސީއެފްޕީއެސްއަށް ހުށަހަޅާފައިވާއިރު، 168 އާއިލީ މައްސަލަ އަދި 91 އަހުލާގީ މައްސަލަ ވެސް ހުށަހެޅި އެވެ. މި މުއްދަތުގައި އިހުމާލުގެ މައްސަލަތަކުގެ ގޮތުގައި ހުށަހެޅީ، 158 މައްސަލަ އެވެ.
