ރާއްޖޭގެ ގައުމީ އެއާލައިން މޯލްޑިވިއަން އިން އަލަށް ގެނައި އޭޓީއާރު މަރުކާގެ ފުރަތަމަ ބޯޓުގެ ފުރަތަމަ ދަތުރު މިއަދު މެންދުރުފަހު އައްޑޫ ސިޓީގެ ގަން އިންޓަނޭޝަނަލް އެއާޕޯޓަށް ކުރުމަށް ހަމަޖެހިފައިވާ ކަމަށް އެ އެއާލައިން އިން ބުނެފި އެވެ.
މޯލްޑިވިއަން އިން އިއްޔެ ކުރި ޓުވީޓެއްގައި ބުނެފައިވަނީ އޭޓީއާރު 600-72 ގެ ފުރަތަމަ ދަތުރު ކުރުމަށް ހަމަޖެހިފައިވަނީ މިއަދު 3:40 ގައި ވެލާނާ އިންޓަނޭޝަނަލް އެއާޕޯޓުން އައްޑޫ ގަން އިންޓަނޭޝަނަލް އެއާޕޯޓަށް ކަމަށެވެ.
އެކަމާ ގުޅިގެން "އަދަދު" އަށް މައުލޫމާތު ދެމުން މޯލްޑިވިއަންގެ މީޑިއާ އޮފިޝަލް އަހުމަދު މުޝްއިލް ވިދާޅުވީ އޭޓީއާރުގެ ދަތުރުތަކާއެކު މިހާރު މަތިވެފައިވާ ޑިމާންޑާ އެއްވަރަށް ހިދުމަތް ދިނުމުގައި އެ އެއާލައިންއަށް ފަސޭހަވެގެންދާނެ ކަމަށެވެ. އަދި ދެ ވަނަ އަށް ގެނައި އޭޓީއާރު މަރުކާގެ ބޯޓު އެތެރޭގެ އުދުހުންތަކަށް ހަފުތާއެއްގެ ތެރޭގައި ނެރެވޭނެ ކަމަށް ވެސް ވިދާޅުވި އެވެ.
އޭގެ އިތުރުން، މި ދެ ބޯޓު ވެސް އެތެރޭގެ އުދުހުންތަކުގައި ދަތުރުކުރާ ހުރިހާ މަންޒިލަކަށް ދަތުރުކުރާނެ ކަމަށާއި ނަމަވެސް ބޮޑަށް އިސްކަންދޭނީ ޑިމާންޑު ބޮޑު މަންޒިލުތަކަށް ދަތުރު ކުރުމަށް ކަމަށް ވެސް މުޝްއިލް ވިދާޅުވި އެވެ. އަދި އަލަށް ގެނައި ދެ ބޯޓާއެކު ޑިމާންޑާ އެއްވަރަށް ދަތުރުގެ ޝެޑިއުލްތަކަށް ގެންނަން ޖެހޭ ބަދަލުތައް ދެނެގަތުމަށް ދިރާސާއެއް ކުރަމުންދާ ކަމަށް ވެސް ވިދާޅުވި އެވެ.
އެތެރޭގެ އުދުހުންތަކުގެ ޑިމާންޑު ބޮޑުވެ މޯލްޑިވިއަންއިން އަމިއްލަ ދެ ބޯޓު ގެނެސްފައިވަނީ މި ޖެނުއަރީ 4، ގަ އެވެ. އަލަށް ގެނައި އޭޓީއާރު މަރުކާގެ ބޯޓުތަކަކީ މޯލްޑިވިއަނުން މިހާރު ބޭނުން ކުރަމުން އަންނަ ޑޭޝް-8 މަރުކާގެ ބޯޓުތަކަށް ވުރެ ޖާގައިގެ ގޮތުންވެސް ބޮޑު ތެލާއި މެއިންޓެނެންސް ހަރަދު ކުޑަ ބޯޓުތަކެކެވެ.
"ކުރީގެ އެއާކުރާފްޓު ތަކަކީ 20 އަހަރަށް ވުރެވެސް ގިނަ ދުވަސްވެފައި ހުރި އެއާކުރާފްޓުތަކެއް، އަޅުގަނޑުމެންގެ ބޯޓުތަކުގެ މެއިންޓެނެންސް މައްސަލަތައް، ޓެކްނިކަލް މައްސަލަތައް ދިމާވެގެން ހަމަ ފުދޭވަރަކަށް ޝެޑިއުލް އަށް ވެސް ބުރޫ އަރާ،" އައު ބޯޓުތައް ގެނައި ދުވަހު މީޑިއާތަކާ ވާހަކަދައްކަވަމުން މޯލްޑިވިއަންގެ ޑެޕިއުޓީ މެނޭޖިން ޑިރެކްޓަރު، އައިޝަތު ޖެނިފާ ވިދާޅުވި އެވެ.
