މަނީ ލޯންޑަރިންގެ ކުށާއި ރިޝްވަތު ދިނުމުގެ ކުށް ސާބިތުވެ 11 އަހަރުގެ ޖަލު ހުކުމެއް މާފުށީ ޖަލުގައި ތަންފީޒު ކުރައްވަމުން ގެންދަވާ އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީން ހުންނެވީ "ފިސާރި ގަދަކޮށް" ކަމަށާއި އެމަނިކުފާނުގެ މައުސޫމުކަން ސާބިތު ކޮށްދެއްވާނެ ކަމަށް އިދިކޮޅު ކޯލިޝަނުގެ ވަގުތީ ލީޑަރު އަދި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
އިއްޔެ އިދިކޮޅުގެ ލީޑާޝިޕުގެ ބޭފުޅުން ވަނީ މާފުށީ ޖަލުގައި ޔާމީނާ ބައްދަލުކުރައްވާފަ އެވެ. އެ ބައްދަލުކުރެއްވުމުގައި އަބްދުއްރަހީމްގެ އިތުރުން، މާލޭގެ މޭޔަރު ޑރ. މުހައްމަދު މުއިއްޒު އާއި އެ ކޯލިޝަނުގެ ބައެއް މަޖިލިސް މެމްބަރުން ވެސް ބައިވެރިވެވަޑައިގަތެވެ.
ޔާމީން ޖަލަށްލާފައިވަނީ އެމަނިކުފާނުގެ ވެރިކަމުގައި ހިނގި އެމްއެމްޕީއާރުސީ ބޮޑު ހިޔާނާތުގެ ތެރެއިން، ވ. އާރަށް ކުއްޔަށް ދޫކުރުމުގައި 1.1 މިލިއަން ޑޮލަރު ރިޝްވަތުގެ ގޮތުގައި ނަންގަވައި، އެ ފައިސާ ލޯންޑަކުރެއްވި ކަމަށް ސާބިތުވުމުންނެވެ.
"ރައީސް ޔާމީނާ މިއަދު ބައްދަލުވި. ހުންނެވީ ފިސާރި ގަދަކޮށް. ވިދާޅުވީ އަނިޔާވެރިކަމުގެ ކުރިމަތީގައި ކުޑަ ކަކޫ ނުޖައްސަވާނެ ކަމަށް. އަޅުވެތިކަމަށް ބޯ ނުލައްބަވާނެ ކަމަށް. މައުސޫމްކަން ސާބިތުކޮށް ދެއްވާނެ ކަމަށް. ރައްޔިތުން މާޔޫސްނުވެ ގަދަކޮށް ތިއްބެވުމަށް،" އެ ބައްދަލުކުރެއްވުމަށްފަހު ކުރެއްވި ޓްވީޓެއްގައި އަބްދުއްރަހީމް ވިދާޅުވެފައިވެ އެވެ.
އެ ހުކުމާ ދެކޮޅަށް އިދިކޮޅުން އަންނަނީ "ހަރާމް ހުކުމް" ގެ ނަމުގައި ސިލްސިލާކޮށް އިހުތިޖާޖުތައް ބާއްވަމުންނެވެ.
އެގޮތުން، ރޭ ބޭއްވި ހަރަކާތުގައި އަބްދުއްރަހީމް ވަނީ އިއްޔެ ޖަލުގައި ޔާމީނާ އެކު ބޭއްވި ބައްދަލުވުމުގައި ވެސް ވެރިކަމަށް ވަޑައިގެން ގާނޫނު ތަންފީޒު ކުރައްވާނެ ކަމަށް ޔާމީނު ވިދާޅުވިކަން ހާމަކުރައްވާފަ އެވެ. އަދި، މި ސަރުކާރުން ގާނޫނަށް ހިލާފަށް ކޮށްފައި ހުރި ކަންކަން ބައްލަވާނެ ކަމަށް ޔާމީނު ވިދާޅުވި ކަމަށް ވެސް އޭނާ ފާހަގަކުރެއްވި އެވެ.
"ވެރިކަމަށް ވަޑައިގެން ގާނޫނު ރަނގަޅަށް ތަންފީޒުކުރައްވާނެ ވާހަކަ ތަކުރާރު ކުރެއްވެވި. ގާނޫނާ ހިލާފަށް ކޮށްފަ ހުރި ކަންތައްތައް ބައްލަވާނެ ވާހަކަ ވިދާޅުވި. ގާނޫނީ އިމުގެ ބޭރުން ކަމެއް ހިނގާފަ އޮތިއްޔާ އެމީހަކާ ދޭތެރޭ ގާނޫނު އިމުގެ ތެރެއިން ކުރައްވާ ކޮންމެ ކަމެއް ކުރައްވާނެ ކަމަށް ވިދާޅުވީ،" އަބްދުއްރަހީމް ވިދާޅުވި އެވެ.
އަދި، ވެރިކަން ލިބެން ޖެހޭނީ ޔާމީނަށް ކަމަށާއި، އެމަނިކުފާނަށް ވެރިކަން ލިބިގެން ނޫނީ ރާއްޖޭގައި ގާއިމުވެގެން ތިބި ކަމަށް އިދިކޮޅުން ބުނާ އިންޑިއާ ސިފައިން ނުބޭލޭނެ ކަމަށް ވެސް އޭނާ ވިދާޅުވި އެވެ.
ޔާމީން މިނިވަންކުރަން ގޮވާލައި، އިދިކޮޅުން ގިނަ ހަރަކާތްތަކެއް ހިންގާއިރު، ރ. ފުއްގިރި ކުއްޔަށް ދިނުމުގައި ހިނގި ކަމަށް ބުނާ ހިޔާނާތުގެ މައްސަލާގައި ވެސް ކްރިމިނަލް ކޯޓުގައި ޝަރީއަތް ހިނގަމުން އެބަ ދެ އެވެ.
ޔާމީން ޖަލުގައި ހުންނެވި ނަމަވެސް ޕާޓީގެ ލީޑާޝިޕުން ވަނީ ބައެއް އަތޮޅުތަކުގައި ކެމްޕޭން ހަރަކާތްތައް ވެސް ހިންގަވައިފަ އެވެ. އަންނަ މަހު ފަށާ ކޮންފެރެންސްގައި ވެސް ޕާޓީގެ ލީޑާޝިޕާއި، ޕާލިމެންޓްރީ ގްރޫޕާއި، ސެނެޓް މެންބަރުން ހިމެނޭހެން 1،500 މެންބަރުން ބައިވެރިވާނެ އެވެ.
