ދިވެހިން ބުދަށް އަޅުކަން ކުރި ޒަމާނުގައި އ. ތޮއްޑޫގައި ބިނާކޮށްފައި ހުރި ބައެއް ތަކެތީގެ އާސާރުތައް ހުރި އެ ރަށު "ދާގަބާ ސަރަހައްދު" މިޔުޒިޔަމެއްގެ ގޮތުގައި ތަރައްގީ ކުރުމަށް ނިންމައި އެ މަސައްކަތް ކުރާނެ ބަޔަކު ހޯދަން އިއުލާނުކޮށްފި އެވެ.
ދާގަބާ ސަރަހައްދު ސައިޓް މިއުޒިއަމެއްގެ ގޮތަށް ތަރައްގީކުރުމަށް ބޭނުންވާ ކޮންސެޕްޓް ޑިޒައިން އަދި ތަފްސީލީ ކުރެހުންތައް ތައްޔާރު ކޮށްދޭނެ ފަރާތެއް ހޯދުމަށް މީގެ ޖުލައި، 2022 ގައި ވެސް ސަރުކާރުން އޮތީ އިއުލާނެއްކޮށްފަ އެވެ. މިޔުޒިޔަމް އަޅަން އަލުން އިއުލާނު ކުރީ މިދިޔަ ބުރާސްފަތި ދުވަހެވެ.
ސަގާފީ ތަރިކަ ރައްކާތެރިކުރުމާ ބެހޭ މަރުކަޒުން ކުރި އިއުލާނުގައި ބުނީ ކުރިން ކުރި އިއުލާންގައިވާ މަސައްކަތުގެ ހުރިހާ މަރުހަލާއެއް މިދިޔަ އަހަރު ކޮށް ނިންމާނުލެވޭނެތީ، އެ އިޢުލާން ބާތިލުކޮށް އަލުން އެމަސައްކަތް ކުރުމަށް އަލުން އިއުލާން ކޮށްފައިވާ ކަމަށެވެ.
ހމާޔަތްކޮށްފައި އޮންނަ ތޮއްޑޫ ދާގަބާ ސަރަހައްދަކީ ސްޓޫޕާއެއް ނުވަތަ އެ ފެންވަރުގެ އެއްޗެއް ބިނާކޮށްފައިވާ ސަރަހައްދެއް ކަމަށް ބެލެވެ އެވެ. ސްޓޫޕާ ބިނާ ކުރަނީ ގަބުރެއް ވަޅުލުމަށް ނުވަތަ ބުދު ދީނުގެ މުހިންމު އެއްޗެއް ވަޅުލާ ނުވަތަ ފޮރުވާ ތަނުގަ އެވެ.
ތޮއްޑޫ ދާގަބާ ސަރަހައްދަށް އެ ރަށު މީހުން ކުރިން ކިޔައި އުޅުނީ ގާފުނި ސަރަހައްދު ކަމަށްވެ އެވެ. ސަރުކާރުން އެ ސަރަހައްދު 1958 ވަނަ އަހަރު އެކްސްކަވޭޓް ކުރަން ޓީމެއް ފޮނުވި އެވެ. އެތަން ކޮނުމަށްފަހު ފެނުނު ބިނާގެ ފޮޓޯތައް ސްރީ ލަންކާއަށް ފޮނުވައިގެން އެއިރު ދިރާސާ ވެސް ކުރި އެވެ.
