ވިލިމާލޭގައި އިލެކްޓްރޯނިކް ބަގީގެ ހިދުމަތް ދިނުމަށް މާލޭ ސިޓީ ކައުންސިލުން ތައްޔާރުވެފައި އޮއްވައި، އެ ކައުންސިލުގެ މޭޔަރު ޑރ. މުހައްމަދު މުއިއްޒު އިއުތިރާޒު ކުރައްވަމުން ގެންދަވަނިކޮށް ބަހުގެ ހިދުމަތް ފެށުމަށް އެމްޓީސީސީން އެ ރަށަށް ކަރަންޓު ބަސްތަކެއް އެތެރެކޮށްފި އެވެ.
އެމްޓީސީސީން ވިލިމާލޭގައި ބަހުގެ ހިދުމަތް މި ފަށަނީ، ކުރިން ވިލިމާލޭގައި ދެމުން އައި ބަގީގެ ހިދުމަތް މިދިޔަ އަހަރުގެ އޮގަސްޓުން ފެށިގެން ހުއްޓިފައި އޮވެ، އެހިދުމަތް އަލުން ފެށުމަށް މާލޭ ސިޓީ ކައުންސިލުން ތައްޔާރުވަމުން އަންނަނިކޮށެވެ.
އެކަމަކު ސިޓީ ކައުންސިލުން އެކަން އިއުލާނު ކުރި ފަހުން ވިލިމާލޭގައި މިނީބަހުގެ ހިދުމަތް އަންނަ މަހު ތައާރަފު ކުރުމަށް މަސައްކަތް ކުރާކަން ސަރުކާރުން ވެސް ވަނީ އިއުލާނުކޮށްފަ އެވެ.
"އަޅުގަނޑުމެންގެ އުންމީދަކީ މިހިނގާ ޖަނަވަރީ މަހުގެ 20 ވަނަ ދުވަހު ވިލިމާލޭގައި ބަހުގެ ހިދުމަތް ފެށުންކަމުގައި އުފަލާއިއެކު ދަންނަވަން. އަދި އާރްޓީއެލް ވިލިމާލެ ބަހުގެ ހިދުމަތާއި ގުޅޭ ރޫޓް މެޕާއި ޝެޑިއުލްގެ މައުލޫމާތު މިކުންފުނިން ކުރިއަށްއޮތް ދުވަސްތަކުގައި ހާމަކުރާނެ ކަމުގައި ވެސް ދަންނަވަން،" އެމްޓީސީސީން ވިދާޅުވެ އެވެ.
ސަރުކާރުން ބުނެފައިވާ ގޮތުގައި ވިލިމާލޭގައި ބޭނުންކުރާނީ ތިމާވެއްޓާ ރައްޓެހި އެންމެ ފަހުގެ އިލެކްޓޯނިކް ބަހެވެ. އެ ބަސްތަކުގައި ޖުމްލަ 15 މީހުންނަށް އެއްފަހަރާ ދަތުރުކުރެވޭނެ ޖާގަ ހުންނާނެ ކަމަށް އެމްޓީސީސީން ހާމަކުރެ އެވެ.
އެމްޓީސީސީން ވިލިމާލެއަށް މިނީ ބަހުގެ ހިދުމަތް ދޭން ނިންމާފައިވާކަން އިއުލާންކުރުމާ ގުޅިގެން މާލޭ ސިޓީގެ މޭޔަރު ޑރ. މުހައްމަަދު މުއިއްޒު ނުރުހުން ފާޅުކޮށް ކުރައްވާ ވިދާޅުވީ، ވިލިމާލެއަށް ޕަބްލިކް ޓްރާންސްޕޯޓު ބަސްތަކެއް އަރުވަން ރައްޔިތުން ބޭނުން ނުވާ ކަމަށެވެ.
"ކައުންސިލް އިން ރައްޔިތުންގެ ވިސްނުމާ އެއްގޮތަށް ބަގީ ސާވިސް ފެށުމަށް ހުރިހާ ތައްޔާރީއެއްވެ ނިމިފައި އޮއްވައި ސަރުކާރުން މިކަން ކުރަން އުޅުމަކީ ލާމަރުކަޒީ ނިޒާމާ ބީރައްޓެހި ނާތަހުޒީބް އަމަލެއް،" ވިލިމާލެއަށް މިނީ ބަސް ތައާރަފްކުރުމާ ގުޅިގެން ނުރުހުން ފާޅުކޮށް ކުރެއްވި ޓުވީޓެއްގައި މުއިއްޒު ވިދާޅުވި އެވެ.
މުއިއްޒު އިތުރަށް މިއަދު ވިދާޅުވެފައި ވަނީ އެމްޓީސީސީން ވިލިމާލެއަށް ބަގީ އެތެރެ ކުރި މައްސަލަ ފުލުހުންނަށް ހުށަހަޅާނެ ކަމަށެވެ.
ރާއްޖޭގައި ފުޅާ ދާއިރާއެއްގައި ބަހުގެ ހިދުމަތްދޭ އެމްޓީސީސީން އިއްޔެ ނެރުނު ނޫސް ބަޔާނެއްގައި ބުނީ އިންޖީނުލީ އުޅަނދު ދުއްވުން އާންމުކޮށް މަނާ ވިލިމާލޭގައި ހިދުމަތް ދޭނީ ކުދި ސައިޒުގެ އިލެކްޓްރިކް ބަސް ބޭނުން ކޮށްގެން ކަމަށެވެ. މިގޮތުން 11 ގޮނޑީގެ އަދި ހަތަރު މީހުން ކޮޅަށް ތިބެވޭ، ހަ ބަސް ބޭނުން ކުރާނެ ކަމަށް އެމްޓީސީސީން ބުންނެވެ.
"އާރުޓީއެލް ވިލިމާލެ ބަހުގެ ހިދުމަތާއި ގުޅޭ ރޫޓް މެޕާއި ޝެޑިއުލްގެ މައުލޫމާތު މި ކުންފުނިން ކުރިއަށް އޮތް ދުވަސް ތަކުގައި ހާމަކުރާނެ،" ކަމަށް އެމްޓީސީސީގެ ބަޔާނުގައި ބުނެފައިވެ އެވެ.
