ޕީޕީއެމް/ޕީއެންސީގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީން މިނިވަންކުރުމަށް ގޮވާލާ ރޭ ބޭއްވި މުޒާހަރާގެ ތެރެއިން، އޭގައި ބައިވެރިވި އުމުރުން ދުވަސްވީ އަންހެނަކު ހައްޔަރުކުރަން ފުލުހުން އުޅުނު ގޮތާ މެދު ފާޑުކިޔުން އަމާޒުވެއްޖެ އެވެ.
ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަ ގޮތުގައި، ގައުމީ ދިދައެއް ހިފައިގެން ހުރި އުމުރުން ދުވަސްވީ އަންހެން މީހެއް ފަހަތުން ދެ ފުލުހެއް ދުވެފައިދާ ތަން ފެނެ އެވެ. އެ މީހާ ވެސް ދުވަމުން ދިޔައިރު، އޭނަ ފަހަތުން ދިޔަ ފުލުހުން ފަހަތުން ދުވެފައި ގޮސް އޭނާ ހައްޔަރުކުރެ އެވެ.
ފުލުހުން "އަދަދު" ނޫހަށް ބުނެފައިވަނީ ރޭ މުޒާހަރާގެ ތެރެއިން 12 މީހަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށާއި، މިއަދުގެ ވަގުތެއްގައި އެ އެންމެން ވެސް މިހާރު ދޫކޮށްލާފައިވާ ކަމަށެވެ. އޭގެ ތެރޭގައި މި އުމުރުން ދުވަސްވީ އަންހެން މީހާ ވެސް ހިމެނެ އެވެ.
ސޯޝަލް މީޑިއާ ޕްލެޓްފޯމް ޓްވިޓާގައި އެ ވީޑިއޯ ހިއްސާކޮށް ގިނަ ބަޔަކު ވަނީ ފުލުހުން އެ މީހަކު ހައްޔަރުކުރަން އުޅުނު ގޮތާ މެދު ފާޑުކިޔައިފަ އެވެ. އޭގެ ތެރޭގައި ރައްޔިތުންގެ މަޖިލީހުގެ ބައެއް މެންބަރުންނާއި، ގާނޫނީ ބައެއް ވަކީލުން ވެސް ހިމެނެ އެވެ.
ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒް ފަހްމީ (އިންތި) އެ ވީޑިއޯއާއެކު ކުރެއްވި ޓްވީޓެއްގައި ލިޔުއްވާފައިވަނީ "ފަހަތުން ދުވެގޮސް ޝުއޫރު ފާޅުކުރާ އުމުރުން ދުވަސްވީ އަންހެން ބޭފުޅުން ހިފާ ހައްޔަރުކުރަންޖެހޭ ސަބަބަކީ ކޮބާ؟" ކަމަށެވެ.
ރައްޔިތުންގެ މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ކުރެއްވި ޓްވީޓެއްގައި ލިޔުއްވާފައިވަނީ "ބޮޑެތި ކުށްކުރާ މީހުންނާ، މީހުން މަރަން ފަސްނުޖެހޭ ލިސްޓް މީހުންނާމެދު ރިއެކްޓް ކޮށް ނުލެވުނަސް، ޝުއޫރެއް ފާޅުކޮށްލާ މީހާއާ ޖެހުނީމާ ނިކަން ބާރަށް ރިއެކްޓް ކުރެވޭ ދޯ" ކަމަށެވެ.
ގާނޫނީ ވަކީލު މަރިޔަމް ޝުނާނާ ކުރެއްވި ޓްވީޓެއްގައި ވިދާޅުވީ ފުލުހުންގެ ފަރާތުން ފެނުނީ ވަރަށް "ރަހުމުކުޑަ" އަމަލެއް ކަމަށެވެ. އަދި ފުލުހުންގެ އަމަލުތައް އިސްލާހުކުރުމުގެ ގޮތުން، އިތުރު ތަމްރީންތައް ދިނުމަށް ވެސް ޝުނާނާ ކުރެއްވި ޓްވީޓްގައި ގޮވާލައްވާފައިވެ އެވެ.
ކުރީގެ ފޮރިން މިނިސްޓަރު އަހުމަދު ޝަހީދު ވެސް ވީޑިއޯއާއެކު ޓްވީޓެއް ކުރެއްވި އެވެ. އޭނާ ވިދާޅުވީ ގާނޫނު އަސާސީން ދިވެހިންނަށް ލިބިފައިވާ ޝުއޫރު ފާޅުކުރުމުގެ ހައްގު ބޭނުންކުރަން ހުރި އަންހެނަކު، ކުށްވެރިއަކު ހައްޔަރުކުރަން އުޅުމުން އެއީ ލަދުވެތި ކަމެއް ކަމަށެވެ.
"މިފަދަ ގޮތަކަށް އަމަލުކުރާ ފުލުސް އޮފިސަރުންނާ މެދު ފިޔަވަޅު އަޅައި، ފުލުހުންގެ މުއައްސަސާއިން ރައްޔިތުންނަށް ޖަވާބުދާރީވާން ޖެހޭ،" ޝަހީދު ކުރެއްވި ޓްވީޓެއްގައިވެ އެވެ.
ފާޑުކިޔުންތައް އަމާޒުވެފައިވަނިކޮށް ޕޮލިސް ކޮމިޝަނަރު މުހައްމަދު ހަމީދު ވެސް ޓްވީޓެއް ކުރެއްވި އެވެ. އޭނާ ކުރެއްވި ޓްވީޓްގައި ވިދާޅުވީ މާލޭގައި ރޭ ކުރި މުޒާހަރާގެ ތެރެއިން އުމުރުން ދުވަސްވީ މީހަކު ހިފެހެއްޓުމަށް ފުލުހުން އަމަލުކޮށްފައިވާ ގޮތުން ކަންބޮޑުވުން އެބަހުރި ކަމަށެވެ.
"އެ މައްސަލަ ބަލާނަން،" ހަމީދު ކުރެއްވި ޓްވީޓްގައި ލިޔުއްވާފައިވެ އެވެ.
އިދިކޮޅު ލީޑަރު ޔާމީން 11 އަހަރުގެ މުއްދަތަކަށް ޖަލަށް ލުމަށް ހުކުމްކޮށްފައިވަނީ އެމަނިކުފާނުގެ ވެރިކަމުގައި، ހިނގި އެމްއެމްޕީއާރުސީ ބޮޑު ހިޔާނާތުގެ ތެރެއިން ވ. އާރަށް ކުއްޔަށް ދިނުމުގައި ރިޝްވަތު ނަންގަވައި އެ ފައިސާ ލޯންޑަކުރެއްވި ކަމަށް ސާބިތުވާ ކަމަށް ކްރިމިނަލް ކޯޓުން ކަނޑައެޅުމަށް ފަހުގަ އެވެ.
އޭގެ ފަހުން ކޮންމެ ރެއަކު ވެސް ޔާމީންގެ ސަޕޯޓަރުން ދަނީ މާލޭގައި މުޒާހަރާ ކުރަމުންނެވެ. މުޒާހަރާގެ ތެރެއިން، ފުލުހުންގެ އަމުރަށް ނުކިޔަމަންތެރިވާ ކަމަށް ބުނެ ކޮންމެ ރެއަކު ވެސް ބަޔަކު ހައްޔަރުކޮށް، ފަހުން އެ ބަޔަކު ދޫކޮށްލަ އެވެ.
ރައީސް ޔާމީނުގެ ވެރިކަމުގައި ހިނގި އެންމެ ބޮޑު އެއްވުން ކަމަށްވާ މެެއި ޑޭ، 2015، އަށް ފަހު ފާސް ކުރި އެއްވެ އުޅުނު ހަނި ކުރުމުގެ އިސްލާހު މި ސަރުކާރުން ވެސް ދަނީ ދަމަހައްޓަމުންނެވެ. އެ ގޮތުން ކުރިން ހުއްދަ ހޯދުމަކާ ނުލައި މާލޭގެ ކާނިވާ ސަރަހައްދަށް ނޫނީ އެއްވުމަކީ އަދިވެސް ގާނޫނުން މަނާ ކަމެކެވެ.
