އެއްވެސް ހިންގުންތެރިކަމެއް ނެތި، ވަސީލަތްތައް ނެތް މިންވަރުން މި ސަރުކާރުން މަޝްރޫއުތައް ހިންގަން އުޅޭ ކަމަށް ވިދާޅުވެ އެމްޑީޕީ ޕްރައިމަރީގައި ވާދަކުރައްވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ފާޑުވިދާޅުވެއްޖެ އެވެ.
އެމްޑީޕީ ރިޔާސީ ޕްރައިމަރީގެ ކެމްޕެއިނަށް މިހާރު ފ. އަތޮޅަށް ކުރައްވަމުން ގެންދަވާ ދަތުރުފުޅުގައި އެ އަތޮޅު ބިލެއްދޫގައި ވާހަކަ ދައްކަވަމުން ނަޝީދު ވިދާޅުވީ ހުރިހާ ރަށެއްގައި މަޝްރޫއުތައް ފެށި ނަމަވެސް، ނިމޭތަން ނުފެންނަ ކަމަށެވެ.
"ބިލެއްދޫގައި [ނަރުދަމާގެ މަސައްކަތަށް] ހަތަރު އަހަރު ވަނީ، ކަކުނި ހަރު ކޮނެލަ ކޮނެލާ، މިކަމެއް ހިނގާކަށް ނެތް، ހުރިހާ ރަށެއްގައި [ހަމަ މިހެން]،" ނަރުދަމާއެއް ގިނަ ވެގެން ދެ މަސް ދުވަސް ތެރޭގައި ނިންމޭނެ ކަން ފާހަގަކުރައްވަމުން ނަޝީދު ވިދާޅުވި އެވެ.
ނަޝީދު ދެން ވިދާޅުވީ މަޝްރޫއުތައް "ސްލޯ ކަމަށް" ކުޅުދުއްފުށީ ކުދިން ބުނީ ރަނގަޅަށް ކަމަށާއި ސަރުކާރުގެ ދުވެލި ހުރީ "ފިނިހަކަ ދުވެލީގައި" ކަމަށެވެ.
މިކަން މިގޮތަށް ހިނގަނީ ކަންކަން ރާވާ ހިންގާނެ ގޮތުގެ އެއްވެސް ޝައުގެއް ރައީސް އިބްރާހިމް މުހައްމަދު ސޯލިހުގެ ނެތުމުން ކަމަށެވެ.
"މަސައްކަތްތައް އިންތިޒާމްކޮށްގެން ރޭވިގެން، ދައުލަތުގެ އާމްދަނީއަކީ ދައުލަތުގެ ހުރި އެސެޓަކީ ކޮބައިތޯ އެނގޭ، އެބަ އެނގޭ ރާއްޖޭގައި އޮތީ ކިތައް ހައިމާކުކަން، ހައިމާކު ދަތްގަނޑު ނެތް މިންވަރަށް ކީއްކުރަންތޯ ކޮންނަން ވިސްނަންވީ، ނުކޮނެވޭނެ،" ނަޝީދު ވިދާޅުވި އެވެ.
ސަރުކާރުގެ ކަންކަން ހިނގާ ގޮތަށް ވަރަށް ބޮޑަށް ފާޑުވިދާޅުވަމުން ނަޝީދު އިތުރަށް ވިދާޅުވީ ރަށެއްގައި މަޝްރޫއެއް ކުރިއަށް ދަނިކޮށް، އެހެން ދާއިރާއެއްގެ "ނުފޫޒުގަދަ" މަޖިލިސް މެންބަރަކު ވިދާޅުވުމުން އެހެން އެ ދާއިރާގައި އާ މަޝްރޫއެއް ފަށާ ކަމަށެވެ.
"މިތާނގަ އޮތް ހައިމާކު އެ ރަށަށް، މިތަނުގެ މަސައްކަތް ހުއްޓުނީ، މަސައްކަތެއް ހުއްޓޭ ކޮންމެ ފަހަރަކު އެ ގެއްލެނީ އެތައް އެެތައް މަހެއްގެ ހިންގުން،" ނަޝީދު ވިދާޅުވި އެވެ.
ރައްޔިތުންގެ މި ކަންބޮޑުވުންތަކަށް ހައްލު ގެނެސްދެވޭނީ އެމަނިކުފާނަށް ކަމަށް ވިދާޅުވެ، ޕްރައިމަރީގައި ވޯޓު ދެއްވުމަށް ނަޝިދު އެދިވަޑައިގެންނެވި އެވެ.
ޕާޓީގެ ރިޔާސީ ޕްރައިމަރީގައި ދެ ރައީސުން ވާދަކުރައްވާއިރު، ބަހުގެ ހަމަލާތަކާއި ފާޑުކިޔުންތައް ވަނީ އިތުރުވެފަ އެވެ.
ޖެނުއަރީ 28، ގައި ބާއްވާ ރިޔާސީ ޕްރައިމަރީގައި އެމްޑީޕީގެ 57،000 މެމްބަރުންނަށް ވޯޓުލެވޭނެ އެވެ. މިއީ މިފަހުން ޕާޓީގެ އެތެރޭގެ އިންތިހާބެއް މިހާ ވާދަވެރިކޮށް ކުރިއަށްދާ ފުރަތަމަ ފަހަރެވެ. މިއީ ރިޔާސީ ޕްރައިމަރީއެއްގައި ރައީސް ސޯލިހު ވާދަ ކުރައްވާ ފުރަތަމަ ފަހަރެވެ. ރައީސް ނަޝީދު މީގެ ކުރިން ދެ ފަހަރަކު ވާދަ ކުރެއްވި އެވެ.
