ކުޑަކުއްޖެއްގެ ސީޓްބެލްޓު އަޅުވަން ދެކޮޅު ހަދައި އެތެރޭގެ އުދުހުންތަކުގައި އަމަލުކުރަން ޖެހޭ އުސޫލާ ހިލާފުވެގެން މޯލްޑިވިއަންގެ ފްލައިޓަކުން ބަޔަކު ބާލައިފި އެވެ.
'އަދަދު' އަށް މައުލޫމާތު ލިބިފައިވާ ގޮތުގައި މޯލްޑިވިއަންގެ ފްލައިޓަކުން ބަޔަކު ބޭލީ، ކުޑަކުއްޖަކު ސީޓް ބެލްޓް އަޅުވަން އިންކާރު ކުރުމުގެ ސަބަބުން ދިމާވި މައްސަލަ އެއް ހޫނު ވެގެންނެވެ.
މިކަމާ ގުޅިގެން މޯލްޑިވިއަނުން 'އަދަދު' އަށް ބުނީ، ކުޑަކުއްޖަކު ސީޓް ބެލްޓް އަޅުވަން އިންކާރު ކުރި ހާދިސާއެއް ހިނގި ކަމަށެވެ. އެގޮތުން، ވައިގެ މަގުން ދަތުރުކުރާއިރު ވަކި އުމުރެއްގެ ކުއްޖެއް ނަމަ ސީޓްބެލްޓް އެޅުވުމަކީ އޮންނަ އުސޫލު ކަމަށާއި، މޯލްޑިވިއަންގެ ފްލައިޓް ކްރޫއިން އެދުނީ އުސޫލާ އެއްގޮތަށް އަމަލު ކުރުމަށް ކަމަށެވެ.
ނަމަވެސް، ކުއްޖާ ސީޓްބެލްޓް އަޅުވަން އެދުމުން ކުއްޖާގެ ބެލެނިވެރިން އެކަމާ ދެކޮޅު ހަދާ، ފްލައިޓު ތެރޭގައި ހަމަނުޖެހުން ހިންގަން އުޅުނު ކަމަށެވެ.
ފްލައިޓު ތެރޭގައި މައްސަލަ ހޫނުވިއިރު، ފްލައިޓުވަނީ މާލެއިން ފުރާފަ އެވެ. މާލެއިން ފުރައިގެން ދިއުމަށްފަހު ކުޑަ ވަގުތުކޮޅެއްތެރޭ ފްލައިޓު އަނބުރާ އައިސް ދެ ބޮޑު މީހުންނާއި ކުޑަކުއްޖަކު ފްލައިޓުން ބާލާފައިވާ ކަމަށް މޯލްޑިވިއަނުން ބުނެ އެވެ.
މިކަމުގެ ސަބަބުން ފްލައިޓު ޑިލޭވެގެން ދިޔައިރު، އެ ފްލައިޓުގައި ކައްދޫއިން މާލެއަށް ކުރަން އޮތް ދަތުރު ވެސް ވަނީ ޑިލޭވެފަ އެވެ.
