އެމްއެމްޕީއާރްސީގެ ތެރެއިން ރ. ފުއްގިރި ކުއްޔަށް ދޫކުރި ކުންފުންޏާ ގުޅޭ ސިއްރުތަކެއް ފެންމަތިކޮށް ޕެންޑޯރާ ޕޭޕާސްގައި ޝާއިއުކޮށްފައިވާ ލިޔުން، ދައުލަތުގެ ހެއްކެއްގެ ގޮތުގައި ކްރިމިނަލް ކޯޓަށް ހުށަހަޅައިފި އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ހިންގި އެމްއެމްޕީއާރުސީ ބޮޑު ހިޔާނާތުގެ ތެރޭގައި ހިމެނޭ ފުއްގިރި މުއާމަލާތުގެ މައްސަލާގައި ޔާމީންގެ އިތުރަށް މއ.ކުރިކީލަހިޔާ އަހުމަދު ކްރިކް ރިޒާ، ސަން ކޮންސްޓްރަކްޝަން އެންޑް އިންޖިނިއަރިން އަދި ސަން އިންވެސްޓްމަންޓްގެ މައްޗަށް ދައުވާކޮށްފައިވެ އެވެ.
ޔާމީންގެ މައްޗަށް އުފުލާފައިވަނީ މަނީ ލޯންޑަރިންގެ ދައުވާ އަދި ރިޝްވަތު ގަބޫލުކުރުމުގެ ދައުވާ އެވެ. ރިޒާގެ މައްޗަށް ކުރަނީ މަނީ ލޯންޑަރިންގެ ދައުވާ އަދި ރިޝްވަތު ހިފުމުގައި މެދުވެރިއަކަށް ވުމުގެ ދައުވާ އެވެ. ސަންގެ ދެ ކުންފުނީގެ މައްޗަށް މަނީ ލޯންޑަރިންގެ ދައުވާ އުފުލާފައިވެ އެވެ.
މި މައްސަލަ ފުރަތަމަ ކްރިމިނަލް ކޯޓުގެ އިސް ގާޒީ އަހުމަދު ޝަކީލް ބެއްލެވި ނަމަވެސް، މިހާރު ވަނީ ގާޒީ އަލީ ނަދީމްއާ މައްސަލަ ހަވާލުކޮށްފަ އެވެ. ގާޒީ ބަދަލުވުމުން، މައްސަލަ އޮތް ހިސާބެއް ސާފުކޮށް ކުރިން މައްސަލަ ނިމިފައި އޮތް ހިސާބުން ޝަރީއަތް ކުރިއަށް ގެންދަވަން ނިންމެވި އެވެ.
އިތުރު ކަމެއް އޮތްނަމަ ފާހަގަކުރަން ދިން ފުރުސަތުގައި ދައުލަތުގެ ވަކީލު މަރިޔަމް ޝަހުމާ ވިދާޅުވީ ޕެންޑޯރާ ޕެޕާސް އިން ޝާއިއުކޮށްފައިވާ ލިޔުމުގައި ކުރިން ނުލިބޭ އިތުރު މައުލޫމާތުތަކެއް ލިބިފައިވާ ކަމަށެވެ. އެ ގޮތުން، ރިޒާ ހުށަހެޅުއްވި ލިޔުންތަކަކީ އޭނާގެ ކުންފުނީގެ ލިޔުންތަކެއް ނޫން ކަން ޕެންޑޯރާ ޕެޕާސްގެ ލިޔުމުން އެނގެން އޮތް ކަން ދައުލަތުގެ ވަކީލު ފާހަގަ ކުރެއްވި އެވެ.
ދައުލަތުން އާ ހެއްކެއް ހުށަހަޅާފައިވާތީ، އެ ހެކި ޝަރީއަތަށް ބަލައިގަންނަ ހާލަތުގައި، ޝަރީއަތުގެ ކުރިން ހުށަހަޅާ ހުށަހެޅުންތަކަށް އިތުރު ފުރުސަތެއް ދިނުމަށް މައްސަލާގައި ދައުވާ ރައްދުވާ ފަރާތްތަކުގެ ވަކީލުން ވަނީ އެދިފަ އެވެ.
މައްސަލަ ބައްލަވާ ގާޒީ އަލީ ނަދީމް ވިދާޅުވީ، އެ ލިޔުންތައް ޝަރީއަތުން ބެލުމަށް ފަހު އެއާ މެދު ގޮތެއް ކަނޑައަޅާނެ ކަމަށެވެ. އަދި އެ ލިޔުންތައް ޝަރީއަތަށް ބަލައިގަންނަނަމަ، އެ ނިންމުމަށް ފަހު ދިފާއުއަށް ލިޔުންތައް ދޫކުރާ ދުވަހުން ފެށިގެން އެ ލިޔުންތަކާ ގުޅޭ ގޮތުން ހުށަހަޅަން ފަސް ދުވަހުގެ މުއްދަތެއް އަރުވާނެ ކަމަށް ގާޒީ ވިދާޅުވި އެވެ.
އޭގެ އިތުރަށް ޔާމީންގެ ދިފާއީ ވަކީލު އަބްދުﷲ ސިޔާޒް ވެސް ވަނީ ދިފާއީ އާ ހެކިތަކެއް މިއަދުގެ ވަގުތެއްގައި ލިބޭނެ ކަމަށް ވިދާޅުވެފަ އެވެ. އެ ހެކިތައް ހުށަހަޅަން ވެސް ފުރުސަތެއް ދެއްވުމަށް އެދިވަޑައިގަތެވެ. އެ ކަންކަމާ މެދު ވެސް ގާޒީ ވަކި ގޮތެއް ނުނިންމަވަ އެވެ.
ދައުލަތުން ތުހުމަތުކުރާ ގޮތުގައި ނުފޫޒު ބޭނުންކުރައްވައިގެން ޔާމީން، މއ.ކުރިކީލަހިޔާ އަހުމަދު ކްރިކް ރިޒާ މެދުވެރިކޮށް ރިޝްވަތުގެ ގޮތުގައި 1،117،000 ޑޮލަރު ހޯދައި ސަން ކޮންސްޓްރަކްޝަން އެންޑް އިންޖިނިއަރިން އާއި ސަން އިންވެސްޓްމެންޓް ބޭނުންކޮށްގެން އެ ފައިސާ ލޯންޑާކުރުމަށްޓަކައި ބޭނުން ކޮށްފައިވެ އެވެ.
އެމްއެމްޕީއާރްސީގެ ތެރެއިން ފުއްގިރި ކުއްޔަށް ދޫކުރީ ބިޑަކާ ނުލާ ދުބާއީ ކުންފުންޏެއް ކަމަށްވާ ކްލެސިކް ސިޓީ އައިލެންޑް ހޯލްޑިންގްސްއާ އެވެ. އެ ކުންފުންޏަށް ފުއްދިރި ދިނީ 1.55 މިލިއަން ޑޮލަރަށެވެ. ފުއްގިރި ކުއްޔަށް ދިނުމުގައި ރިޝްވަތުގެ ކަންތައްގަނޑެއް ހިންގާފައިވާއިރު, ޕެންޑޯރާ ޕޭޕާސްގައި ހާމަވި ގޮތުގައި އޭގެ ފަހަތުގައި ތިބީ އިންޑިއާގެ ނުޒޫފުގަދަ ވިޔަފާރިވެރިންތަކެވެ.
އެގޮތުން, ލީކްކޮށްލާފައިވާ ޕެންޑޯރާ ޕޭޕާސްއަށް ލިބިފައިވާ ލިޔުންތަކުން ދައްކާ ގޮތުގައި ކްލެސިކް ސިޓީ އައިލެންޑް ހޯލްޑިންގްސް ކުންފުންޏަކީ އިންޑިއާގެ ޕްރޮޕަޓީ ޑިވެލޮޕަރެއް ކަމަށްވާ އަވިނާޝް ބޮސާލޭގެ މަސްލަހަތު އޮންނަ ވިޔަފާރިއަކާއި ލޮޖިސްޓިކް ވިޔަފާރީގައި ނުފޫޒުގަދަ އިންޑިއާ މީހެއް ކަމަށްވާ އަމިތު ކުމާރު ގާންދީގެ ޕާޓްނަޝިޕް ކުންފުންޏެކެވެ.
