މި ދުވަސްވަރު ރާއްޖޭގައި ލޮލުރޯގާ، އަދި ހޭންޑް ފުޓް އެންޑް މައުތު ބަލި، ޑެންގީ ހުން އާންމުކޮށް އިތުރުވެފައިވާ ކަމަށާއި، އެފަދަ ބަލިތަކުން ރައްކާތެރިވުމަށްޓަކައި ހާއްސަ ސަމާލުކަމެއް ދިނުމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިލްތިމާސްކޮށްފި އެވެ.
އެޗްޕީއޭއިން ނެރުނު ބަޔާނެއްގައި ބުނީ، މި ސަރަހައްދުގައި ކޮވިޑް-19 އިތުރު ނުވި ނަމަވެސް، ބައެއް ގައުމުތަކުން ކޮވިޑް އިތުރުވަމުންދާކަން ފާހަގަކުރެވިފައިވާ ކަަމަށާއި، ބަލިތަކުން ރައްކާތެރިވުމަށް ހާއްސަ ސަމާލުކަމެއް ދިނުމަށް އެދޭ ކަމަށެވެ.
އެގޮތުން ރާއްޖޭން ބޭރަށް ދަތުރުކުރާއިރު، ކޮވިޑް ވެކްސިންގެ ޑޯޒްތައް ފުރިހަމަކޮށް، ގިނަ މީހުން އެއްވެ އުޅޭ ތަނަށް ދާއިރު، އާއި ދަތުރުމަތީގައި މާސްކު އެޅުމާއި، ރޯގާ ޖެހިފައިވާނަމަ ކުޑަކުދިން ކައިރިއަށް ނުދިއުމަށް ވަނީ އިލްތިމާސްކޮށްފަ އެވެ.
މީގެ އިތުރުން ބަލި ޖެހުމުގެ ނުރައްކާވުމުގެ ފުރުސަތު ބޮޑު މީހުން އިންފުލުއެންޒާއިން ރައްކާތެރިވުމަށް އިންފްލުއެންޒާ ވެކްސިން ޖަހައި، ހޭންޑް ސެނަޓައިޒާ ބޭނުންކުރުމަށް ވަނީ އެދިފަ އެވެ.
ހޭންޑް ފޫޓް އެންޑް މައުތް އިން ރައްކާތެރިވުމަށް ރަނގަޅަށް ސައިބޯނި ލައިގެން އަތްދޮވުމާއި، އާއްމު ސާފްތާހިރުކަމަށް ސަމާލުކަން ދިނުމާއި، އާއްމުކޮށް އަތްލާ ތަކެއްޗާއި ތަންތަން ގިނައިން ސާފް ކުރުމާއި، ބަލިޖެހިފައިވާ ކުދިން ބޭރަށް ނުގެންދިއުމާއި، ބޭނުންކޮށްފައި ހުންނަ ނެޕީ، ޓިޝޫ ފަދަ ތަކެތި ރައްކާތެރި ގޮތުގައި ނައްތާލުމަށް އެޗްޕީއޭއިން އެދިފައިވެ އެވެ.
