ކޮރަޕްޝަންގެ މައްސަލައެއްގައި ކުރީގެ ރައީސް އަބްދުﷲ ޔާމީންގެ މައްޗަށް 11 އަހަރުގެ ޖަލު ހުކުމެއް އިއްޔެ އިއްވުމުން އިދިކޮޅުން ރޭ ބޭއްވި މުޒާހަރާ ބާރުގެ ބޭނުންކޮށްގެން ރޫޅާލައި، 16 މީހަކު ހައްޔަރުކޮށްފި އެވެ.
ފުލުހުންގެ ބުނީ ރޭގެ މުޒާހަރާއިން ހައްޔަރުކުރީ 15 ފިރިހެނުންނާއި އަންހެނެއް ކަމަށެވެ.
ރޭގެ މުޒާހަރާ އެންމެ ފުރަތަމަ ފެށި މަޖީދީ މަގާއި ޗާންދަނީ މަގު ކަންމަތިންނެވެ. އެތަނުގައި ތިބެ އެއްވުމުގެ ބައިވެރިން ދިޔައީ ޔާމީނުގެ މައްޗަށް ކްރިމިނަލް ކޯޓުން ކުރި ހުކުމަކީ 'ހަރާމް' ހުކުމެއް ކަމަށާއި އެ ހުކުމް ބާތިލްކޮށް ޔާމީން މިނިވަން ކުރުމަށް ގޮވާލަމުންނެވެ.
ވ. އާރަށް ކުއްޔަށް ދިނުމުގައި ރިޝްވަތު ހިފުމާއި މަނީ ލޯންޑަރިންގެ ކުށް ސާބިތުވެ، ޔާމީން 11 އަހަރަށް ޖަލަށް ލުމަށް ކްރިމިނިލް ކޯޓުން ހުކުމް ކުރީ އިއްޔެގެ އިރުއޮއްސުމަށް ގާތްވެފައި އޮއްވަ އެވެ. އެއާއެކު ގިނަ އިރުތަކެއްނުވެ، ކަރެކްޝަންސްގެ ބެލުމުގެ ދަށުން ޔާމީން މާފުށީ ޖަލަށް ގެންދިޔަ އެވެ.
ރޭ މުޒާހަރާ ކުރި މީހުން މަޖީދީ މަގުގައި ތިއްބާ ފުލުހުންގެ ސްޕެޝަލް އޮޕަރޭޝަންސްގެ ޓީމެއް ގޮސް މުޒާހަރާ ރޫޅާލުމުގެ މަސައްކަތް ފެށުމުން އެމީހުން މާލޭގެ އެކި ސަރަހައްދުތަކަށް ފެތުރިގަތެވެ. އެގޮތުން ރައީސުލްޖުމްހޫރިއްޔާގެ ގެކޮޅު، މުލިއާގެ ކައިރިއަށް ދާން މަސައްކަތް ކުރި އެވެ. ނަމަވެސް އެ މަސައްކަތް ނާކާމިޔާބުވުމުން މުޒާހަރާގެ ބައިވެރިން ދެން ދިޔައީ ފޮރިން މިނިސްޓަރު އަބްދުﷲ ޝާހިދުގެ ގެ ކައިރިއަށެވެ.
ނަމަވެސް އެއިރު، ޝާހިދުގެ ގެ ކައިރީގައި ހުރީ ވަރަށް ބޮޑަށް ސެކިއުރިޓީ ވަރުގަދަކޮށްފަ އެވެ. އަދި އެތަނުން ވެސް ގިނައިރުތަކެއްނުވެ، މުޒާހަރާ ކުރާ މީހުން ފޮނުވާލި އެވެ.
ގާނޫނުތައް ބުނާ ގޮތުން ކުރިން އަންގައި، ހުއްދަ ނުލިބި އެއްވެވޭނީ މާލޭގެ ކާނިވާ ސަރަހައްދަށް އެކަންޏެވެ. ޔާމީންގެ ވެރިކަމުގައި ގާނޫނަށް ގެނައި އެ އިސްލާހު މި ސަރުކާރުން ވެސް އަންނަނީ ދަމަހައްޓަމުންނެވެ.
