ރިޝްވަތު ހިފުމާއި މަނީ ލޯންޑަރިންގެ ކުށް ސާބިތުވެ ކުރީގެ ރައީސް އަބްދުﷲ ޔާމީން ގެ މައްޗަށް ކްރިމިނަލް ކޯޓުން ކުރި 11 އަހަރުގެ ޖަލު ހުކުމް ތަންފީޒުކުރުމަށްޓަކައި އެމަނިކުފާނު މާފުށި ޖަލަށް ގެންގޮސްފި އެވެ.
މިއަދު ހަވީރު ޔާމީނުގެ މައްޗަށް ކުރިި ހުކުމާއެކު މޯލްޑިވްސް ކަރެކްޝަނަލް ސާވިސްގެ ބެލުމުގެ ދަށުން އެ އިދާރާގެ ލޯންޗެއްގައި އެމަނިކުފާނު މާފުއްޓަށް ގެންގޮސްފައިވަނީ މިރޭ 8:00 ހާއިރު އެވެ.
އެމަނިކުފާނުގެ ޖަލު ހުކުމް ތަންފީޒުކުރައްވާނީ މާފުށީ ޖަލުގައި ހަދާފައި ހުންނަ 'ވީއައިޕީ' ގޮޅީގަ އެވެ. މި ގޮޅިއަކީ ސަރުކާރަށް ހިދުމަތް ކުރައްވާފައިވާ ބޭފުޅުންނާއި ސިޔާސީ ލީޑަރުން ބޭއްތިއްބުމަށް ޔާމީނުގެ ވެރިކަމުގައި ތަރައްގީކުރި ގޮޅިއެކެވެ.
އެ ގޮޅީގައި ކުރީގެ ރައީސް މުހައްމަދު ނަޝީދާއި، ކުރީގެ ރައީސް މައުމޫން އަބްދުލްގައްޔޫމާއި ހޯމް މިނިސްޓަރު އިމްރާން އަބްދުﷲ ގެ އިތުރުން ކުރީގެ ޑިފެންސް މިނިސްޓަރު ކާނަލް މުހައްމަދު ނާޒިމް ވެސް ހުކުމްތައް ތަންފީޒުކޮށްފައިވެ އެވެ.
ވ. އާރަށް ކުއްޔަށް ދިނުމުގައި ހިންގި ކަމަށް ބުނާ ހިޔާނާތުގެ މައްސަލާގައި, ކްރިމިނަލް ކޯޓުން ކުރީގެ ރައީސް އަބްދުﷲ ޔާމީނަށް ހުކުމް ކުރީ ޖުމުލަ 11 އަހަރަށް ޖަލަށް ލުމަށާއި ފަސް މިލިއަން ޑޮލަރުން ޖޫރިމަނާ ކުރުމަށެވެ.
މި ދެ ދައުވާގެ ތެރެއިން މަނީ ލޯންޑާ ކުރުމުގެ ކުށުގެ ދައުވާގައި ކޯޓުން ނިންމީ ޔާމީން ހަތް އަހަރަށް ޖަލަށް ލުމާއެކު، ފަސް މިލިއަން ޑޮލަރުން ޖޫރިމަނާ ކުރުމަށެވެ. އެއީ ލޯންޑާކުރިކަން ސާބިތުވި ޖުމުލަ އަދަދުގެ ފަސް ގުނަ އެވެ.
ރިޝްވަތު ހިފުމުގެ ކުށުގެ ދައުވާގައި ކޯޓުން ކަނޑައެޅި އަދަބަކީ ހަތަރު އަހަރަށް ޖަލަށް ލުމެވެ. އެ ކުށަށް ކަނޑައެޅިފައިވާ އަސާސީ އަދަބަކީ ތިން އަހަރާއި ދެ މަހާއި 12 ދުވަހަށް ޖަލަށް ލުމެވެ.
