އިދިކޮޅުގެ ރިޔާސީ ކެންޑިޑޭޓު އަބްދުﷲ ޔާމީންގެ މައްޗަށް މަނީ ލޯންޑަރިންގެ ދައުވާ އަދި ރިޝްވަތު ގަބޫލު ކުރުމުގެ ދައުވާ ސާބިތުވާ ކަމަށް ކްރިމިނަލް ކޯޓުން ހުކުމް ކުރިނަމަވެސް އަންނަ އަހަރު ރިޔާސީ އިންތިހާބަށް ކުރަމުން އަންނަ އުންމީދުތަކަށް ބަދަލެއް ނާންނަ ކަމަށް އިދިކޮޅުން ބުނެފި އެވެ.
ކްރިމިނަލް ކޯޓުގައި މިއަދު ހެނދުނު ކުރިއަށް ދިޔަ ޝަރީއަތުގައި ވަނީ ވ. އާރަށު ހިޔާނާތުގެ މައްސަލާގައި އުފުލި މަނީ ލޯންޑަރިންގެ ދައުވާ އަދި ރިޝްވަތު ގަބޫލު ކުރުމުގެ ދައުވާ ސާބިތުވާ ކަމަށް ކަނޑައަޅާފަ އެވެ. މި މައްސަލައިގައި މެންދުރު ފަހު ހުކުމް ކުރާނެ އެވެ. އެއާއެކު 12 މަސް ދުވަހަށް ދިގު ހުކުމެއް އިއްވައިފިނަމަ، ޔާމީނަށް އިންތިހާބުގައި ވާދަކުރުމުގެ ދޮރު ބަންދުވާނެ އެވެ.
އެހެންނަމަވެސް ޝަރީއަތަށް ފަހު މީޑިއާއާ ވާހަކަ ދައްކަވަމުން ޕީއެންސީގެ ރައީސް އަބްދުއްރަހީމް އަބްދުﷲ ވަނީ އިދިކޮޅުން ކުރަމުން އަންނަ މަސައްކަތުގައި ރައްޔިތުން ސާބިތުވެ ތިބުމަށް އެދިވަޑައިގެންފަ އެވެ.
"އުންމީދު ގެއްލުވާނުލާށޭ، 2023 ވަނަ އަހަރު މި ގައުމުގެ ވެރިކަމަށް ރައީސް ޔާމީން ގެންނާނަމޭ އަޅުގަނޑުމެން، އިރާދަކުރެއްވިއްޔާ މިކަން އަޅުގަނޑުމެން މިފަހަރު ކުރާނަމޭ،" ކްރިމިނަލް ކޯޓު ސަރަހައްދުގައި ހުންނަވައިގެން އަބްދުއްރަހީމް ވިދާޅުވި އެވެ.
އަބްދުއްރަހީމް ވިދާޅުވީ އިދިކޮޅުން ދެން ނުކުންނާނީ "ދޭތިން އެކައްޗަަކަށް" ކަަމަށެވެ. އަދި އަތޮޅުތަކުގައި ތިބި އިދިކޮޅު ސަޕޯޓަރުން ވެސް މި ހަރަކާތްތަކަށް މާލެ އައުމަށް އޭނާ ގޮވާލެއްވި އެވެ. އޭނާ ވަނީ ޔާމީން ހުންނެވީ ގަދަކޮށް ކަމަށާއި ސަޕޯޓަރުން މާޔޫސް ނުވުމަށް ވެސް އެދިވަޑައިގެންފަ އެވެ.
ކްރިމިނަލް ކޯޓުގެ ހުކުމަށް އިންޑިއާއިން ނުފޫޒު ފޯރުވާފައިވާ ކަމަށް ތުހުމަތު ކުރައްވާ އޭނާ ވަނީ އިދިކޮޅުން ހުކުމް ބަލައި ނުގަންނަ ކަމަށް ވިދާޅުވެފަ އެވެ. އަދި، ޔާމީން މިނިވަން ކުރަން ޖެހުނު ކޮންމެ މަސައްކަތެއް ވެސް ކުރައްވާނެ ކަމަށް ވިދާޅުވި އެވެ.
"ޔަގީން ކުރައްވާ، އަޅުގަނޑުމެން ފިނޑިއެއް ނުވާނަން، އަޅުގަނޑުމެން ފަހަތަކަށް ނުޖެހޭނަން، އަޅުގަނޑުމެން ގެއަކަށް ނުވްނަންނާނަން،" އަބްދުއްރަހީމް ތަކުރާރުކޮށް ވިދާޅުވި އެވެ.
މިއަދު ހުކުމް ކުރުމަށް ބޭއްވި ޝަރީއަތުގެ މަޖިލީހުގައި ކްރިމިނަލް ކޯޓުގެ އިސް ގާޒީ އިސްމާއީލް ޝަކީލް ވިދާޅުވީ އެމްއެމްޕީއާރުސީ މެދުވެރިކޮށް އާރަށް ކުއްޔަށް ދޫކުރަން ޔާމީން މަސައްކަތް ކުރި ކަމަށާއި ޔޫސުފް ނައީމަށް އެ ރަށް ދިނުމަށް އުޅުނު ކަން އެނގެން އެބަ އޮތް ކަމަށެވެ.
އޭގެ ފަހުން ރިޝްވަތުގެ ފައިސާ ހޯދުމަށް ޓަކައި ޔާމީން އެކި ފަހަރު މަތިން މަސައްކަތްކޮށްފައިވާ ކަމާއި ޔާމީންގެ އެކައުންޓަށް އެމަނިކުފާނު އެދިވަޑައިގަތް މިންވަރަށް ފައިސާ ޖަމާވިކަން ހެކިތަކުން ސާބިތުވާ ކަމަށް ގާޒީ ވިދާޅުވި އެވެ. އެެހެންވެ ރިޝްވަތުގެ ދައުވާގައި ހިމެނޭ ކުށުގެ ހުރިހާ ރުކުނެއް ހަމަވާ ކަމަށް ކޯޓުން ކަނޑައެޅި އެވެ.
މަނީ ލޯންޑަރިންގެ ދައުވާ ސާބިތު ކުރުމަށް އެއީ ކުށް ކޮށްގެން ހޯދައިގެންވާ ފައިސާއެއް ކަމަށާއި ކުށްކޮށްގެން ހޯދި ފައިސާއެއް ކަން އެނގިހުރެ ބޭނުން ކުރި ކަން ސާބިތުކޮށްދޭން ޖެހެ އެވެ. ގާޒީ ޝަކީލް ނިންމެވީ ދެ ރުކުން ވެސް ފުރިހަމަވާ ކަން ދައުލަތަށް ސާބިތުކޮށްދެވިފައިވާ ކަމަށެވެ.
ގާޒީ ޝަކީލް ވިދާޅުވީ، ޔާމީންގެ ނަމުގައި އެކައުންޓެއް އުފައްދައި، ޔޫސުފް ނައީމްގެ އެކައުންޓުން ޖަމާކުރުމަކީ އިއްތިފާގެއް ކަމުގައި ޝަރީއަތަށް ގަބޫލު ނުކުރެވޭ ކަމަށެވެ. އޭގެ ފަހުން ފައިސާއިން މަންފާ ހޯދުމަށް ޓަކައި 36 މަސް ދުވަހަށް އިންވެސްޓް ކޮށްފައި އޮތުމުން، ކުށުގެ ރުކުންތައް ހަމަވާ ކަމަށް ކަނޑައެޅުއްވި އެވެ.
ރިޝްވަތު ގަބޫލު ކުރުމުގެ ކުށުގެ ދައުވާގެ އަސާސީ އަދަބަކީ ތިން އަހަރާއި ދެ މަހާއި 12 ދުވަހަށް ޖަލަށް ލުން ކަމަށް ވިޔަސް ކުށުގެ އަދަބުގެ ދަރަޖަ މަތިކޮށް ދެވެން އޮތް އެންމެ ބޮޑު އަދަބެއް ދިނުމަށް ދައުލަތުން އެދުނެވެ. އެ ގޮތުން އެ ދައުވާގައި އަށް އަހަރަށް ޖަލަށް ލުމަށް ދައުލަތުން އެދުނެވެ.
