ވ. އާރަށް ކުއްޔަށް ދިނުމުގައި ހިންގި ކަމަށް ބުނާ ހިޔާނާތުގެ މައްސަލާގައި ކްރިމިނަލް ކޯޓުގައި ކުރިއަށްދާ ޝަރީއަތް ހުކުމަކާ ހަމައަށް ވާސިލްވެއްޖެ އެވެ. އެއް ބަޔަކަށް މިއީ، ކުރީގެ ސަރުކާރުގައި ހިންގި އެންމެ ބޮޑު ހިޔާނާތުގެ މައްސަލައިގެ ޝަރީއަތެވެ. އަނެއް ބަޔަކަށް އެއީ "ސިޔާސީ" ޝަރީއަތެކެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި އެމްއެމްޕީއާރުސީ މެދުވެރިކޮށް ހިންގި ބޮޑު ހިޔާނާތުގެ ތެރެއިން ހިމެނޭ އެ މުއާމަލާތުގެ މައްސަލާގައި އެމަނިކުފާނުގެ މައްޗަށް ރިޝްވަތު ގަބޫލުކުރުމުގެ ދައުވާ އަދި މަނީ ލޯންޑަރިންގެ ދައުވާ އުފުލާފައިވެ އެވެ. ރައްޔިތުންގެ މަޖިލީހުގެ ކުރީގެ މެންބަރު ޔޫސުފް ނައީމްގެ މައްޗަށް ރިޝްވަތު ދިނުމުގެ ދައުވާ ކޮށްފައިވެ އެވެ.
"އަޅުގަނޑުމެން ހިތްހަމަޖެހޭ ވަރަށް ވުރެ މާ ބޮޑަށް ވެސް މަސައްކަތް ކުރެވިއްޖެ، އެ ކަމަށް އަޅުގަނޑުމެން ޝައްކެއް ވެސް ނުކުރަން، އެހެން ނަމަވެސް ފެއާ ޕްލޭއެއްގައި ކުރެވުނު ބެޓަލްއެއް ނޫން މިއީކީ، އެ ބިރުވެރިކަން، ނުތަނަވަސްކަން ހިތުގައި އަބަދުވެސް އޮންނާނެ،" ޔާމީންގެ އިސް ވަކީލު އަދި ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު "އަދަދު" ނޫހާ މިއަދު ވާހަކަ ދައްކަވަމުން ވިދާޅުވި އެވެ.
ޖަމީލްގެ އެންމެ ބޮޑު ހިތްހަމަޖެހުމަކަށް އޮތީ ޝަރީއަތް ލައިވްކޮށް ދުރަށް ދެއްކުމެވެ. ޝަރީއަތް ހިނގި ގޮތް ދިވެހިންނަށް ފެންނާނެ އެވެ. ޖަމީލް ގަބޫލުކުރައްވާ ގޮތުގައި ޖިނާއީ ދައުވާއެއް ކުރެވޭ ވަރުގެ އެއްވެސް އެއްޗެއް ދައުލަތުގައި ނެތް ކަން މިހާރު ރައްޔިތުންނަށް ސާފުވާނެ އެވެ.
"ސިޔާސީ ވެރިންނަށް ސިޔާސީ ގޮތުން ވާދަކުރަން ޖެހޭނީ، ދައުލަތް ބޭނުން ކުރައްވައިގެން މި ކަހަލަ ކަންކަމެއް ނޫން ކުރާނީ،" ޔާމީންގެ މައްޗަށް އުފުލާފައިވާ ދައުވާތަކަކީ އަންނަ ރިޔާސީ އިންތިހާބުގައި ވާދަކުރެއްވުމަށް ހުރަސް އެޅުމުގެ ގޮތުން ކޮށްފައިވާ ދައުވާތަކެއްގެ ގޮތުގައި ސިފަ ކުރައްވަމުން ޖަމީލް ވިދާޅުވި އެވެ.
ޖަމީލް ވިދާޅުވީ ޔާމީންގެ ދިފާއުގައި އެމަނިކުފާނުގެ ވަކީލުން ކުރައްވަން ޖެހުނީ ބުރަ މަސައްކަތެކެވެ. ކިތަންމެ ހުރަހެއް ކުރިމަތިކުރުވި ކަމަށް ތުހުމަތު ކުރެއްވި އެވެ. އެހެންވިޔަސް އެ ހުރަސްތައް ގިރާކޮށް ރަނގަޅު "ފައިޓެއް" ދެވުނު ކަމަށް ގަބޫލު ކުރައްވަ އެވެ.
"ރައީސް [ޔާމީން] ޖަލުގައި ހޭދަކުރެއްވި ދުވަސްތަކުގައި ވެސް، ލޯންޗު ހިފައިގެން ޖަލަށް ގޮސްފަ ވެސް ރައީސް [ޔާމީން] އާ ބައްދަލުނުކޮށް އަންނަން ޖެހިފަ އެބަ ހުރި، މިހެން ކިތަންމެ ހުރަހެއް ކުރިމަތިކޮށްގެން ވެސް އަޅުގަނޑުމެންނަށް ދިފާއުގައި ރަނގަޅު މަސައްކަތެއް ކުރެވުނު،" ޖަމީލްގެ ތަޖުރިބާ ކިޔައިދެއްވަމުން އޭނާ ވިދާޅުވި އެވެ.
ރައީސް ޔާމީން އަދި އެމަނިކުފާނުގެ އިސް ވަކީލު ޖަމީލް - މުހައްމަދު ޝާބިން / އަދަދު
ޔާމީންގެ މައްޗަށް ކުރާ ދައުވާގައި ހިމެނޭ ކަންކަން
ދައުލަތުން ކުރާ ދައުވާގައިވާ ގޮތުން ވ. އާރަށް ޓޫރިޒަމް މިނިސްޓްރީއަށް ބަދަލުކުރީ އޮގަސްޓް 9، 2015 ގަ އެވެ. ޔޫސުފް ނައީމްގެ 99 ޕަސަންޓު ހިއްސާ އޮންނަ ގޮތަށް ޓޫޖީ ޕްރައިވެޓް ލިމިޓެޑްގެ ނަމުގައި ކުންފުންޏެއް އުފެއްދީ އޮގަސްޓް 13، 2015 ގަ އެވެ.
ސެޕްޓެމްބަރު 8، 2015 ގައި ޓޫޖީ ޕްރައިވެޓް ލިމިޓެޑްގެ 99 ޕަސަންޓު ހިއްސާ އެލްއޭ ރިސޯޓްސް ޕްރައިވެޓް ލިމިޓެޑްއަށް ވިއްކާލީ ކަމުގަ އެވެ.
ސެޕްޓެމްބަރު 9، 2015 ގައި އެމްއެމްޕީއާރުސީން ޓޫޖީ ޕްރައިވެޓް ލިމިޓެޑް ކުންފުންޏަށް ވ. އާރަށް ހަވާލުކުރިއިރު އެލްއޭއިން އެމްއެމްޕީއާރުސީއަށް ރަށުގެ ލީޒް އެކުއިޒިޝަން ކޮސްޓްއަށް އެއް މިލިއަން ޑޮލަރު އަދި ޔޫސުފް ނައީމަށް ވެސް އެއް މިލިއަން ޑޮލަރުގެ ޗެކެއް ދީފައިވެ އެވެ.
ސެޕްޓެމްބަރު 13، 2015 ގައި ޔޫސުފް ނައީމްގެ އެކައުންޓަށް އެ ފައިސާ ޖަމާވުމުން ސެޕްޓެމްބަރު 15، 2015 ގައި ޔޫސުފް ނައީމްގެ އެކައުންޓުން ޔާމީނަށް އެއް މިލިއަން ޑޮލަރުގެ ޗެކެއް ދީފައިވެ އެވެ. އޭގެ ދެ ދުވަސް ފަހުން އެ ފައިސާ އެޗްއެސްބީސީގައި ޔާމީންގެ ނަމުގައި ހުޅުވާފައިވާ އެކައުންޓަށް ޖަމާކޮށްފައިވާ ކަމަށް ދައުލަތުގެ ދައުވާގައިވެ އެވެ.
ޔާމީނާއި ޔޫސުފް ނައީމް ވެސް މި ދައުވާތަކަށް އިންކާރު ކުރައްވަ އެވެ. ދެ ބޭފުޅުން ވެސް ވިދާޅުވާ ގޮތުން ދައުލަތުން ބުނާ މުއާމަލާތަކީ ދިވެހި ރުފިޔާއިން ޑޮލަރު ގަތް މުއާމަލާތެކެވެ. އަދި އާރަށް ކުއްޔަށް ދޫކުރުމުގައި ހިނގީ ވަކި އެހެން މުއާމަލާތެއް ކަމަށެވެ. އަދި ހިޔާނާތުގެ އެއްވެސް އަމަލެއް ހިންގަވާފައިނުވާނެ ކަމަށެވެ.
ޔޫސުފް ނައީމާއި ޔާމީން ވެސް ވަނީ އެ ކަން ސާބިތު ކުރުމަށް ދިފާއީ ހެކިންތަކެއް ވެސް ހުށަހަޅައިފަ އެވެ. އަދި ދައުލަތުން ވަނީ ޔާމީންގެ ދިފާއު ނަފީ ކުރުމުގެ ގޮތުން އިތުރު އާ ހެކިތަކެއް ވެސް ހުށަހަޅައިފަ އެވެ. އަދި ޝަރީއަތަށް އެ ހެކިތައް ބަލައިގަތެވެ.
