ރ. ފުއްގިރި ކުއްޔަށް ދޫކުރުމުގައި ކުރީގެ ރައީސް އަބްދުﷲ ޔާމީން ރިޝްވަތު ނެންގެވި ކަމަށް ބުނެ އެމަނިކުފާނުގެ މައްޗަށް ކުރާ ދައުވާގެ ޝަރީއަތް ވެސް ކްރިމިނަލް ކޯޓުގައި ތާވަލުކޮށްފި އެވެ.
ޔާމީންގެ މައްޗަށް އެ މައްސަލައިގައި ކުރާ މަނީ ލޯންޑަރިންގެ ދައުވާ އާއި ރިޝްވަތު ގަބޫލު ކުރުމުގެ ދައުވާގެ އަޑުއަހުން ތާވަލު ކުރީ ޖެނުއަރީ 3، 2023 އަށެވެ. އެ މައްސަލައިގެ އަޑުއެހުމެއް ތާވަލުކޮށްފައި މި ވަނީ ވ. އާރަށް މައްސަލައިގައި ޔާމީންގެ މައްޗަށް ކުރާ ދައުވާގެ ޝަރީއަތުގައި އަންނަ އާދީއްތަ ދުވަހު ހުކުމް ކުރަން ތައްޔާރުވެފައި ވަނިކޮށެވެ.
ފުއްގިރި މައްސަލައިގައި ޔާމީންގެ އިތުރުން މއ. ކުރިކީލަހިޔާ، އަހުމަދު "ކްރިކް" ރިޒާއަށް ވެސް ޖިނާއީ ދައުވާ ދައުލަތުން ވަނީ އުފުލައިފަ އެވެ.
ދައުލަތުން ތުހުމަތުކުރާ ގޮތުގައި ނުފޫޒު ބޭނުންކުރައްވައިގެން ރިޒާ މެދުވެރިކޮށް ރިޝްވަތުގެ ގޮތުގައި ޔާމީން 1،117،000 ޑޮލަރު ހޯއްދެވި އެވެ. އަދި އެ ފައިސާ ސަން ކޮންސްޓްރަކްޝަން އެންޑް އިންޖިނިއަރިން އާއި ސަން އިންވެސްޓްމެންޓް ބޭނުންކޮށްގެން ލޯންޑާކޮށްފައިވާ ކަމަށް ވެސް ދައުލަތުން ބުނެ އެވެ.
އެ މައްސަލަ ކުރިން ބައްލަވަމުން ގެންދެވި ގާޒީ އަހުމަދު ޝަކީލު ވަނީ އެ މައްސަލައިން ތަނާޒުލުވެވަޑައިގެންގަ އެވެ. ޖެނުއަރީ 3، ގައި މައްސަލަ އަލުން ފަށާއިރު ބައްލަވާނީ ގާޒީ އަލީ ނަދީމެވެ.
ވ. އާރަށް ކުއްޔަށް ދޫކުރުމުގައި ހިންގާފައިވާ ހިޔާނާތުގެ މައްސަލާގައި ޔާމީނާއި ރައްޔިތުންގެ މަޖިލީހުގެ ކުރީގެ މެންބަރު ޔޫސުފް ނައީމްގެ މައްޗަށް ކުރާ ދައުވާތަކުގެ ޝަރީއަތް ހިންގަވަނީ ވެސް އިސް ގާޒީ ޝަކީލެވެ.
ފުއްގިރި ހިޔާނާތުގެ މައްސަލާގައި އަޑުއެހުމެއް ނުބާއްވާތާ އަހަރެއް ވަނީ ވެފަ އެވެ. ދެން އެ މައްސަލައިގައި އޮންނާނީ މައްސަލަ ބައްލަވާ ފަނޑިޔާރު ބަދަލުވިކަން އެންގުމާއި އެ މައްސަލަ ގޮސްފައި އޮތް ހިސާބެއް ސާފު ކުރުމެވެ.
ޔާމީންގެ މައްޗަށް ޖިނާއީ ހަތަރު ދައުވާއެއް ކޯޓުގައި އުފުލާފައިވާއިރު އެމަނިކުފާނަކީ ކުރިއަށް އޮތް ރިޔާސީ އިންތިހާބުގައި ވާދަ ކުރައްވާނެ އިދިކޮޅު ޕްރޮގްރެސިވް ޕާޓީ އޮފް މޯލްޑިވްސްގެ ރިޔާސީ ކެންޑިޑޭޓެވެ. އަދި މީގެ ކުރިން 2019 ވަނަ އަހަރު ޔާމީންގެ މައްޗަށް ފަސް އަހަރުގެ ޖަލު ހުކުމެއް އިއްވައިފަ އެވެ. އެއީ ރަށެއް ކުއްޔަށް ދޫކޮށްގެން ދައުލަތަށް ލިބެންޖެހޭ އެއް މިލިއަން ޑޮލަރު އެމަނިކުފާނުގެ އެކައުންޓަށް ޖަމާކުރި މައްސަލައެއްގަ އެވެ.
