ހުޅުމާލެއަށް ދާ ބްރިޖުގެ ޓްރެފިކް ލައިޓު ކައިރީގައި އިއްޔެ މެންދުރު ހިނގި ނުރައްކާތެރި އެކްސިޑެންޓުގައި ނިޔާވީ ފުވައްމުލަކު ވިޔަފާރިވެރިޔާ އިސްމާއިލް މޫސާ ނުވަތަ އޭނާ މަޝްހޫރުވެފައިވާ ނަމުން ނަމަ ޖަމްބޯ މޫސާ އެވެ.

އުމުރުން 54 އަހަރުގެ އިސްމާއީލް އަކީ ޖަމްބޯ ފޯވަޑިންގެ ނަމުގައި ތައިލޭންޑާއި ބައެއް އެހެން ގައުމުތަކުން ރާއްޖެއަށް މުދާ ގެނެސްދޭ ކުންފުންޏެއް ހިންގި މީހެކެވެ. ތައިލެންޑްގެ މީހަކާ ކައިވެނިކޮށް ދަރިން ވެސް ލިބިފައިވާ އިސްމާއީލް ދިރިއުޅެނީ އެ ގައުމުގަ އެވެ. ތައިލެންޑުގައި އޭނާ ފިހާރައެއް ވެސް ހިންގަ އެވެ.

"އިއްސެ ރާއްޖެ އައީ ވިއްސަކަށް އަހަރު ދުވަހު ތައިލެންޑުގައި ހުރުމަށް ފަހު ދާދި ފަހުން. ރާއްޖެއަށް ވަރަށް ގިނަ މުދާ އޭނަ ފޮނުވަމުންދާނެ. ވިޔަފާރިވެރިންނާ ވަރަށް ގާތް ހިތްހެޔޮ މީހެއް އެއީ. އިއްޔެ [ބުރާސްފަތި ދުވަސް] ވެސް އަހަރެންނާ އޭނާ ބައްދަލުވެ ސައިބޮއެ ހެދިން،" އިސްމާއިލްގެ ގާތް އެކުވެރިޔަކު ބުންޏެވެ.

އިސްމާއީލް ދުއްވަން އިން ސައިކަލާއި ކާރެއް ޖެހި ހިނގި އެ އެކްސިޑެންޓުގައި އޭނާގެ އޭނާ އަޅައިގެން ހުރި ހެލްމެޓު ބައެއް ބުރައިގެން ގޮސްފައިވާއިރު، ބޮލުން ފޭބި ލޭތައް މަގުމައްޗަށް އެޅިފައިވެ އެވެ.

ސޯޝަލް މީޑިއާގައި ދަރުވެފައިވާ ވީޑިއޯތަކުން ފެންނަ ގޮތުގައި އާންމުންގެ އެހީތެރިކަމާއެކު އިސްމާއީލް ހޮސްޕިޓަލަށް ގެންދަނީ އެ ސަރަހައްދުގައި މަޑުކުރި ކާރަކަށް އަރުވައިގެންނެވެ.

އޭނާ ނިޔާވީ ޓްރީ ޓޮޕް ހޮސްޕިޓަލަށް ގެންގޮސް ފަރުވާ ދެމުން ދަނިކޮށެވެ.

މުހިންމު ބައެއް ހަބަރު

• ތިލަމާލޭ ބްރިޖު އެޅުމުގެ މަސައްކަތްކުރާ އިންޑިއާގެ އެފްކޮންސް ކުންފުނީގެ މުވައްޒަފުން ތިބުމަށް ގުޅީފަޅުގައި ހަދާފައިވާ އެކަމޮޑޭޝަން ބްލޮކްގައި ރޭ ހިނގި އަލިފާނުގެ ހާދިސާގައި އެ އިމާރާތް އެކޮށް އަނދައި ހުލުވެ، 70 އަށް ވުރެ ގިނަ މީހުންނަށް އަނިޔާވި ކަމަށް އެމްއެންޑީއެފުން ބުނީ އިއްޔެ އެވެ.

• ގިރާވަރު ފަޅު ހިއްކައިގެން ތަރައްގީ ކުރާ މީހުން ދިރިއުޅޭ ސިޓީއަށް ހަރަދު ކުރާ ފަރާތްތަކަށް ވެސް ކްރޮސްސަބްސިޑީގެ އުސޫލުގެ ދަށުން ބިން، ރަށް ނުވަތަ ފަޅު ދެވޭނެ ގޮތަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހަމަޖައްސަވައިފި ކަމަށް ރިޕޯޓްކުރީ އިއްޔެ އެވެ.

• މެމްބަރުން ހަމަނުވެގެން ދިވެހި ރައްޔިތުންގެ ޕާޓީ އުވާލުމަށް އިލެކްޝަންސް ކޮމިޝަނުން ނިންމާފައިވާތީ ކޯޓަށް ދިޔުމަށް ނިންމާފައިވާ ކަމަށާއި ޖޭޑީޕީގެ ނަމުގައި ސިޔާސީ ޕާޓީއެއް އުފެއްދުމުގެ ވިސްނުން ގެންގުޅޭ ކަމަށް އެ ޕާޓީން ބުނިކަމަށް ރިޕޯޓުކުރީ އިއްޔެ އެވެ.

• ނޫސްވެރިޔާ ރިލްވާން އަބްދުﷲގެ މައްސަލައިގައި ގެއްލުވާލާފައިވާ މީހުންނާއި ގޮތް ނޭނގޭ މަރުތައް ތަހުގީގު ކުރާ ކޮމިޝަނުން ކުރި މަސައްކަތް ބަލައިގަންނަ ކަމަށް އާއިލާއިން ބުނީ އިއްޔެ އެވެ.

• މާލެ ސަރަހައްދުގައި ދިރިއުޅޭ ފަރާތްތަކުގެ ތެރެއިން ފަގީރުންގެ ދަފްތަރުގައި ރަޖިސްޓްރީވާން ބޭނުންވާ ފަރާތްތަކަށް ރަޖިސްޓްރީވުމުގެ ފުރުސަތު އިސްލާމިކް މިނިސްޓްރީން ހުޅުވާލައިފި ކަމަށް އިއްޔެ ރިޕޯޓުކުރި އެވެ.

ދުވަހުގެ ކޮޓޭޝަން

ނޫސްވެރިޔާ ރިލްވާން އަބްދުﷲގެ މައްސަލައިގައި ގެއްލުވާލާފައިވާ މީހުންނާއި ގޮތް ނޭނގޭ މަރުތައް ތަހުގީގު ކުރާ ކޮމިޝަނުން ކުރި މަސައްކަތް ބަލައިގަންނަ ކަމަށް ރިލްވާންގެ ދައްތަ ފާތިމަތު ޝެހެނާޒު ބުންޏެވެ.

ކޮމިޝަނުން މަސައްކަތްތަކއެއް ކުރާކަން ފާހަގަ ކުރެވޭ. ތިން މީހަކު ހައްޔަރުފިތާ މިހާރު ވެސް އެ މައްސަލައިގައި. އެއީ ވަރަށް ބިޮޑު ހިތްހަމަޖެހުމެއް. ދެން ވެސް ހައްޔަރު ކުރަމުން ގެންދާނެ ކަމަށް އިއްޔެ ކޮމިޝަނުން ބުނި. އެކަން ވެސް ފާހަގަ ކުރަން އަޅުގަނޑުމެން،"

ދުވަހުގެ ފޮޓޯ

ޒާހިރު ނަސީރު މެމޯރިއަލް ބާސްކެޓްބޯޅަ ޗެމްޕިއަންޝިޕްގެ ފިރިހެން ޑިވިޝަނުގެ ފައިނަލުގައި އިއްޔެ ރޭ ރެޑްވިންގްސް ބާސްކެޓްބޯލް ކްލަބް އާއި ޓީރެކްސް ބާސްކެޓްބޯލް ބައްދަލުކުރި މެޗްގެ ތެރެއިން. މުބާރާތުގެ ޗެމްޕިއަންކަން ހޯދީ ޓީރެކްސް ބާސްކެޓްބޯލް އިން. -- ފޮޓޯ: އަބްދުﷲ އިޔާން/އަދަދު