އިނގިރޭސި ވިލާތުގެ އަމީރު ހެރީ އާއި އަނބިކަނބަލުން މޭގަންގެ މުސްތަގުބަލާ މެދު މަޝްވަރާ ކުރުމަށް ބޭއްވި ބައްދަލުވުމުގައި ބޭބޭފުޅު އަދި ވަލީ އަހުދު އަމީރު ވިލިއަމް ކޯފާވެވަޑައިގެން ހަޅޭއްލެއްވެވި ކަމަށް ހެރީ ތުހުމަތު ކުރައްވައިފި އެވެ.
ނެޓްފްލިކްސްގައި ޕްރިމިއާ ކުރި ސީރީޒް "ހެރީ އެންޑް މޭގަން"ގެ އެޕިސޯޑެއްގައި ހެރީ ވިދާޅުވީ ޝާހީ އާއިލާއާ ދުރަށް ޖެހުމަށް ނިންމެވީ އެމަނިކުފާނު ކަމަށާއި އެއީ މޭގަންގެ ނިންމެވުމެއް ނޫން ކަމަށެވެ.
ހެރީ އާއި މޭގަންގެ މުސްތަގްބަލާ ގުޅޭ އާއިލީ ބައްދަލުވުން އޮތީ 2020 ވަނަ އަހަރު ސާންޑްރިގްހަމްގަ އެވެ. ހެރީ ވިދާޅުވީ ފުރަތަމަ ހުށަހެޅުއްވީ ކޮންމެވެސް ވަރަކަށް ޝާހީ ކަންކަމުގައި އުޅުމަށް ކަމަށެވެ. އެހެން ނަމަވެސް ޝާހީ އާއިލާއިން އެ ހުށަހެޅުން ގަބޫލެއް ނުކުރި އެވެ.
ހެރީ ވިދާޅުވީ ބައްޕާފުޅު އަދި މިހާރުގެ ރަސްގެފާނު ޗާލްސް އެ ބައްދަލުވުމުގައި ދެއްކެވީ "ހަގީގަތެއް ނެތް ވާހަކަތަކެއް" ކަމަށެވެ. އޭރު މާމާފުޅު އަދި ދާދި ފަހުން އަވަހާރަވި ރާނީ އެލިޒަބަތު މަންޒަރު ބަލަން އިންނެވި ކަމަށް ވިދާޅުވި އެވެ.
ހެރީގެ ތުހުމަތުތަކާ ގުޅޭ ގޮތުން ޝާހީ ގަނޑުވަރު ބަކިންހަމް ޕެލެސްއިން ވަކި އެއްޗެއް ނުބުނެ އެވެ.
ޑޮކިޔުސީރީޒްގެ އެންމެ ފަހު އެޕިސޯޑުގައި ހެރީ އާއި މޭގަން ގެނެސްދެއްވީ ޝާހީ އާއިލާއާ ދުރަށް ޖެހުމަށް ނިންމެވި ސަބަބުތަކެވެ. އެގޮތުން ޝާހީ އާއިލާގެ އެއްބާރުލުން ނުލިބުމާއި މޭގަންއާ ގުޅޭ ގޮތުން އިނގިރޭސި މީޑިއާއިން ދޮގު ހަބަރު ފެތުރި ކަމަށް ފާހަގަކުރެއްވި އެވެ.
ހަ އެޕިސޯޑް ހިމެނޭ "ހެރީ އެންޑް މޭގަން" ސީރީޒްގެ ފަހުން ތިން ބައި ނެރުނީ ބުރާސްފަތި ދުވަހު އެވެ. އެ ސީރީޒްގެ މަންޒަރުތައް ޝޫޓުކުރީ މިދިޔަ ސެޕްޓެމްބަރު މަހު ރާނީ އެލިޒަބަތު އަވަހާރަވުމުގެ ކުރިންނެވެ. ހެރީ ލިޔުއްވި ފޮތް "ސްޕެއާ" ނެރުމަށް ހަމަޖެހިފައި ވަނީ ޖެނުއަރީގަ އެވެ.
