މިދިޔަ މަހުގެ 11 ވަނަ ދުވަހު ފުލުހުންނާއި ސިފައިން ގުޅިގެން ފެށި ކައުންޓާ ޓެރަރިޒަމް އޮޕަރޭޝަނުގައި ފެއިލްކޮށްލި ހަމަލާގެ ތަހުގީގަށް ބޭރުގެ ތަހުގީގީ އިދާރާތަކުގެ އެހީތެރިކަން ލިބެމުންދާ ކަމަށް ޕޮލިސް ކޮމިޝަނަރު މުހައްމަދު ހަމީދު ވިދާޅުވެއްޖެ އެވެ.
މި އޮޕަރޭޝަނާ ގުޅިގެން "އަދަދު" އަށް މައުލޫމާތު ދެއްވަމުން ހަމީދު ވިދާޅުވީ ތަހުގީގު ކުރެވެމުންދާ މިންވަރަކުން މައްސަލައިގެ ތަފުސީލުތައް ފުލުހުން ހާމަ ކުރާނެ ކަމަށެވެ.
އަދި މިއީ މިހާތަނަށް ރާއްޖޭގައި ދޭން އުޅުނު އެންމެ ނުރައްކާތެރި ޓެރަރިސްޓު ހަމަލާކަންވެސް ހަމީދު ފާހަގަ ކުރެއްވި އެވެ.
"[މި އޮޕަރޭޝަނަކީ] ބަޔަކު މީހުން ހަމަލާއެއް ދޭން ރާވަމުން ދިޔަ ކަން އެނގިގެން އެކަން ހުއްޓުވަން އެޅި ފިޔަވަޅެއް،" ހަމީދު ވިދާޅުވި އެވެ.
އޭނާ މީގެ ކުރިން ނޫސްވެރިންނަށް ވިދާޅުވެފައިވަނީ މި ހަމަލާ ރާވަމުންދާ ކަމުގެ މައުލޫމާތު ފުލުހުންނަށް ފުރަތަމަ ލިބުނީ މި އަހަރުގެ ޖޫން މަހުގެ ތެރޭގައި ކަމަށެވެ.
މި ހަމަލާ ހުއްޓުވަން، އައްޑޫ، މާލެ އަދި ކ. ގުރައިދޫއިން 14 މީހަކު ހައްޔަރުކުރި މި އޮޕަރޭޝަނުގައި ސަލާމަތީ ބާރުތަކުން ވަނީ އެމީހުން ބޭނުންކުރަމުން ގެންދިޔަ ގިނަ އަދަދެއްގެ ތަކެތި ވެސް އަތުލައިގަނެފަ އެވެ.
މީގެ ތެރޭގައި ގޮވާތަކެތި ހެދުމަށް ބޭނުންކުރާ ކެމިކަލްތަކެއް ފެނިފައިވާ ކަަމަށްވެސް ފުލުހުން ވަނީ މައުލޫމާތު ދީފަ އެވެ.
ހަމީދު ވިދާޅުވި ގޮތުގައި މިހާރު އެ ތަކެތީގެ ފޮރެންސިކް ތަހުލީލުތައް ހެދުމުގެ މަސައްކަތް ކުރަމުންދާ ކަމަށެވެ.
"އާންމުކޮށް ތަހުގީގުތަކަށް އެހީތެރިވާ ބޭރު ގައުމުތަކުގެ ޓީމުތަކުން ރާއްޖެ އައިސް ތަހުގީގު ޓީމަށް އެހީތެރިވަމުން ދަނީ،" ހަމީދު ވިދާޅުވި އެވެ.
މި މައްސަލައިގައި ފުލުހުން ހައްޔަރުކުރި އެންމެން މިހާރު ތިބީ ކޯޓުން ބަންދުގެ މުއްދަތު ޖަހާފަ އެވެ. އޭގެ ތެރެއިން ފަސް މީހަކު ޝަރީއަތް ނިމެންދެން ބަންދުކުރުމަށް ކޯޓުން ވަނީ އަމުރުކޮށްފަ އެވެ.
