ގދ. ތިނަދޫގައި ހުންނަ ޑްރަގް ޑިޓޮކްސިފިކޭޝަން އެންޑް ކޮމިއުނިޓީ ރީހެބިލިޓޭޝަން ސެންޓަރު މަރާމާތުކުރަން، އުސޫލާ ހިލާފަށް އަމިއްލަ ކުންފުންޏަކާ ހަވާލުކުރި މައްސަލާގައި ޖެންޑާ މިނިސްޓްރީގެ ކުރީގެ އިސް ތިން ވެރިއެއްގެ މައްޗަށް ދައުވާ ކޮށްދިނުމަށް އެދިއްޖެ އެވެ.
އެންޓި ކޮރަޕްޝަން ކޮމިޝަން (އޭސީސީ) އިން ޕްރޮސެކިއުޓާ ޖެނެރަލްގެ އޮފީހުގައި ދައުވާކޮށްދިނުމަށް އެދިފައިވާ ތިން މީހުންނަކީ ޖެންޑާ މިނިސްޓްރީގެ ކުރީގެ ސްޓޭޓް މިނިސްޓަރު އާއިޝަތު ރަޝީދު، މިނިސްޓްރީގެ ޑިރެކްޓަރު ހުދޫދާ ވަހީދު އަދި މިނިސްޓްރީގެ ޑިރެކްޓަރު އާމިނަތު ޝިހާމާގެ މައްޗަށެވެ.
ސ. ހިތަދޫ ހަނދުވަރީގެ، އާއިޝަތު ރަޝީދު އާއި ގދ. ތިނަދޫ ނޫވިލު، ހުދޫދާ ވަހީދުގެ އިތުރުން ގދ. ގައްދޫ ވިލިގަލާ އާމިނަތު ޝިހާމާގެ މައްޗަށް ދެ ދައުވާއެއް ކުރުމަށް އެދިފައިވެ އެވެ. އެއީ ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާ އަދި ދައުލަތަށް ފައިދާއެއް ލިބެން އޮތް ކަމެއްގައި އެ ނޫން ގޮތަކަށް އަމަލުކުރުމުގެ ދައުވާ އެވެ.
ތިނަދޫގެ ޑްރަގް ޑިޓޮކްސިފިކޭޝަން އެންޑް ކޮމިއުނިޓީ ރީހެބިލިޓޭޝަން ސެންޓަރުގައި ކުރަން ހުރި މާރާމާތުގެ މަސައްކަތް ކޮށްދޭނެ ފަރާތެއް ހޯދުމަށް ނޭޝަނަލް ޑްރަގް އެޖެންސީން އިއުލާން ކުރީ 2019 ވަނަ އަހަރުގެ ތެރޭގަ އެވެ.
އޭސީސީން ބުނީ އެ އިއުލާނާ ގުޅިގެން ހުށަހެޅި ބިޑުތައް އެ އެޖެންސީން އިވެލުއޭޓުކޮށް، އިއުލާނާ ގުޅޭ މައުލޫމާތު ކަރުދާހުގައިވާ ކްރައިޓީރިއާއާ އެއް ގޮތަށް ޕޮއިންޓް ދިނުމުން، އެންމެ މަތިން މާކްސް ލިބުނު ފަރާތަށް މަސައްކަތް ހަވާލު ނުކުރާ ކަމަށެވެ.
އޭގެ ބަދަލުގައި އެ މަސައްކަތް ހަވާލުކޮށްފައި ވަނީ އިވެލުއޭޝަނުން ދެވަނައަށް ދިޔަ ކުންފުންޏަށް ކަމަށް އޭސީސީން ބުންޏެވެ. އެ ގޮތަށް ނިންމީ މަސައްކަތް ހަވާލުކުރި ފަރާތަށް ނާޖާއިޒު މަންފާއެއް ހޯދައިދިނުމުގެ މަގުސަދުގައި ކަން ތަހުގީގަށް އެނގިފައިވާ ކަމަށް އޭސީސީން ބުންޏެވެ.
އިވެލުއޭޝަނުން ދެވަނައަށްދިޔަ ކުންފުންޏާ އެ މަސައްކަތް ހަވާލު ކުރުމަށް ނިންމާފައި ވަނީ އިވެލުއޭޝަނުން އެއްވަނައަށް ދިޔަ ފަރާތަށް ވުރެ 657,846.60ރ. ބޮޑުކޮށް ކަމަށް ވެސް އޭސީސީން ބުންޏެވެ.
