ލަންޑަން، އިނގިރޭސިވިލާތް (ޑިސެމްބަަރު 12) - އިނގިރޭސިވިލާތުގެ ވަލީ އަހުދު އަމީރު ވިލިއަމް ހިމާޔަތް ކުރަން ޝާހީ އާއިލާއިން ދޮގުހެދި ކަމަށް އަމީރު ހެރީ ތުހުމަތު ކުރައްވައިފި އެވެ.
ހެރީ އާއި އަނބިކަނބަލުން މޭގަން އުފެއްދެވި ޑޮކިޔުސީރީޒް ނެޓްފްލިކްސްގައި ދައްކަން ފަށާފައިވާ އިރު، މި ހަފުތާގައި އޭގެ ބާކީ ހުރި އެޕިސޯޑުތައް ނެރޭނެ އެވެ.
މިދިޔަ ހަފުތާގައި ނެރުނު ތިން އެޕިސޯޑުގައި ގިނައިން ފެނުނީ އިނގިރޭސި މީޑިއާއިން ހެރީ އާއި މޭގަންއާ މެދު އަމަލު ކުރި ގޮތާއި އޭގެ ސަބަބުން އެ މީހުންގެ ގުޅުމަށް ކުރި އަސަރުގެ ވާހަކަތަކެވެ.
މި ޑޮކިޔުމެންޓްރީއާ ގުޅިގެން ޝާހީ އާއިލާއަށް ވަނީ ޕްރެޝަރާ ކުރިމަތިވެފަ އެވެ. މިދިޔަ އަހަރު ހެރީ އާއި މޭގަން އޯޕްރާ ވިންފްރީއަށް ދެއްވި އިންޓަވިއުގައި ވެސް އާއިލާއަށް ގިނަ ތުހުމަތުތަކެއް ކުރެއްވި އެވެ.
އެކަމަކު ފުރަތަމަ އެޕިސޯޑުތަކުގައި ޝާހީ އާއިލާއާ ގުޅޭ ތުހުމަތުތަކެއް ފެންމަތިނުވެ އެވެ. އެހެން ނަމަވެސް ބާކީ ހުރި އެޕިސޯޑްތަކާ ގުޅޭ ޓްރެއިލާ އާއްމު ކުރުމާ އެކު މަންޒަރު ބަދަލުވާން އުޅޭ ކަމަށް ބެލެވެ އެވެ.
"ޝާހީ އާއިލާއިން އޮތީ އަޅުގަނޑުގެ ބޭބެ ހިމާޔަތް ކުރަން ދޮގުހަދަން ތައްޔާރަށް. އެކަމަކު އަޅުގަނޑުމެން ހިމާޔަތް ކުރަން ތެދު ހާމަކުރާކަށް ތައްޔާރެއް ނޫން،" ޓްރެއިލާގައި ހެރީ ވިދާޅުވި އެވެ.
"އަޅުގަނޑު އެއްލާލީ ވަލު ހިޔަޅުތަކާ ދިމާލަށް. އެ މީހުން އަޅުގަނޑު ކާން ދިނީ އެ ހިޔަޅުތަކަށް،" މޭގަން ވިދާޅުވި އެވެ.
ޝާހީ ގަނޑުވަރު ބަކިންހަމް ޕެލެސްއިން ބުނީ ޑޮކިޔުސީރީޒްއާ ގުޅޭ ގޮތުން ވަކި އެއްޗެއް ނުބުނާނެ ކަމަށެވެ. ނެޓްފްލިކްސުން ބުނީ ތުހުމަތުތަކަށް ރައްދު ދޭން ފުރުސަތު ދިނުމުން، ޝާހީ އާއިލާއިން ވާހަކަދައްކަން ބޭނުން ނުވި ކަމަށެވެ.
އެހެން ނަމަވެސް ޝާހީ އާއިލާއާ ގުޅުން ހުރި މަސްދަރަކުން ބުނީ ޝާހީ ގަނޑުވަރު އަދި އަމީރު ވިލިއަމްގެ މަންދޫބުންނާ ވެސް ގުޅާފައި ނުވާ ކަމަށެވެ.
