އޭޝިއަން ބީޗް ހޭންޑްބޯޅަ ރެފްރީސްގެ މުހިންމު ކޯހެއްގައި ބައިވެރިވެ، ރަނގަޅު ލެވަލެއްގެ ތަމްރީންތަކެއް ރާއްޖޭގެ ދެ ރެފްރީން ކަމަށްވާ އަބްދުﷲ ސަމީހު އާއި އަބޫބަކުރު އަލީ ހާސިލްކޮށްފި އެވެ.
ސަމީހު އާއި އަބޫބަކުރު އޭޝިއާގެ ސަރަހައްދުގެ ބީޗް ހޭންޑްބޯޅަ ރެފްރީގެ މި ކޯހުން މުހިންމު ކަންތައްތަކެއް ހާސިލްކުރިއެވެ. މިދިޔަ މަހުގެ 15-19 ތައިލެންޑުގެ ވެރިރަށް ބެންގްކޮކްގައި ކުރިއަށް ދިޔަ ކޮންޓިނެންޓަލް ބީޗް ހޭންޑް ބޯލް ރެފްރީ ކޯހުގައި ބައިވެރިވެ، ސަމީހު އާއި އަބޫބަކުރަށް ކެރިއަރުގައި ކުރިއަށްދާން އިތުރު ފުރުސަތު ފަހިވާނެ އެވެ.
އޭޝިއަން ހޭންޑްބޯޅަ ފެޑަރޭޝަން (އޭއެޗްއެފް) އިން ކުރިއަށްގެންދިޔަ މި ކޯހުގައި ރާއްޖޭގެ އިތުރުން އިރާން، ސައުދީ އަރަބިއްޔާ، ކޮރެއާ، ސިންގަޕޫރު، ތައިލެންޑް، ކުވެއިތު، ބަހްރެއިންގެ އިތުރުން ފިލިޕީންސްގެ ރެފްރީންވެސް ބައިވެރިވި އެވެ.
އަބްދުﷲ ސަމީހު އާއި އަބޫބަކުރު އަލީ އަށް ކޮންޓިނެންޓަލް ބީޗް ހޭންޑް ބޯލް ރެފްރީ ކޯހުން ފުރުސަތު ދިނީ ހޭންޑްބޯޅަ އެސޯސިއޭޝަން އޮފް މޯލްޑިވްސް އިންނެވެ.
ސަމީހު އަކީ މި ވަގުތު ރާއްޖޭގައި ތިބި ރެފްރީންތަކުގެ ތެރެއިން އެންމެ ސީނިއާ އަދި އެންމެ ތަޖުރިބާކާރު އެއް ރެފްރީ އެވެ. ހދ. ކުޅުދުއްފުށީގެ އަބޫބަކުރު އަލީ އަކީ މިވަގުތު އަތޮޅުތަކުގައި ތިބި ރެފްރީންގެ ތެރެއިން އެންމެ ފާހަގަކޮށްލެވޭ ރެފްރީ އެވެ.
ތިއަރީ އާއި ޕްރެކްޓިކަލް ބައިވެސް ހިމެނޭ ގޮތަށް ކުރިއަށްދިޔަ ކޯހުގައި ހަތަރު ޓެސްޓެއް ސާމިހު އާއި އަބޫބަކުރު ވަނީ ފުރިހަމަކޮށްފަ އެވެ. އެއީ ރޫލް ޓެސްޓާއި، އޯޕަން ރޫލް ބުކް ޓެސްޓާއި، ފިޓްނަސް ޓެސްޓުގެ އިތުރުން ވީޑިއޯ ޓެސްޓެކެވެ.
ރާއްޖޭގެ ދެ ރެފްރީންކަމަށްވާ ސަމީހު އަދި އަބޫބަކުރު، ކޮންޓިނެންޓަލް ބީޗް ހޭންޑް ބޯލް ރެފްރީ ކޯހުގެ ބައިވެރިންނާއިއެކު
މި ލިބުނު ފުރުސަތާ އެކު އޭޝިއާ ސަރަހައްދުގައި ބާއްވާ ބީޗް ހޭންޑްބޯޅަ މުބާރާތްތަކުގައި ރެފްރީކަން ކުރުމުގެ ފުރުސަތު މި ދެ ރެފްރީންނަށް ލިބޭނެ އެވެ. އަދި ރާއްޖޭގައި ބީޗް ރެފްރީން ތަމްރީންކުރުމަށް އޭއެޗްއެފް އެޕްރޫވްޑް ލައިސެންސެއް ވެސް ސާމިހު އާއި އަބޫބަކުރު އަލީ އަށް ލިބޭނެ އެވެ.
އޭއެޗްއެފްގެ ބީޗް ހޭންޑްބޯޅަ ރެފްރީ ކޯހުގައި ދެން، ސާމިހު އާއި އަބޫބަކުރުގެ ފިޒިކަލް އަދި ތިއަރީ އިވެލުއޭޝަންތަކެއް އޭއެޗްއެފްއިން ކުރިއަށް އޮތް ހަތަރު އަހަރު ހަދާނެ އެވެ. އޭގެ ފަހުން ދުނިޔޭގެ ބީޗް ހޭންޑްބޯޅަ ރެފްރީގެ އެކި ލެވެލްތައް ފުރިހަމަކުރުމުގެ ފުރުސަތު މި ދެ ބައިވެރިންނަށް ލިބޭނެ އެވެ.
ހޭންޑްބޯޅަ އަކީ މި ވަގުތު ރާއްޖޭގައި އެންމެ ބާރަށް ކުރިއަރަމުން އަންނަ އެ ކުޅިވަރެވެ. އެ ގޮތުން އަތޮޅުތަކުގައި ވެސް އެކި ފެންވަރުގައި ހޭންޑްބޯޅަ މުބާރާތްތައް ބާއްވަމުން އަންނައިރު، މާލޭގައި ސްކޫލްތަކުގެ އެކި ގްރޭޑްތަކުން ފެށިގެން ސަރުކާރު އޮފީސް ކުންފުނިތަކުން ވެސް ހޭންޑްބޯޅައިގެ ގިނަ މުބާރާތްތަކެއް ބާއްވަމުން އަންނަކަން ފާހަގަކޮށްލަން ޖެހެ އެވެ.
