ޕާކިސްތާންގެ ތަޖުރިބާކާރު ކޯޗު އާސިމް ރަޝީދުއާ އެކު، ގައުމީ ބީޗް ހޭންޑްބޯޅަ ޓީމުގެ ޕްރެކްޓިސްތައް ފެށިގެން ކުރިއަށްދާއިރު، މިހާރު ވެސް ކަންކަން ރޭވިފައި އޮތީ ޓާގެޓްތަކެއް އޮތް ޕްލޭނެއްގެ ދަށުން ކަމަށް ހޭންޑްބޯލް މޯލްޑިވްސް އިން ބުނެފި އެވެ.
އަންނަ އަހަރުގެ ފެބްރުއަރީ 18 އިން 23 އަށް ޕާކިސްތާންގެ ކަރާޗީގައި އޮތް ހޭންޑްބޯޅައިގެ ކޮމަންވެލްތު ބީޗްގޭމްސް އަށް ހދ. ކުޅުއްދުއްފުށީގައި 38 ކުޅުންތެރިންނާ އެކު ގައުމީ ބީޗް ހޭންބޯޅަ ސްކޮޑު އެކުލަވާލުމުގެ މަސައްކަތް މި މަހުގެ 15 އިން ފެށިގެން އަންނަނީ ކުރިއަށްދަމުންނެވެ.
އެ ގޮތުން، މި މަސައްކަތަށް ހޭންޑްބޯލް މޯލްޑިވްސް އިން ހަމަޖައްސާފައިވަނީ، ތަޖުރިބާކާރު އަދި ކާމިޔާބު ކޯޗު އާސިމް ރަޝީދު އެވެ. ޕާކިސްތާނަށް ބީޗްހޭންޑްބޯޅައިން ގިނަ މެޑަލްތަކެއް ހޯދައިދީފައިވާ، އާސިމް އަކީ އިންޓަނޭޝަނަލް ހޭންޑްބޯޅަ ފެޑެރޭޝަން (އައިއެޗްއެފް) އާއި އޭޝިއަން ހޭންޑްބޯޅަ ފެޑެރޭޝަނުގައި ޓެކްނިކަލް ގިނަ މަސައްކަތްތަކެއް ކޮށްފައިވާ ފަރާތެކެވެ. އަދި އޭޝިއަން ހޭންޑްބޯޅަ ފެޑެރޭޝަނުގެ ޓެކްނިކަލް ކޮމިޓީގައި ވެސް މުހިންމު މަސައްކަތްކެއް ކުރި އާސިމް ވަނީ، އޭޝިއާގެ މުބާރާތްތަކުގައި އިސް ޓެކްނިކަލް އޮފިޝަލެއްގެ ގޮތުގައި މަސައްކަތްކޮށްފަ އެވެ.
"އަދަދު ސްޕޯޓްސް" އަށް ދިން އިންޓަވިއުއެއްގައި، ހޭންޑްބޯލް މޯލްޑިވްސްގެ ރައީސް އަހުމަދު މުޖުތަބާ (މުޖޭ) ވިދާޅުވީ، ޕާކިސްތާން ހޭންޑްބޯޅަ ފެޑެރޭޝަނުން އެ ގައުމުގެ ބީޗްހޭންޑްބޯޅައިގެ އެންމެ ރަނގަޅު ކޯޗު ރާއްޖެ އަށް ހަމަޖައްސައިދިނުމުން އެކަން ފާހަގަކުރާ ކަމަށެވެ. އަދި މިހާރުން ފެށިގެން ޕްލޭން ހަދަމުން އަންނަނީ، ފެބްރުއަރީ މަހު އޮތް ކޮމަންވެލްތު ބީޗް ހޭންޑްބޯޅަ މުބާރާތަށް އެކަނި ނޫން ކަމަށާއި އެ އަށް ވުރެ ދުރަށް ވިސްނައި މެޑަލް ޓާގެޓެއް ވެސް އެބައޮތް ކަމަށެވެ.
"އަޅުގަނޑުމެންނަށް މި ލެވަލްގެ ރަނގަޅު ކޯޗެއް ލިިބިފައި ހުރީމަ ލޯންގް ޓާމްކޮށް މި ވިސްނަނީ، މިހާރު މި ކޯޗު މި ހަމައެކަނި ސިލެކްޝަނެއް ނޫން މި ހަދަނީ، ބީޗްހޭންޑްބޯޅަ އުނގަނައިދީ، މީގެ ކުޅުންތެރިން ޑިވެލޮޕްކުރަމުން މޮޅުކުރަމުން، އޭނާގެ ޕްލޭނަށް ބޭނުންވާ ސިލެކްޝަނެއް މި ހަދަނީ، ދެން، އޭނަ (އާސިމް) ކައިރީގައި ދިވެހި ރަނގަޅު ކޯޗެއް ވެސް ޑިވެލޮޕް އެބަކުރަން، އެއީ މުސްތަގުބަލަށް ވިސްނާފައި،" މުޖޭ ވިދާޅުވި އެވެ.
ކުޅުދުއްފުށީގައި ކުރިއަށްދާ ގައުމީ ބީޗްހޭންޑްބޯޅަ ޓީމުގެ ސިލެކްޝަނުގެ ތެރެއިން.--- ފޮޓޯ: ނަވާޒް އައްސަދު
"ހުދު ކަރުދާހެއްގައި ކަޅުކުލައިން ލިޔެގެން ސާފުކޮށް ފެންނަ ގޮތަށް، ޕްލޭނެއް ހެދިގެން މި މަސައްކަތް ކުރަނީ. އަޅުގަނޑުމެން މިހާރު މި ހުރި ކޯޗުގެ އެހީގައި، ރަނގަޅު ދިވެހި ކޯޗެއް އެބަ ތަމްރީނުކުރަން، ދެން، މީގެ ޓާގެޓަކީ، އަންނަ އަހަރު މި އޮތް ސައުތު އޭޝިއަން ގޭމްސްގައި، ބީޗް ހޭންޑްބޯޅައިން މެޑަލަކަށް ޓާގެޓްކުރުން،"
ގައުމީ ބީޗްހޭންޑްބޯޅަ ޓީމު ޕްރެކްޓިސް އަށް ހުޅުވާލުމުން 44 ކުޅުންތެރިއަކު ފޯމު ހުށަހެޅި އެވެ. އެކަމަކު، ޕްރެކްޓިސް ފެށީ 38 ކުޅުންތެރިންނާ އެކު އެވެ. ކުޅުދުއްފުށިން 31 ކުޅުންތެރިއަކު މި ސިލެކްޝަންގައި ބައިވެރިވާއިރު، ބާކީ ކުޅުންތެރިން އައިސްފައިވަނީ ރާއްޖޭގެ އެކި ހިސާބުތަކުން ކަމަށް ހޭންޑްބޯޅަ މޯލްޑިވްސް ހާމަކޮށްފައިވެ އެވެ.
ދިހަ ދުވަސްވަންދެން ދުވާލަކު ދެއިރު ޕްރެކްޓިސް ކުރުމަށް ފަހު، 16 ކުޅުންތެރިންގެ ސިލެކްޝަނެއް ހަދައި، ސްކޮޑު ފައިނަލް ކުރާނީ މުބާރާތާ ގާތްކޮށްފަ އެވެ. މުޖޭ ވިދާޅުވީ، ސިލެކްޝަނާއި ސްކޮޑު ފައިނަލް ކުރުމުގެ ހުރިހާ ކަމެއް ދާނީ ކޯޗު އާސިމްގެ އިރުޝާދުގެ ދަށުން ކަމަށެެވެ.
