މާލެ އާއި އަތޮޅު ތެރޭގައި ހޭންޑް ފުޓް އެންޑް މައުތު ބަލި ފެތުރެމުންދާތީ ސަމާލުވުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިލްތިމާސްކޮށްފި އެވެ.
އެޗްޕީއޭއިން މިއަދު ކުރި ޓްވީޓެއްގައި ބުނީ މި ބަލި ފެތުރުން ހުއްޓުވުމަށް ޓަކައި، ބަލީގެ އަލާމަތްތައް ދެނެގަނެ ރައްކާތެރިކަމުގެ ފިޔަވަޅު އެޅުން މުހިންމު ކަމަށެވެ.
ވައިރަހެއްގެ ޒަރީއާއިން ފެތުރޭ މި ބަލި ޖެހުމުގެ ފުރުސަތު ކޮންމެ މީހަކަށް ވެސް އޮންނައިރު، ކުޑަކުދިންނަށް ބަލީގެ ނުރައްކާ ބޮޑު ކަމަށް އެޗްޕީއޭއިން ބުނެފައިވެ އެވެ.
ބަލީގެ އަލާމަތްތައް:
- ހުން އައިސް ބޮލުގައި ރިއްސުން
- ކަރުތެރެ ފާރުވުން
- ވަރު ދެރަވުން
- ކާހިތްނުވުން
- އަތްތިލަ އާއި ފައިތިލަގައި ބިހިތަކެއް ނެގުމަށްފަހު ފެން ފޮޅަކަށް ބަދަލުވުން
މި ބަލި ފެތުރެނީ ބަލި ޖެހިފައިވާ ކުއްޖެއްގެ ކުޅު، އަރިދަފުސް، ބޮޑުކަމުދާ ތަކެއްޗާއި ފޮޅުން ނިކުންނަ ދިޔައިންނާއި ކެއްސާ ކިނބިހި އަޅާއިރު ނޭވާލާ ނިޒާމުންނެވެ. ވައިރަސް ހަށިގަނޑުގައި އަށަގަންނަތާ ތިން ދުވަހާއި ހަތް ދުވަސް ތެރޭގައި އަލާމަތްތައް ފެންނަން ފަށަ އެވެ.
ބަލިން ރައްކާތެރިވުމަށް ގިނަގިނައިން އަތް ދޮވެ، ބަލި ޖެހިފައިވާ ކުދިން ބޭރަށް ނުގެންދިއުމަށާއި ބޭނުން ކޮށްފައި ހުންނަ ޓިޝޫއާއި ނެޕީ ފަދަ ތަކެތި ރައްކާތެރި ގޮތުގައި ނައްތާލުމަށް އެޗްޕީއޭއިން އިލްތިމާސް ކުރެ އެވެ.
