ވ. އާރަށް ކުއްޔަށް ދޭން ވެސް ކުރީގެ ރައީސް އަބްދުﷲ ޔާމީން ރުހުން ދެއްވާފައިވާ ނުވާ ކަމަށާއި، އިކޮނޮމިކް ޔޫތު ކައންސިލްގެ ނިންމުންތަކަށް ޔާމީން ރުހުން ދެއްވި ކަމަށް ދައުލަތުން ބުުނާ ލިޔުމުގައި ވެސް އެ މަޝްރޫއުގެ ގޮޅީގައި ފާހަގައެއް ޖައްސަވާފައި ނެތް ކަމަށް ޔާމީންގެ ވަކީލުން މިއަދު ބުނެފި އެވެ.
ޔާމީންގެ ވެރިކަމުގައި ހިނގައިދިޔަ އެމްއެމްޕީއާރުސީ ބޮޑު ހިޔާނާތުގެ ތެރޭގައި ހިމެނޭ އެއް މުއާމަލާތް ކަމަށް ބުނާ އާރަށުގެ މައްސަލާގައި ޔާމީންގެ މައްޗަށް މަނީ ލޯންޑަރިންގެ ދައުވާ އާއި ރިޝްވަތު ގަބޫލު ކުރުމުގެ ދައުވާ އަދި ރައްޔިތުންގެ މަޖިލީހުގެ ކުރީގެ މެންބަރު ޔޫސުފް ނައީމަށް ރިޝްވަތު ހިފުމުގެ ދައުވާ ކުރެ އެވެ.
ޓޫރިޒަމްގެ ބޭނުމަށް އާރަށް ދޫކުރުމުގެ މަސައްކަތް އެމްއެމްޕީއާރުސީއާ ހަވާލުކޮށް، ޓޫޖީ ނަމުގައި ޔޫސުފް ނައީމް އުފައްދަވާ ކުންފުންޏަކަށް ރަށް ހަވާލުކުރުމާއި، އޭގެ ފައިސާގެ މުއާމަލާތްތައް ހިންގީ ޔާމީންގެ އިރުޝާދުގެ ދަށުން ކަމަށް ދައުލަތުން ތުހުމަތު ކުރެ އެވެ.
ދައުލަތުން ޔާމީނާއި ޔޫސުފް ނައީމްގެ މައްޗަށް އުފުލާފައިވާ ދައުވާތައް ސާބިތުކުރުމަށް ހުށަހެޅި ކިތާބީ އެއް ހެއްކަކީ "އީޔައިސީ" ނަމުގައި އޭރު އުފައްދާފައި އޮތް ޔާމީންގެ ވަޒީރުންގެ މަޖިލީހުގެ ސަބް ކޮމިޓީން އެ ކަން ފާސްކުރި ޖަލްސާގެ ޔައުމިއްޔާއެކެވެ.
އެ ޔައުމިއްޔާއަކީ ސައްހަ ނޫން ލިޔުމެއް ކަން ސާބިތު ކުރަން ޔާމީން ހުށަހެޅި ހެކިންގެ ހެކިބަސް ދޮގު ކުރަން ވެސް ދައުލަތުން އިތުރު ލިޔެކިއުންތަކެއް އާ ހެކީގެ ގޮތުގައި ހުށަހަޅާފައިވެ އެވެ. އަދި ޝަރީއަތަށް އެ ހެކިތައް ބަލައިގަތުމަށް މައްސަލަ ބައްލަވާ ކްރިމިނަލް ކޯޓުގެ އިސް ގާޒީ އަހުމަދު ޝަކީލް ނިންމެވި އެވެ.
ހެއްކާ ގުޅޭ ގޮތުން ވާހަކަ ދެއްކުމުގެ މަރުހަލާގައި ޔާމީންގެ ވަކީލުން ގެންދަވަނީ ދައުލަތުގެ ކޮންމެ ހެއްކަކަށް ރައްދު ދެއްވުމުގެ ގޮތުން ވަރަށް ދިގުކޮށް ވާހަކަ ދައްކަވަމުންނެވެ. ޔާމީންގެ ވަކީލުންގެ ވާހަކަ ގެންދަވާ ތިންވަނަ ދުވަހުގެ ފުރަތަމަ ދަންފަޅީގައި ރައްދު ދެއްވަމުން ގެންދެވީ އެ އާ ހެއްކަށެވެ.
ޔާމީންގެ ދިފާއީ ވަކީލު އަބްދުﷲ ޝިޔާޒު ވިދާޅުވީ ދައުލަތުން ހުށަހެޅި ޝީޓްގައި ތިން މަޝްރޫއެއް ބަޔާންކޮށްފައިވާ ކަމަށެވެ. އެ ޝީޓަކީ އީޔައިސީގެ ނިންމުމަށް ޔާމީންގެ ރުހުން ދެއްވި ކަމަށް ބުނާ ޝީޓަށްވާއިރު، އެ ޝީޓު އޮތް ގޮތް ޝިޔާޒު ވިދާޅުވެ ދެއްވި އެވެ.
އެގޮތުން، ފުރަތަމަ ބަޔާންކޮށްފައިވާ ދެ މަޝްރޫއުގެ ގޮޅީގައި ރަނގަޅު ފާހަގައެއް ޖަހާފައިވާއިރު އާރަށުގެ މަޝްރޫއު ބަޔާންކޮށްފައިވަނީ ތިންވަނަ ގޮޅީގަ އެވެ. އެ ގޮޅީގައި ރަނގަޅު ފާހަގައެއް ނެތް ކަމަށާއި އެއިން އަންގައިދެނީ އާރަށް ކުއްޔަށް ދޫކުރުމަށް ޔާމީން ރުހުން ދެއްވާފައި ނެތް ކަމަށް ވަކީލު ވިދާޅުވި އެވެ.
ދައުލަތުން ހުށަހެޅި ޝީޓުގައި ވެސް ޔާމީންގެ ރުހުން ނެތް ކަން އެނގެން އޮތް އިރު، ޔާމީންގެ ވަކީލުން އަދިވެސް ވަކާލާތު ކުރެއްވީ، އެ ޔައުމިއްޔާތަކުގެ ސައްހަ ކަމާ މެދު ސުވާލު އުފެދޭ ކަމަށެވެ.
ޔާމީންގެ މައްޗަށް ދައުވާ ކުރުމަށް ދައުލަތުން ދެން ހުށަހަޅާފައިވާ ކިތާބީ ހެކިތަކަކީ އެ ރަށް ކުއްޔަށް ދޫކުރުމަށް ސޮއިކޮށްފައިވާ އެއްބަސްވުންތަކެވެ.
އޭގެ ތެރޭގައި ޓޫރިޒަމް މިނިސްޓްރީން އެމްއެމްޕީއާރުސީއަށް ދިނުމަށް ސޮއިކުރި "އެގްރިމެންޓް ފޮ ލީޒް" އާއި އެމްއެމްޕީއާރުސީއާއި ޓޫޖީއާ ދެމެދު ސޮއިކުރި "ސޭލް އެންޑް ޕާޗޭސް އެގްރިމެންޓް" އާއި "އެސްއޭ އައިލެންޑް ރިސޯޓް" އަށް އެ ރިސޯޓްގެ ހިއްސާ ވިއްކަން ޓޫޖީއާ އެކު ވެފައިވާ އެއްބަސްވުން ވެސް ހިމެނެ އެވެ.
މިއިން އެއްވެސް އެއްބަސްވުމެއްގައި ޔާމީންގެ މައްޗަށް ކުރާ ދެ ދައުވާގައި ހިމެނޭ ވާގިއާތަކަށް ބާރުދޭ އެއްވެސް ކަމެއް ނެތް ކަމަށް ޔާމީންގެ ވަކީލު ޝިޔާޒު ވިދާޅުވި އެވެ. އެގޮތުން، މައި ދެ ވާގިއާ، ރިޝްވަތު ގަބޫލު ކުރުމާއި އެ ފައިސާ ބަލައިގަތުމާއި ފައިސާ ލޯންޑަ ކުރި ކަން ސާބިތުވާ ހެއްކެއް ނެތް ކަމަށެވެ.
