ޖީއެސްޓީ އާއި ޓީޖީއެސްޓީ ބޮޑުކުރުމަށްޓަކައި ޓެކްސް ގާނޫނަށް ބަދަލުގެންނަން ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ބިލު ފާސްކުރުމާ ދެކޮޅަށް އަޑުއުފުލަން ރައްޔިތުންގެ މަޖިލީސް ކައިރީ ކުރަމުން ދިޔަ މުޒާހަރާގެ ތެރެއިން ތިން މީހަކު ހައްޔަރުކޮށްފި އެވެ.
ރައްޔިތުންގެ މަޖިލީސް ދޮށަށް އެއްވެ މުޒާހަރާ ކުރަމުން ދިޔައީ އިދިކޮޅު ޕީޕީއެމް އާއި ޕީއެންސީގެ ސަޕޯޓަރުންނެވެ. މަޖިލީސް ދޮރު ކުރިމައްޗަށް އެއްވުމާ އެކު ފުލުހުން ވަނީ އެ މީހުން ދުރަށް ޖައްސަމުން މަޖީދިއްޔާ ސްކޫލް ކުރިމަތީ ހުންނަ ގޯޅިއާ ހަމައަށް ގެންގޮސް ބެރިކޭޑް ޖަހައިފަ އެވެ.
މުޒާހަރާގެ ތެރެއިން ތިން މީހަކު ހައްޔަރުކޮށްފައިވާ ކަމަށް ޕީޕީއެމްގެ ތަރުޖަމާނު ހީނާ ވަލީދު ވިދާޅުވި އެވެ. މުޒާހަރާތަކުގެ ތެރެއިން ފުލުހުންގެ އަމުރަށް ކިޔަމަން ނުވާ މީހުން ފުލުހުންގެ ބެލުމުގެ ދަށަށް ގެންގޮސް، އިރުކޮޅެއްގެ ތެރޭގައި އާންމުކޮށް ދޫކޮށްލަ އެވެ.
ޖީއެސްޓީ ހަ ޕަސެންޓުން އަށް ޕަސެންޓަށް އަދި ޓީޖީއެސްޓީ 12 ޕަސެންޓުން 13 ޕަސެންޓަށް ބޮޑުކުރުމަށްޓަކައި ސަރުކާރުގެ ފަރާތުން އިހަވަންދޫ ދާއިރާގެ މެމްބަރު މުހައްމަދު ޝިފާއު ހުށަހެޅުއްވި ބިލު ރައްޔިތުންގެ މަޖިލީހުގެ މުޅި މަޖިލީހުގެ ކޮމިޓީން ދިރާސާކުރުމަށް ފަހު ނިންމީ އެ ބިލަށް އެއްވެސް ބަދަލެއް ނުގެނެސް ފާސްކުރުމަށެވެ.
ނަމަވެސް މިއަދާ ހަމައަށް ބިލަށް ރިޔާސަތުން ވޯޓަށް އަހާފައި ނެތް އިރު، ޓެކްސް ބޮޑުކުރުމަށް ޕީޕީއެމްއާއި ޕީއެންސީގެ އިތުރަށް، ރައީސް މުހައްމަދު ނަޝީދަށް ތާއީދުކުރައްވާ އެމްޑީޕީގެ މަޖިލިސް މެންބަރުން ވެސް ބިލު ފާސްކުރުމާ ދެކޮޅެވެ.
އެ ބިލަށް ވޯޓަށް އަހާފައިނުވަނީ މަޖިލީހުގެ ގަވާއިދާ ހިލާފަށް ކަމަށް ރައީސް އިބްރާހީމް މުހައްމަދު ސޯލިހަށް ތާއީދު ކުރައްވާ މެންބަރުން ދަނީ ވިދާޅުވަމުންނެވެ. ޓެކްސް ބޮޑުކުރުމަށް ސަރުކާރުން މަސައްކަތްކުރާއިރު، އެމްއެމްއޭގެ ގަވަރުނަރު އަލީ ހާޝިމް ވެސް ވަނީ މި ދަނޑިވަޅު ޓެކްސް ބޮޑުނުކުރުމަށް ލަފާ ދެއްވައިފަ އެވެ.
