އަންނަ އަހަރަށް ލަފާކޮށް، ސަރުކާރުން މަޖިލީހަށް ހުށަހަޅާފައިވާ ބަޖެެޓަކީ ވަރަށް އުއްމީދީ ބަޖެޓެއް ކަމަށް ރައްޔިތުންގެ މަޖިލީހުގެ މިއަދުގެ ޖަލްސާގައި ބަޖެޓަށް ބަހުސް ކުރެއްވި ގިނަ މެމްބަރުން ވިދާޅުވެއްޖެ އެވެ.
ބަޖެޓް ބަހުސްގައި މަރަދޫ ދާއިރާގެ އެމްޑީޕީ މެމްބަރު އިބްރާހީމް ޝަރީފު ވިދާޅުވީ އަންނަ އަހަރު ދުނިޔޭގެ ބޮޑެތި ގިނަ ގައުމުތަކުގެ އިގުތިސާދު ކުރިއަރާނެކަމަށް ލަފާކުރަނީ ވަަަރަށް ކުޑަކޮށް ކަމަށާއި އެހެން ނަމަވެސް މި ބަޖެޓް ރަނގަޅަށް ތަންފީޒުކޮށްފި ނަމަ ރާއްޖޭގެ އިގުތިސާދު ހަތް ޕަސެންޓުން ކުރިއަށްދާނެ ކަމަށެވެ. ރާއްޖޭގެ ނޮމިނަލް ޖީޑީޕީ 104 ޕަސެންޓަށް އަރައި، ރާއްޖޭގެ ރަސްމީ ރިޒާވް 106 މިލިޔަން ޑޮލަރުގައި ހުންނާނެ ކަމަށް ލަފާކުރެވޭ ކަމަށާއި ބަޖެޓް ތަންފީޒުކޮށް ނިމޭ އިރު ވެސް 16 ޕަސެންޓަށް ވުރެ ޑެފިސިޓް ބޮޑުނުވާނެ ކަމަށް ވެސް އޭނާ ވިދާޅުވި އެވެ.
"ސަރުކާރުން ހިކުމަތްތެރިކަމާ އެކު މިކަންކަން ކުރީމާ މިއަދު ޓޫރިޒަމް [ޓޫރިސްޓް އެރައިވަލް] 1.5 [މިލިޔަނު]ގައި ހުރެ މި އަންނަ އަހަރު 1.8 [މިލިޔަނުގައި] ހުންނަ އިރު އަޅުގަނޑަށް މާ ސާފުކޮށް، މާ ޔަގީންކަމާ އެކު އެނގޭ މި ސަރުކާރުން އިގުތިސާދު މެނޭޖްކުރާނެކަން،" ޝަރީފު ވިދާޅުވި އެވެ.
ހުޅުމާލެ ދާއިރާގެ އެމްޑިޕީ މެމްބަރު އަލީ ނިޔާޒު ވިދާޅުވީ ސަރުކާރުން ހުށަހަޅާފައިވާ ގޮތަށް ބަޖެޓް ތަންފީޒުކުރެވިއްޖެ ނަަމަ ރާއްޖެއަށް ކުރިއެރުން ލިބޭނެ ކަމަށާއި ރާއްޖެ ނުވެސް ދަރާނެ ކަމަށެވެ.
"އިރާދަކުރެއްވިއްޔާ، މި ބަޖެޓް މިގޮތަށް ހިނގައިފި ކަމަށް ވެއްޖެއްޔާ ރާއްޖެއަށް ކުރިއެރުން ލިބޭނެ. އިރާދަކުރެއްވިއްޔާ ރާއްޖެ ނުދަރާނެ. އަޅުގަނޑުމެން އިރާދަކެރެއްވިއްޔާ ކުރިއަށް އޮތް ތަނުގައި ވެސް ހަމަ ކެތްތެރިކަމާއި ހިކުމަތްތެރިކަމާއި ވިސްނުންތެރިކަމާ އެކުގައި މަސައްކަތް ކޮށް އަޅުގަނޑުމެންގެ ރާއްޖެ ކުރިއަށް ގެންދާނެ،" އަލީ ނިޔާޒު ވިދާޅުވި އެވެ.
ގަލޮޅު ދެކުނު ދާއިރާގެ އެމްޑީޕީ މެމްބަރު މީކާއީލް އަހުމަދު ނަސީމު ވިދާޅުވީ ދިވެހި ރައްޔިތުންގެ ދިރިއުޅުން މިއަހަރަށް ވުރެ އަންނަ އަހަރު ރަނގަޅުކުރަން މި ބަޖެޓުން ބާރު އަޅައިދޭ ކަމަށް ގަބޫލުކުރައްވާ ކަމަށެވެ. ބަޖެޓަށް ތާއީދުކުރައްވަނީ ރައްޔިތުންނަށް ލިބޭ ހިދުމަތްތައް މިހާރަށް ވުރެ ރަނގަޅަށް، މިހާރަށް ވުރެ ދެމެހެއްޓެނިވި ގޮތެއްގައި ލިބުމަށް ބަޖެޓުން ބާރު އަޅާ ކަމަށް ވެސް އޭނާ ވިދާޅުވި އެވެ.
"މުޅި ޖުމްލަކޮށް މި ބަޖެޓުން އަޅުގަނޑަށް އުއްމީދު ލިއްބައިދޭ،" މީކާއީލް ވިދާޅުވި އެވެ.
މޭލޭގެ 5،000 އާއިލާއަށް ގޯތި ދޫކުރެވޭނެ ގޮތަށް ބަޖެޓްގައި ފައިސާ ހިމާނާފައިވާތީ މާލޭގެ މެމްބަރެއްގެ ހައިސިއްޔަތުން އޭނާ މަރުހަބާ ވިދާޅުވި އެވެ.
"އިރާދަކެރެއްވިއްޔާ މިފަހަރު ނިމޭނީ ލިސްޓަކަށް، ގޯތި ލިބޭ މީހުންގެ ނަން އަރައިގެނެއް ނޫން. އިރާދަކުރެއްވިއްްޔާ އަންނަ އަހަރު މި މި ބަޖެޓް ފާސްވުމާ އެކު މާލޭގެ 5،000 އާއިލާ އަށް ގޯތީގެ ރަޖިސްޓްރީ ކަށަވަރުވާނެ ކަމަށް އަޅުގަނޑަށް ޔަގީން ކުރެވޭ،" މީކާއީލް ވިދާޅުވި އެވެ.
އަންނަ އަހަރަށް ސަރުކާރުން ހުށަހެޅީ 42 ބިލިޔަން ރުފިޔާގެ ބަޖެޓެކެވެ.
