މި އަހަރާ އަޅާބަލާއިރު، އަންނަ އަހަރު ސިޔާސީ މަގާމުތަކާއި އެކަމަށް ދައުލަތުން ކުރާ ހޭދަ ވެސް އިތުރުވާނެ ކަމަށް 2023 އަށް ސަރުކާރުން ލަފާކުރާ ދައުލަތުގެ ބަޖެޓުގައި ބުނެފި އެވެ.
މި އަހަރަށް ސަރުކާރުން ބަޖެޓުކުރީ 1،045 ސިޔާސީ މަގާމަކަށް 407.6 މިލިއަން ރުފިޔާ އެވެ.
އަންނަ އަހަރުގެ ބަޖެޓު ޑެފިސިޓު ފޫއްބަދަން ރައްޔިތުންގެ އަތުން ނަގާ ޓެކްސް ބޮޑުކުރަން ހިމަނާފައިވާއިރު، މިދިޔަ އަހަރާ އަޅާބަލާއިރު، އަންނަ އަހަރު ސިޔާސީ މަގާމުތަކުގެ ޖުމްލަ އަދަދު ވަނީ 1،068 އަށް އިތުރުވެފަ އެވެ.
މަގާމުތަކުގެ އަދަދު މިދިޔަ އަހަރާ އަޅާބަލާއިރު، މާބޮޑު ތަނެއް އިތުރުވެފައިނުވި ނަމަވެސް، މުސާރައަށް ކުރާ ހޭދަ އިތުރެވެ. މިގޮތުން، އަންނަ އަހަރު ސިޔާސީ މަގާމުތަކުގެ މުސާރައަށް ކުރާ ހޭދަ 452.9 މިލިއަން ރުފިޔާ އަށް އަރަ އެވެ. އެއީ މިދިޔަ އަހަރާ އަޅާބަލާއިރު، ގާތްގަނޑަކަށް 45 މިލިއަން ރުފިޔާގެ އިތުރުވުމެކެވެ.
ވަކިވަކި އޮފީސްތަކަށް ބަލާއިރު، އަންނަ އަހަރު ވެސް އެންމެ ގިނަ ސިޔާސީ މަގާމުތައް ބަޖެޓުކޮށްފައިވަނީ ރައީސް އޮފީސް އަށެވެ. އެ އޮފީހުގައި 410 ސިޔާސީ މަގާމު ހިމަނާފައިވާއިރު، އެ މަގާމުތަކުގެ މުސާރައަށް 110.85 މިލިއަން ރުފިޔާ ވަނީ ބަޖެޓުކޮށްފަ އެވެ.
ދެވަނަ އަށް ސިޔާސީ މަގާމު އެންމެ ގިނައީ ހެލްތު މިނިސްޓްރީގަ އެވެ. އެ މިނިސްޓްރީގައި 140 ސިޔާސީ މަގާމަކަށް 33.87 މިލިއަން ރުފިޔާ އަންނަ އަހަރު ހޭދަވާނެ ކަމަށް ވަނީ ލަފާކޮށްފަ އެވެ.
ޖުމްލަ 108 ސިޔާސީ މަގާމާއެކު ފޮރިން މިނިސްޓްރީ ލިސްޓުގެ ތިންވަނައިގަ އޮތް ނަމަވެސް، އެންމެ ބޮޑު ހޭދައެއް ކުރަނީ އެ މަގާމުތަކަށެވެ. ރާއްޖޭން ބޭރުގައި ހުންނަ ޑިޕްލޮމެޓިކް މިޝަންތަކަށް ވެސް އޭގެ ތެރެއިން ގިނަ މަގާމުތަކެއް ކަނޑައަޅާނެއިރު، އެކަމަށް 165.19 މިލިއަން ރުފިޔާ ބަޖެޓުކޮށްފައިވެ އެވެ.
ރައީސް އިބްރާހިމް މުހައްމަދު ސޯލިހުގެ ދައުރުގެ ފަހު އަހަރަށް ހުށަހަޅާފައިމިވަނީ 42.6 ބިލިއަން ރުފިޔާގެ ބަޖެޓެކެވެ.
ބަޖެޓުގެ 40.557 ބިލިއަން ރުފިޔާ ހަރަދުގެ ގޮތުގައި ހިނގާނެ ކަމަށް ބެލެވޭއިރު އޭގެ ތެރެއިން އެންމެ ގިނަ ބޮޑު ބައެއް ހިއްސާކުރަނީ މުވައްޒަފުންގެ މުސާރަ ހަރަދެވެ.
މިގޮތުން، އަންނަ އަހަރު މުވައްޒަފުންގެ މުސާރައިގެ ހަރަދަށް އެކަނި ޖުމްލަ 10.6 ބިލިއަން ރުފިޔާ ހަރަދުވާނެ ކަމަށް ވަނީ އަންދާޒާކޮށްފަ އެވެ.
މީގެ ތެރޭގައި އެންމެ ގިނައީ ސިވިލް ސާވިސް މުވައްޒަފުންނެވެ. މިގޮތުން، އަންނަ އަހަރު 26،061 ސިވިލް ސާވަންޓުންނަށް 5.13 ބިލިއަން ރުފިޔާ ވަނީ ބަޖެޓުކޮށްފަ އެވެ.
