ކޮޕް 27 ގައި ބައިވެރިވެވަޑައިގަތުމަށް ރައްޔިތުން މަޖިލީހުގެ ރައީސް މުހައްމަދު ނަޝީދު މިސްރަށް ފުރާވަޑައިގަންނަވައިފި އެވެ.
މި މަހުގެ 9 ވަނަ ދުވަހުގެ ނިޔަލަށް މިސްރުގެ ޝާމް-އަލް-ޝާއިހް ގައި ކުރިއަށްދާ އދ. ގެ ތިމާވެއްޓާއި މޫސުމީ ބަދަލުތަކާ ބެހޭ މި ސަމިޓުގައި ބައިވެރިވެވަޑައިގަތުމަށް ނަޝީދު ފުރާވަޑައިގަތީ މިއަދު ހެނދުނު އެވެ.
މަޖިލީހުގެ އިދާރާއިން ނެރުނު ނޫސް ބަޔާނެއްގައި ބުނެފައިވަނީ މިފަހަރުގެ ކޮޕް ސަމިޓުގައި ނަޝީދު ތަމްސީލުކުރައްވާނީ ސްރީލަންކާ ކަމަށެވެ. ނަޝީދު ވަނީ މީގެ ކުރިން ލަންކާއަށް ދިމާވި އިގްތިސާދީ ދަތިކަމުގެ ތެރޭގައި ބޭރުގެ އެހީ ހޯދުމަށްވެސް އެ ގައުމަށް އެހީވެދެއްވާފަ އެވެ.
ކޮޕް 27 ގައި ރާއްޖެ ތަމްސީލުކުރައްވާނީ ނައިބު ރައީސް ފައިސަލް ނަސީމެވެ.
ނަޝީދުގެ މި ދަތުރުފުޅުގައި މިމަހުގެ 8 ވަނަ ދުވަހު މިސްރުގައި ބާއްވާ ކްލައިމެޓް ޕްރޮސްޕެރިޓީ ޕްލޭންސް ފްލެގްޝިޕް އިވެންޓުގައިވެސް ބައިވެރިވެވަޑައިގަންނަވާނެ އެވެ.
މީގެއިތުރުން ކޮޕް 27 ގެ ހަވާސާގައި ކްލައިމެޓް ވަލްނަރަބަލް ފޯރަމް ބެ އިސްވެރިންނާއި އެހެން ގައުމުތަކުގެ އިސްވެރިންނާ ނަޝީދު ބައްދަލުކުރައްވާނެ ކަމަށް މަޖިލީހުން ބުނެ އެވެ.
