ފާއިތުވި 17 އަހަރު ދުވަހުގެ ތެރޭގައި، ހޫނު މޫސުމުގައި ފެނުގެ ދަތިކަން ކުރިމަތިވި ރަށްތަކަށް ފެން ފޯރުކޮށް ދިނުމަށް ދައުލަތުން 85 މިލިއަނަށް ގިނަ ރުފިޔާ ހަރަދުކޮށްފައިވާ ކަމަށް ތަފާސްހިސާބުތަކުން ދައްކައިފި އެވެ.
ހޫނު މޫސުމުގައި ރަށްރަށުގައި ބޯފެނުގެ ދަތިކަން އާދަޔާހިލާފަށް ބޮޑުވެ، ރާއްޖޭގެ ގިނަ ބަޔަކަށް ގިނަގުނަ ދަތިތަކާ ކުރިމަތިލާންޖެހެ އެވެ. އަދި މިކަމުގެ ސަބަބުން ދަނޑުވެރިކަން ކުރާ ރަށްރަށުގައި ދަނޑުތަކަށް ބޮޑެތި ގެއްލުންތަކެއް ލިބި، ދަނޑުވެރިންނަށް މާލީ ބޮޑެތި ގެއްލުންތައް ވަމުންދެ އެވެ.
ހަމައެއާއެކު މޫސުމަށް އަންނަ ބަދަލުތަކުގެ ސަބަބުން ވިއްސާރަ މޫސުން އަންދާޒާ ކުރަން ދަތިވެ އަދި ކަނޑުގެ ލޮނުގަނޑު އުފުލެމުން ދިޔުމުގެ ސަބަބުން ބިމުގެ ފެންފަށަލަ ތަޣައްޔަރުވެ ގުދުރަތީގޮތުން ލިބެންހުންނަ ސާފު ބޯފެން ހޯދަން ގިނަ ރަށްރަށުގައި ވަނީ ދަތިވެފަ އެވެ.
ޑިޒާސްޓާ މެނޭޖުމަންޓުގެ ތަފާސްހިސާބުތަކުން ދައްކާ ގޮތުގައި، 2005 ވަނަ އަހަރުން ފެށިގެން މިއަހަރުގެ ސެޕްޓެމްބަރުގެ 21 ވަނަ ދުވަހުގެ ނިޔަލަށް، ފެނުގެ ދަތިކަން ކުރިމަތިވި ރަށްތަކަށް ފެން ފޯރުކޮށްދިނުމަށް ސަރުކާރުތަކުން ވަނީ ޖުމްލަ 85.2 މިލިއަން ރުފިޔާ ހަރަދުކޮށްފަ އެވެ.
މިގޮތުން، އެކަމަށް އެންމެ ބޮޑު ހޭދައެއް ކޮށްފައިވަނީ 2019 ވަނަ އަހަރެވެ. އެ އަހަރު ރަށްތަކަށް ފެން ފޯރުކޮށް ދިނުމަށް 11 މިލިއަން ރުފިޔާ ވަނީ ހޭދަވެފަ އެވެ.
ފެން ފޯރުކޮށްދިނުމަށްޓަކައި ދައުލަތުން ކޮންމެ އަހަރަކު ބޮޑު ހަރަދެއް ކުރާއިރު މިއަހަރުގެ ސެޕްޓެމްބަރު މަހާ ހަމައަށް ބޯ ފެން ފޯރުކޮށްދިނުމަށް ސަރުކާރުން ހަރަދުކޮށްފައިވާ މިންވަރު، 2021 ވަނަ އަހަރާ އަޅައިބަލާއިރު 122.2 ޕަސަންޓު އިތުރުވެފައިވެ އެވެ. މިއަހަރުގެ ސެޕްޓެމްބަރު މަހުގެ 21 ވަނަ ދުވަހުގެ ނިޔަލަށް ފެން ފޯރުކޮށް ދިނުމަށް 9.6 މިލިއަން ރުފިޔާ ހަރަދުވެފައިވެ އެވެ.
ސަރުކާރުން ބުނާ ގޮތުގައި މިކަން ހައްލުކުރުމަށް ގިނަ މަޝްރޫއުތަކެއް ކުރިއަށް ގެންދެވޭއިރު، ބައެއް ރަށްރަށުގައި ވާރޭ ފެން ރައްކާކުރުމުގެ އިންތިޒާމު ހަމަޖެއްސުންވެސް ހިމެނެ އެވެ. އަދި އަންނަ އަހަރުގެ ނިޔަލަށް، ރާއްޖޭގައި މީހުން ދިރިއުޅޭ ހުރިހާ ރަށެއްގައި ފެނާއި ނަރުދަމާގެ ނިޒާމު ގާއިމުކުރުމުގެ ވައުދު ފުއްދުމަށްޓަކައި މި މަސައްކަތާ ގުޅޭ އުމްރާނީ މަސައްކަތްތައް ކުރެވެމުންދާ ކަމަށް ބުނެފައިވެ އެވެ.
ގުދުރަތީ ހާދިސާތަކަށް ވެސް ބޮޑު ހޭދައެއް
ޖަޒީރާ ގައުމެއްގެ ހައިސިއްޔަތުން، މޫސުމަށް އަންނަ ބަދަލުތަކުގެ ސަބަބުން ކުރާ ނޭދެވޭ އަސަރުގެ ނުރައްކާ އެންމެ ބޮޑު ގައުމުތަކުގެ ތެރޭގައި ރާއްޖެ ހިމެނޭއިރު، ކަނޑުގެ ލޮނުގަނޑު އުފުލުމުގެ ސަބަބުން ދިމާވާ ކާރިސާތަކާއި އެކާރިސާތަކުން އާންމު ރައްޔިތުންގެ މުދަލާއި ގެދޮރަށް ގެއްލުންވާ މިންވަރު ދަނީ ބޮޑުވަމުންނެވެ.
މީގެ އިތުރުން، ވިއްސާރައިގެ ސަބަބުން ފެންބޮޑުވުމަކީ ވެސް ގިނަ ރަށްތަކަށް ދިމާވެފައިވާ މައްސަލަ އެވެ. އެގޮތުން ބޯކޮށް ވާރޭވެހުމުގެ ސަބަބުން މަގުތަކުގައި ފެންބޮޑުވެ، އިމާރާތްތަކާއި ހިފާ ގެންގުޅޭ ތަކެއްޗަށް ގެއްލުންވެ އެވެ.
މިގޮތުން، މިއަހަރު މިފަދަ 16 ހާދިސާއެއް ދިމާވެފައިވާއިރު، އެކާރިސާތަކާ ގުޅިގެން ދައުލަތުގެ ބަޖެޓުން 1.6 މިލިއަން ރުފިޔާ މިހާތަނަށް ވަނީ ހަރަދުކޮށްފަ އެވެ. އަދި މިއަހަރަކީ އެހެން އަހަރުތަކާ ހިލާފަށް ގުދުރަތީ ކާރިސާތައް ގިނަ އަހަރެއްކަމަށް ސަރުކާރުން ބުނެ އެވެ.
