އިލެކްޝަންސް ކޮމިޝަން މެދުވެރިވެގެން ރާއްޖޭގައި ބާއްވާ އިންތިހާބުތަކުގައި އޮބްޒާވަރެއް، މޮނީޓަރެއް ނުވަތަ ކެންޑިޑޭޓެއްގެ މަންދޫބެއްގެ ގޮތުގައި ހަރަކާތްތެރިވާ ފަރާތްތައް އިންތިހާބީ ކުށެއް ކޮށްފައިވާނަމަ، ހުއްދަ ނުދިނުމުގެ ބާރު އިލެކްޝަންސްއަށް ލިބޭ ގޮތަށް ގަވައިދު އިސްލާހުކޮށްފި އެވެ.
އިންތިހާބުތަކުގައި ކެންޑިޑޭޓުންގެ ފަރާތުން އައްޔަނުކުރާ މަންދޫބުން ވޯޓުލާ މަރުކަޒުތަކުގައި ހަރަކާތްތެރިވުމުގެ ފުރުސަތު އިލެކްޝަންސް ކޮމިޝަނުން ފަހިކޮށްދޭންޖެހޭނެ ކަމަށް އިންތިހާބުތަކާބެހޭ އާންމު ގާނޫނުން ލާޒިމުކުރެ އެވެ.
އެ ގާނޫނުގެ ދަށުން އެކުލަވާލާފައިވާ ގަވައިދުގައި އެފަދަ މީހެއްގެ ކިބައިގައި ފުރިހަމަވާންޖެހޭ ޝަރުތުތައް ވަނީ ކަނޑައަޅައިފަ އެވެ.
- އުމުރުން 18 އަހަރު ފުރިފައިވާ ދިވެއްސެއް ކަމުގައި ވުން.
- ޖިނާއީ ކުށެއްގެ ހުކުމް ތަންފީޒު ކުރެވެމުންދާ މީހެއްކަމުގައި ނުވުން.
- އެ އިންތިހާބަކާބެހޭ އެއްވެސް މަސައްކަތެއް ކުރުމަށް އިލެކްޝަންސް ކޮމިޝަނުގެ ފަރާތުން ހަވާލުވެގެން ހުރި މީހެއްކަމުގައި ނުވުން.
- ފަނޑިޔާރެއް ނުވަތަ މިނިވަން މުއައްސަސާއެއްގެ މެންބަރެއް/ ވެރިއެއް ކަމުގައި ނުވުން.
- ދިވެހި ފުލުހެއް ކަމުގައި ނުވަތަ ސިފައިންގެ މީހެއް ކަމުގައި ނުވުން.
- ކުށެއްގެ ތުހުމަތުގައި ބަންދުކޮށްފައި ހުރި މީހަކު ކަމުގައި ނުވުން.
- އިންތިހާބުގައި އިތުރު މަގާމަކަށް ކުރިމަތިލައިފައިވާ މީހެއް ކަމުގައި ނުވުން.
ނަމަވެސް، އިލެކްޝަންސް ކޮމިޝަނުން މިދިޔަ ބުރާސްފަތި ދުވަހު ވަނީ، އެ ގަވައިދަށް މާއްދާއެއް އިތުރުކޮށްފަ އެވެ.
އެ ގަވައިދުގެ 29 މާއްދާގެ ފަހަތަށް އިތުރުކޮށްފައިވާ އަކުރުގައި ބުނަނީ، ގަވައިދުގައި ބަޔާންކޮށްފައިވާ ޝަރުތުތައް ފުރިހަމަވި ނަމަވެސް، އެ މީހަކީ އިންތިހާބީ ކުށެއް ފާއިތުވި ފަސް އަހަރު ދުވަހުގެ ތެރޭގައި ސާބިތުވެފައިވާ މީހެއްނަމަ، ނުވަތަ އިންތިހާބުގައި އަމަލުކުރަންޖެހޭ ސުލޫކީ މިންގަނޑާ ހިލާފުވެފައިވާކަން އިލެކްޝަންސް ކޮމިޝަނަށް ސާބިތުވެފައިވާ މީހެއްނަމަ، އެ މީހަކަށް އިންތިހާބުގައި އޮބްޒާވަރެއް، މޮނިޓަރެއް ނުވަތަ ކެންޑިޑޭޓުންގެ މަންދޫބެއްގެ ގޮތުގައި ހަރަކާތްތެރިވުމުގެ ހުއްދަ ދޫނުކުރުމުގެ އިހުތިޔާރު، އިލެކްޝަންސް ކޮމިޝަނަށް ލިބިގެންވާ ކަމަށެވެ.
އިންތިހާބުތަކުގައި ވޯޓުލާ މަރުކަޒުތަކުގައި އޮބްޒާވަރެއް، މޮނިޓަރެއް ނުވަތަ ކެންޑިޑޭޓުންގެ މަންދޫބެއްގެ ގޮތުގައި ހަރަކާތްތެރިވާ ފަރާތްތަކުން ކުރުން މަނާ ކަންތައްތަކުގެ ތެރޭގައި މައިގަނޑު ގޮތެއްގައި ހިމެނެނީ ވޯޓުލަމުންދާ ގަޑީގައި ކެންޑިޑޭޓަކަށް ނުވަތަ ސިޔާސީ ޕާޓީއަކަށް ތާއީދު ހޯދުމަށް މަސައްކަތް ކުރުމެވެ.
