މައުލޫމާތު ހޯދާ ލިބިގަތުމުގެ ގާނޫނުގެ ދަށުން ހާމަކުރަންޖެހޭ މައުލޫމާތުތައް ފުރިހަމައަށް ހާމަކުރަނނީ ދައުލަތުގެ އެންމެ ހަތަރު އިދާރާކަން ދިރާސާއަކުން ހާމަވެއްޖެ އެވެ.
ސަރުކާރުގެ އިދާރާތަކުން މައުލޫމާތު ހިފަހައްޓާކަން އެނގުނީ އެސޯސިއޭޝަން ފޯ ޑިމޮކްރަސީ އިން ދަ މޯލްޑިވްސް އަދި ޒިންމާދާރު ޕްރޮޖެކްޓް ގުޅިގެން ދައުލަތުގެ ޖުމްލަ 73 އިދާރާއެއްގެ މައުލޫމާތު ހޯދުމަށް ހިންގި އެސެސްމެންޓަކުންނެވެ.
އާރްޓީއައި ގާނޫނުގެ ދަށުން މައުލޫމާތު އާންމު ކުރި ހަތަރު އިދާރާއަކީ އެލެކްޝަންސް ކޮމިޝަނާއި ޓެކްސް އެޕީލް ޓްރައިބިއުނަލާއި އިންފޮމޭޝަން ކޮމިޝަނާސް އޮފީސް އަދި ޕެންޝަން އޮފީހެވެ.
ޒިންމާދާރު ޕްރޮޖެކްޓަކީ އަމިއްލަ ފަރުދެއް ކަމަށްވާ އައިމަން ލަތީފް އިސްނަގައިގެން ކުރިއަށް ގެންދާ ޕްރޮޖެކްޓެކެވެ.
އާރްޓީއައި ރިޕޯޓު އާންމުކުރުމަށް މިއަދު ބޭއްވުނު ހަފުލާގައި އައިމަން ވަނީ ތިން ބުރެއްގެ މަތިން ކުރިން ބުނި 73 އިދާރާއަކުން މައުލޫމާތު ހޯދުމަށް އެދުނު އެދުމަށް އެ އިދާރާތަކުން ޖަވާބު ލިބުނު މިންވަރާއި އެކަމަށް ހޭދަވި މުއްދަތުގެ ތަފުސީލު ހިއްސާކޮށްފަ އެވެ.
އެގޮތުން ނޮވެމްބަރު 2021، ފެބްރުއަރީ، 2022، އަދި އޭޕްރިލް، 2022، ގައި އެ އިދާރާތަކަށް ވަނީ އާރްޓީއައި ރިކުއެސްޓުތަކެއް ފޮނުވާފައި ކަމަށް އޭނާ ބުންޏެވެ. މައުލޫމާތު ހޯދުމަށް އެދުނު ކޮންމެ ބުރަކުވެސް އެދުނީ މައުލޫމާތު ދިނުމަށް ގާނޫނުގައި ބަޔާންކޮށްފައިވާ 12 ދާއިރާގެ ތެރެއިން ހަތަރު ދާއިރާ އަކުންނެވެ.
އެ ޕްރޮޖްކްޓުގެ ދަށުން އިދާރާތަކުން މައުލޫމާތަށް އެދުމުގެ އިތުރުން ކޮންމެ އިދާރާއަކަށް ވެސް ވަނީ ހާއްސަ ގައިޑެއް ހުށަހަޅާފަ އެވެ. އެ ގައިޑުގައި އެ އިދާރާތަކުން މައުލޫމާތު ދެމުންދާ މިންވަރާއި، މައުލޫމާތު ދިނުން މަދު ދާއިރާތަކާއި މައުލޫމާތު ދިނުން ރަނގަޅު ކުރުމަށް އެޅިދާނެ ފިޔަވަޅުތައް ވަނީ ބަޔާންކޮށްފަ އެވެ.
އެ ރިޕޯޓަށް ފުރަތަމަ ރިވިއުއެއް ނޮވެމްބަރު، 2022، ގައި ހަދާފައިވާއިރު އެ ރިވިއުއިން ދައްކާގޮތުން އެދުމާއި އެއްގޮތަށް މައުލޫމާތު ފޯރުކޮށްދިނީ 30.9 އިދާރާ އެވެ. ނަމަވެސް މި އަހަރުގެ ޖޫން މަހު ހެދުނު ދެ ވަނަ ރިވިއުއިން ދެއްކި ގޮތުން އެ ޕަސެންޓޭޖް ވަނީ 47.6 އަށް އުފުލިފަ އެވެ.
