ބްރޯޑްކާސްޓަރުންގެ މެދުގައި ހުރި ތަފާތުކުރުންތައް ނައްތާލައި ވާދަވެރި އިންސާފުވެރި މާހައުލެއް ބިނާކުުރުމަށް ދިމާވާ ހުރަސްތައް މަޖިލީހުގެ އިންކުއަރީއަކުން ދެނެގަނެ އެކަންކަން ހައްލުކުރުމަށް ސަރުކާރަށް ގޮވާލުމަށް އިދިކޮޅުން މަޖިލީހަށް ގަރާރެއް ހުށަހަޅައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ނައިފަރު ދާއިރާގެ މެންބަރު އަހުމަދު ޝިޔާމް ހުށަހެޅުއްވި ގަރާރުގައި ވަނީ މޯލްޑިވްސް ބްރޯޑްކާސްޓިން ކޮމިޝަންގެ މެންބަރުންގެ މައްޗަށް މަތިކޮށްފައިވާ ޒިންމާ އަދާކުރުމުގެ ބަދަލުގައި "ސިޔާސީ އަދި އެހެނިހެން ނުފޫޒުތަކެއްގައި" ޖެހި، މީޑިއާނެޓަށް މާލީ މަންފާތަކެއް ހޯދުމަށް މަސައްކަތް ކުރަމުން ދާކަމުގެ ތުހުމަތު ކޮށްފަ އެވެ.
"....ވަކި ފަރާތްތަކަކަކަށް ކަނޑައެޅިގެން ނުހައްގު ނާޖާއިޒް މަންފާތައް ލިބޭނެ ފަދައިން ގާނޫނުން އެ ކޮމިޝަނަށް ލިބިދޭ ބާރުތަކުގެ ބޭނުން ނަހަމަ ގޮތުގައި ހިފައިގެން ހަދާފައިވާ ރީބްރޯޑްކާސްޓުކުރުމުގެ ގަވައިދަކީ ދިވެހިރާއްޖޭގެ ގާނޫނު އަސާސީގައި ބަޔާންކޮށްފައިވާ ހަމަހަމަކަމުގެ އުސޫލުތަކާއި ބްރޯޑްކާސްޓުކުރުމުގެ ގާނޫނާ ކަނޑައެޅިގެން ހިލާފު ގަވައިދެއް،" ގަރާރުގައި ބުނެފައިވެ އެވެ.
މީގެ އިތުރުން ދިރާގުން ކޭބަލް ޓީވީގެ ހިދުމަތް ދޭން ފެށުމުން މީޑީއާނެޓަށް ކުރިމަތިވި ވާދަވެރިކަން ނައްތާލުމަށް ވެސް އެ ގަވައިދުގެ ތެރެއިން މަސައްކަތް ކުރަމުން އަންނަ ކަން ފާހަގަކޮށް، ރިސޯޓުތަކުގައި ވެސް މީޑިއާނެޓު މެދުވެރިކޮށް ނޫނީ ހިދުމަތް ނުދެވޭނެ ގޮތަށް ކޮމިޝަނުން ނިންމާފައިވާ ނިންމުމަކީ "ވަކި ބަޔަކަށް ނާޖާއިޒް ފައިދާ" ލިބޭނެ ކަމެއް ކަމުގައި ބަޔާންކޮށްފައިވެ އެވެ.
ގަރާރުގައި ވަނީ ކުރިއަށް އޮތް ފީފާ ވޯލްޑު ކަޕު ދައުލަތުގެ މީޑިއާއިން ބެލޭނެ ކަން ގިނަ ރައްޔިތުން ކަށަވަރު ކުރަން ބޭނުންވާ ކަމަށް ބުނެފަ އެވެ.
ވީއިރު، ކުޅިވަރާއި މުނިފޫހިފިލުވުމުގެ ހިދުމަތް ރައްޔިތުންނަށް އަތްފޯރާ އަގެއްގައި އޮތުމަށް ވިޔަފާރީގެ ހަމަހަމަ ފުރުސަތުތަކެއް އޮތުން މުހިންމު ކަމަށް ގަރާރުގައި ފާހަގަކޮށްފައިވެ އެވެ.
