ޕްރޮސެކިއުޓާ ޖެނަރަލް އޮފީހަށް މިދިޔަ މަހު ހުށަހެޅި މައްސަލަތަކުގެ ތެރޭގައި އެންމެ ގިނައީ މަސްތުވާތަކެއްޗާ ގުޅޭ މައްސަލަތައް ކަމަށް އެ އޮފީހުގެ ތަފާސްހިސާބުތަކުން ދައްކައިފި އެވެ.
ޕީޖީ އޮފީހުން އާއްމުކުރި ތަފާތު ހިސާބުތައް ދައްކާ ގޮތުން މިދިޔަ މަހު އެ އޮފީހަށް ތަހުގީގު އެކި އިދާރާތަކުން ޖުމްލަ 214 މައްސަލައިއެއްގައި ދައުވާކުރުމަށް ވަނީ ފޮނުވާފަ އެވެ.
އޭގެ ތެރެއިން 36 މައްސަލަ އެކި ސަބަބުތަކާހެދި ބަލައި ނުގަތުމަށް ނިންމާފަ ވާއިރު 70 މައްސަލައެއް އިތުރު މައުލޫމާތު ސާފުކުރަން ވަނީ އަނބުރާ ފޮނުވާލާފަ އެވެ. އަދި، ބަލައިގަތީ 60 މައްސަލަ އެވެ.
އެ މައްސަލަތަކުގެ ތެރެއިން ޑްރަގު ކޯޓުން މައްސަލަތައް ނިންމި ގޮތަށް ބަލާއިރު، މަސްތުވާތަކެތި ބޭނުންކުރުމުގެ 61 ދައުވާ އާއި މަސްތުވާތަކެތި ޓްރެފިކް ކުރުމުގެ ހަ ދައުވާ އާއި މަސްތުވާތަކެތި މުއާމަލާތު ކުރުމުގެ ތިން ދައުވާގެ އިތުރުން މަސްތުވާތަކެތި ޕެޑްލްކުރުމުގެ ދެ ދައުވާއެއް މިދިޔަ މަހު ކޯޓުތަކަށް ހުށަހަޅާފައިވެ އެވެ.
އަދި ވައްކަން ކުރުމުގެ 20 ދައުވާ އާއި އެނގިހުރެ ހުއްދަ ނޫން ތަނަކަށް ވަނުމުގެ 14 ދައުވާ އާއި އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ 14 ދައުވާ ކޯޓުތަަކަށް ހުށަހަޅާފައިވާ ކަމަށް ޕީޖީގެ ތަފާސްހިސާބުތަކުން ދައްކަ އެވެ.
ޑްރަގް ކޯޓު ފިޔަވާ އެހެން ކޯޓުތަކުން ނިންމި މައްސަލަތަކުގެ ތެރެއިން 103 މައްސަލައިގައި ހުކުމް ކުރީ ކުށް ސާބިތުވާ ކަމަށެވެ. އެއީ ހުކުމްކުރި މައްސަލަތަކުގެ ތެރެއިން 76 ޕަސެންޓެވެ. އަދި، މިދިޔަ މަހު ހުކުމްކުރި މައްސަލަތަކުގެ ތެރެއިން 30 މައްސަލައިގައި ކުށް ސާބިތުނުވާ ކަމަށް ކޯޓުތަކުން ހުކުމްކުރިއިރު އެއީ ހުކުމްކުރި މައްސަލަތަކުގެ 22 ޕަސަންޓެވެ.
މީގެ އިތުރުން ޕީޖީ އޮފީހުން ދައުވާ ކުރި މައްސަލަތަކުގެ ތެރެއިން ދެ މައްސަލައެއް މަދަނީ މިންގަނޑުން ބަލާއިރު ކުރިއަށް ނުގެންދެވޭނެ ކަމަށް ކޯޓުން ކަނޑައަޅާފައިވެ އެވެ.
ޖިނާއީ ތަހުގީގު ނިންމައި ދައުވާކޮށްދޭން އިދާރާތަކުން ފޮނުވާފައިވާ މައްސަލަތަކުގެ ތެރެއިން ފުލުހުން ވަނީ 202 މައްސަލަ ފޮނުވާފަ އެވެ. އޭސީސީއިން މިދިޔަ މަހު 10 މައްސަލަ ފޮނުވާފައި ވާއިރު، އެޗްއާރުސީއެމުން ފޮނުވާފައި ވަނީ ދެ މައްސަލަ އެވެ.
