މާލެ ސިޓީ ކައުންސިލުގެ "އެއް ލައްކަ ގަސް" ޕްރޮގްރާމުގެ ދަށުން މާލޭގައި ގަސް ފިހާރައެއް ހުޅުވައިފި އެވެ.
"މާލެ ފެހި"ގެ ނަމުގައި ހުޅުވި މި ފިހާރާގައި 25 ބާވަތެއްގެ ގަހާއި ގަސްހެއްދުމަށް ބޭނުންވާ އެކި ސާމާނު ވެސް ލިބެން ހުންނާނެ އެވެ. ރޭ ކާނިވާ ސަރަހައްދުގައި މި އައުޓްލެޓް ހުޅުވައި ދެއްވީ މާލެ ސިޓީގެ މޭޔަރު ޑރ. މުހައްމަދު މުއިއްޒެވެ.
މުއިއްޒު ވިދާޅުވީ މާލެ ފެހި އައުޓްލެޓަކީ މާލެ ސިޓީގެ އެއްލައްކަ ގަސް ޕްރޮގްރާމުގެ ތެރެއަށް އިތުރުވި ބޮޅެއް ކަމަށެވެ. އޭނާ ވިދާޅުވީ 'މާލެ ފެހި' އަކީ ދެމެހެއްޓިނިވި، ވަށާޖެހޭ ގޮތެއްގައި ކުރިއަށްގެންދާ މަޝްރޫއެއް ކަމަށާއި، އޭގެ ތެރެއިން އާންމުންނަށް ގަސް ގަނެވޭ ގޮތަށް ހެދުމުގެ ބޭނުމަކީ މާލެ ފެހިކުރުމަށް ބޭނުންވާ ފަރާތްތަކަށް ވެސް އެ ފުރުސަތު ފަހިވެގެންދާނެ ގޮތަށް އެކަން ކުރުން ކަމަށެވެ.
"މީގެ ސަބަބުން އަމއްލަ ގޭގައި އަދި ގޯތިތެރޭގައި ގަސްހެއްދުމަށް ބޭނުންވާ ފަރާތްތަކަށް ވެސް ފުރުސަތު ލިބިގެން ދާނެ," މާލެ ފެހިއާއެކު އެއްލައްކަ ގަސް ޕްރޮގްރާމު އިތުރަށް ފުޅާވެގެންދާނެ ކަން ފާހަގަ ކުރައްވަމުން މުއިއްޒު ވިދާޅުވި އެވެ.
އޭނާ ވިދާޅުވީ މިހާރު ވެސް އެކި ފަރާތްތަކުން ގަސްތައް ގަތުމަށް އެދެމުންދާ ކަމަށާއި، އެކަމުގެ ސަބަބުން ސިޓީ ކައުންސިލަށް ވެސް އާމްދަނީއެއް ލިބޭނެ މަގު ފަހިވެގެންދާނެ ކަމަށެވެ.
މުއިއްޒު ވިދާޅުވީ އެއްލައްކަ ގަސް ޕްރޮގްރާމުގެ ދަށުން މާލެ ސިޓީގެ މައިޒާންތަކާއި ޕާކުތައް ފެހި ކުރުމުގެ ގޮތުން ގަސް އިންދުމާއި ވިނަ އިންދުމުގެ މަސައްކަތް ވެސް ކުރިއަށްދާނެ ކަމަށެވެ. އަދި އެ ޕްރޮގްރާމަށް އަތޮޅު ކައުންސިލްތަކުގެ އެހީތެރިކަން ވެސް ލިބިގެންދާ ކަމަށެވެ. އޭނާ ވިދާޅުވީ މިއީ މާލެ ސިޓީ ޒީނަތްތެރިކޮށް ފެހި ކުރުމުގެ ގޮތުން ކުރިއަށްދާ މަޝްރޫއެއް ކަމުން މިއީ މާލޭގެ އިތުރުން މުޅި ރާއްޖޭގެ ރައްޔިތުން ވެސް ބަލައިގަންނާނެ ޕްރޮގްރާމަކަށް ވެގެންދާނެ ކަމަށް އުއްމީދު ކުރައްވާ ކަމަށެވެ.
މުއިއްޒު އިތުރަށް ވިދާޅުވީ ސިޓީ ކައުންސިލަކީ ގަސް އިންދާ ފެހިކުރާ ބައެއް ކަމަށާއި، ގަސް ކަނޑާ، ގަސްތަކާއި ދުރު ބައެއް ނޫން ކަމަށެވެ. އަދި މާލެ ސިޓީއަކީ ގްރީން ސިޓީއަކަށް ހެދުމަށް މަސައްކަތް ކުރައްވަމުން ގެންދަވާނެ ކަމަށް އޭނާ ވިދާޅުވި އެވެ.
