ދައުލަތުގެ މާލިއްޔަތު ގަވައިދާ އެއް ގޮތަށް ރައްޔިތުންގެ މަޖިލީހުން ހަރުމުދަލުގެ ރަޖިސްޓްރީ ބަލަހައްޓަމުން ނުދާ މައްސަލަ މިދިޔަ އަހަރު ވެސް ހައްލުކޮށްފައިނުވާ ކަމަށް އޮޑިޓު އޮފީހުން ބުނެފި އެވެ.
މަޖިލީހުގެ 2020 ވަނަ އަހަރުގެ އަހަރީ ރިޕޯޓުގައި ބުނެފައިވަނީ މާލިއްޔަތު ގަވައިދުގައި ބަޔާންކޮށްފައިވާ ގޮތަށް މަޖިލީހުގެ އިދާރާގެ ހަރުމުދަލުގެ ރަޖިސްޓްރީގައި ހިމަނާފައިވާ ބައެއް ތަކެތީގައި އިންވެންޓަރީ ކޯޑު ނަންބަރާއި މުދަލުގެ އަގުފަދަ މައުލޫމާތު ފުރިހަމަކޮށް ބަލަހައްޓާފައިނުވާ ކަމަށެވެ.
"...މާލިއްޔަތު ގަވައިދާ އެއްގޮތަށް ހަރުމުދަލުގެ ކަންކަން ބަލަހައްޓަމުންނުދާ ނަމަ، ތަނުގައި ހުންނަ ހަރުމުދާ ނަހަމަ ގޮތުގައި ބޭނުންކުރުމާއި، ތަކެއްޗަށް ވާނުވާ ނޭނގި ގެއްލުމުގެ ފުރުސަތު ބޮޑުވުމާއި، މިލްކިއްޔާތުގެ ބަޔާނުގައި ހިމަނާފައިވާ ހަރުމުދަލުގެ އަދަދަކީ ފުރިހަމަ އަދި ސައްހަ އަދަދަކަށް ނުވާނެކަން ފާހަގަކުރަމެވެ،" ރިޕޯޓުގައި ބުންޏެވެ.
އޮޑިޓު އޮފީހުން އިތުރަށް ބުނީ މާލިއްޔަތު ގަވައިދާ އެއްގޮތަށް ހަރުމުދަލުގެ ރަޖިސްޓްރީ ބަލަހައްޓަމުންނުދާ މައްސަލަ، 2018 އަދި 2019 ވަނަ އަހަރުގެ އޮޑިޓު ރިޕޯޓުގައި ވެސް ފާހަގަކޮށްފައިވާނޭ ކަމަށެވެ.
ނަމަވެސް، 2020 ވަނަ އަހަރުގެ ނިޔަލަށް ވެސް އެ މައްސަލަ ހައްލުކުރަން އެއްވެސް ފިޔަވަޅެއް އަޅާފައިނުވާކަމަށް އޮޑިޓު ރިޕޯޓުގައި ބުނެފައިވެ އެވެ.
މީގެ އިތުރުން، މަޖިލީހުގެ އިމާރާތުގެ ބޮޑެތި މަރާމާތުތަކެއް ކުރަން 2019 ވަނަ އަހަރުގެ ތެރޭގައި ސަރުކާރު ހިއްސާވާ ކުންފުންޏަކާ ހަވާލުކުރުމުގައި ގަވައިދާ ހިލާފަށް ކޮށްފައިވާ ގިނަ ކަންކަން ވެސް އެ ރިޕޯޓުގައި ވަނީ ފާހަގަކޮށްފަ އެވެ.
