މޯލްޑިވްސް ނެޝަނަލް ޕާޓީގެ އޮފީސް އާ އިމާރަތަކަށް ބަދަލު ކުރުމަށްފަހު އެ އޮފީހުގެ މަސައްކަތް ފެށުމުގެ ގޮތުން އެންމެންވެގެން ހަތިމެއްކޮށްފި އެވެ.
މިއަދު ކުރިއަށްގެންދިޔަ އެ ހަފްލާގައި އެ ޕާޓީގެ ރައީސް، ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރު މުހައްމަދު ނާޒިމުގެ އިތުރުން އެހެނިހެން އިސްވެރިން ވެސް ބައިވެރިވެވަޑައިގަތެވެ.
"މޯލްޑިވްސް ނެޝަނަލް ޕާޓީގެ މަސައްކަތްތައް މިއަދު ވަނީ އައު އޮފީހަކަށް ބަދަލުކުރެވިފައި. އައު އޮފީހުގައި މަސައްކަތް ފެށުމަށް ޕާޓީގެ މެންބަރުން މިއަދު ވަނީ ކީރިތި ޤުރުއާން ހަތިމުކޮށްފަ،" އެ ޕާޓީން ސޯޝަލް މީޑިއާ ޕްލެޓްފޯމް ޓުވިޓާގައި ލިޔެފައިވެ އެވެ.
ބައެއް މަސައްކަތް ފެށުމުގެ ގޮތުން އަދި ބައެއް އިމާރާތް އަދި ގޯތިގެދޮރުގައި ދިރިއުޅެން ފެށުމުގެ ކުރިން ގުރްއާން ހަތިމް ކުރުމަކީ ރާއްޖޭގައި ގެންގުޅުނު އާދައެކެވެ. ނަމަވެސް، ދީނުގައި އޮންނަ ކަމަކައި ނުގުޅުވައި މިފަދައިން ހަތިމު ކުރުން މިހާރު ވަރަށް މަދެވެ.
އެމްއެންޕީން ވަނީ މިދިޔަ މަހު އެ ޕާޓީގެ ފުރަތަމަ ކޮންގްރެސް ބާއްވައިފަ އެވެ. އެ ކޮންގްރެސްގައި ޕާޓީގެ ބައެއް އަސާސީ އުސޫލުތައް ވަނީ ފާސްކޮށްފަ އެވެ. އަދި ޕާޓީގެ ކުރިއަށްގެންދާނެ ގޮތާއި ޕާޓީން ގެންގުޅޭނެ މައިގަނޑު ސިފަތައް ވެސް ވަނީ ކަނޑައަޅައިފަ އެވެ.
