ރާއްޖޭގެ ސާނަވީ ތައުލީމުގެ ނިޒާމުގެ ފެންވަރު ރަނގަޅުކޮށް، ނެރޭ ނަތީޖާ ރަނގަޅުކުރަން ހިންގާ ބޮޑު މަޝްރޫއަކަށް އެހީ އާއި ލޯނު ހިމެނޭ ގޮތުން ޖުމްލަ ނުވަ މިލިޔަން ޑޮލަރު (138.7 މިލިޔަން ރުފިޔާ) ދޫކުރަން ވޯލްޑް ބޭންކްގެ އެގްޒެކެޓިވް ބޯޑުން މިއަދު ފާސްކޮށްފި އެވެ.
ވޯލްޑް ބޭންކުން މިއަދު ބުނީ "މޯލްޑިވްސް އެޓޯލް އެޑިއުކޭޝަން ޑިވެލޮޕްމެންޓް ޕްރޮޖެކްޓް" ގެ ނަމުގައި ކުުރިއަށް ގެންދާ އެ މަޝްރޫއަށް އެ ބޭންކުން އެހީގެ ގޮތުގައި 4.5 މިލިޔަން ޑޮލަރު އަދި ލޯނުގެ ގޮތުގައި 4.5 މިލިޔަން ޑޮލަރު ދިނުމަށެވެ.
އެޑިއުކޭޝަން މިނިސްޓްރީން ކުރިއަށް ގެންދާ އެ މަޝްރޫއަށް ލޯނުގެ ގޮތުގައި ދޫކުރާ 4.5 މިލިޔަން ޑޮލަރު ދޫކުރާނީ، ތަރައްގީވަމުން އަންނަ ގައުމުތަކަށް ލުއި ގޮތްތަކެއްގެ މަތިން އެހީތެރިކަން ފޯރުކޮށްދޭން ހާއްސަކޮށްފައިވާ ގޮފި "އިންޓަނޭޝަނަލް ޑިވެލޮޕްމެންޓް އެެސޯސިއޭޝަން" (އައިޑީއޭ) އިންނެވެ.
ޖުމްލަ 10 މިލިޔަން ޑޮލަރު (154 މިލިޔަން ރުފިޔާ) ހަަރަދުކޮށްގެން ކުރިއަށް ގެންދާ އެ މަޝްރޫއަށް ދިވެހި ސަރުކާރުން ހަރަދުކުރާނީ އެއް މިލިޔަން ޑޮލަރު (15.4 މިލިޔަން ރުފިޔާ) އެވެ.
އެ މަޝްރޫއުގައި ހިމެނޭ މަސައްކަތްތަކުގެ ތެރޭގައި އިނގިރޭސި އަދި ހިސާބު މާއްދާ ހިޔަވައިދިނުމުގެ ފެންވަރު ރަނގަޅުކުރުމާއި ހުނަރު ދަސްކޮށްދިނުން ފަދަ އިގުތިސާދީ ގޮތުން މުހިއްމު ދާއިރާތަކުގެ ފެންވަރު މަތިކުުރުން ހިމެނެ އެވެ. ވޯލްޑް ބޭންކުން ބުނީ ސާނަވީ ތައުލީމުގައި އެ މާއްދާތަކުން ހޯދާ ނަތީޖާ ރަނގަޅުކުރެވިއްޖެ ނަމަ މަތީ ސާނަވީ ތައުލީމުގެ ފުރުސަތު ލިބޭ ކުދިންގެ އަދަދު އިތުރުވާނެ ކަމަށެވެ.
ހަކަތަ އިގުތިސާދުކުރަން ބާރު އެޅުމާއި ކުނިމަދުކުރުން ފަދަ ތިމާވެއްޓަށް ރަނގަޅު ކަންތައްތައް ތަންފީޒުކުރަން، އެ މަޝްރޫއުގައި ސްކޫލްތަކަށް ބާރު އަޅާނެ އެވެ. އިންފޮމޭޝަން ޓެކްނޮލޮޖީ އާއި ޓެކްނޮލޮޖީގެ އެހެން ވަސީލަތްތައް ސްކޫލްތަކުގައި އިތުރުކުރުމަކީ ވެސް އެ މަޝްރޫއުގައި ހިމެނޭ މަސައްކަތެކެވެ.
"...އުގެނުމުގައި ގޮންޖެހުންތައް ކުރިމަތިވާ ދަރިވަރުންގެ ބޭނުންތައް ފުއްދުމަށް، މުދައްރިސުންގެ ހުނަރު ވެސް މިހާރަށް ވުރެ ހަރުދަނާކުރެވިގެންދާނެ. އަދި ހާއްސަ ޕްރޮގްރާމްތައް ހިންގައިގެން ސްކޫލް ޕްރިންސިޕަލުންނާއި މެނޭޖްމަންޓް އޮފިޝަލުންނާއި ޓީޗަރުންގެ ހުނަރު ވެސް ރަނގަޅުކުރެވޭނެ،" މަޝްރޫއާ ބެހޭ ގޮތުން ވޯލްޑްބޭންކުން މިއަދު ނެރުނު ބަޔާނުގައި ބުންޏެވެ.
ވޯލްޑް ބޭންކުން ބުނީ ރާއްޖޭގެ އަތޮޅުތަކުގައި ކިޔަވައިދޭ މުދައްރިސުންގެ ފެންވަރު ރަނގަޅުކުރަން ހާއްސަ އަހަންމިއްޔަތުކަމެއް ދޭން ޖެހޭ ކަމަށެވެ. އަދި ދަރިވަރުންގެ އާބާދީ މަދު ރަށްރަށުގެ ސްކޫލްތަކުގެ ފެންވަރު ބެލުން މިހާރަށް ވުރެ ހަރުދަނާކުރަން ޖެހޭ ކަމަށް ވެސް ވޯލްޑް ބޭންކުން ބުންޏެވެ.
"ދިވެހި ސަރުކާރުން އަންނަނީ ތައުލީމީ މުގައްރަރު އިސްލާހުކުރުމަށް، ވަށައިޖެހޭ ސިޔާސަތުތަކެއް ތަންފީޒުކޮށް، ރާއްޖޭގެ އަތޮޅުތަކާއި ރަށްރަށުގައި ހަމަހަމަކަމާ އެކު އުގެނުމުގެ ނަތީޖާ ރަނގަޅުކުރުމަށް އިސްކަންދެމުން،" ވޯލްޑް ބޭންކްގެ ލީޑް އިކޮނޮމިސްޓް އަދި ޓާސްކް ޓީމް ލީޑަރު ހަރުޝާ އަތުރުޕާން ވިދާޅުވި އެވެ.
